Vinicius Jr meza moja na Ronaldo

MADRID, HISPANIA: Real Madrid imeonyesha imani kubwa kwa nyota wake Vinicius Junior baada ya kumsainisha mkataba mpya utakaomfanya aendelee kukitumikia kikosi hicho hadi mwaka 2032.

Mbali na muda mrefu wa mkataba huo, mshahara unaodaiwa kuwa karibu euro22 milioni kwa mwaka umeibua jambo jingine kubwa kumlinganisha Mbrazil huyo na mmoja wa mastaa wakubwa kuwahi kuvaa jezi ya Real Madrid, Cristiano Ronaldo.

Kiasi hicho ndicho kinachodaiwa kuwa mshahara ambao Ronaldo alipokea katika mkataba wake wa mwisho akiwa Real Madrid kabla ya kuondoka mwaka 2018 na kujiunga na Juventus.

Kwa Real Madrid, Ronaldo hakuwa mchezaji wa kawaida. Alifanya Uwanja wa Santiago Bernabeu kuwa sehemu ya maonyesho yake, akisaidia klabu hiyo kushinda mataji manne ya Ligi ya Mabingwa Ulaya na kumaliza akiwa mfungaji bora wa muda wote wa klabu hiyo.

Sasa Vinicius anaanza kuingia katika eneo ambalo kwa muda mrefu lilionekana kutawaliwa na nyota wakubwa wa klabu hiyo.

JEZI NAMBA 7

Ulinganisho wa Vinicius na Ronaldo hauishii kwenye mshahara.

Mbrazil huyo pia amevaa jezi namba saba, ambayo Ronaldo aliifanya kuwa moja ya jezi maarufu zaidi duniani wakati wa miaka yake Madrid.

Vinicius pia ameshaanza kuonyesha uwezo wa kubeba majukumu makubwa katika mechi muhimu, hasa kwenye Ligi ya Mabingwa, ambako amekuwa na mchango mkubwa katika mafanikio ya Real Madrid.

Kutoka kuwa kinda aliyejiunga na Madrid akitokea Flamengo, Vinicius sasa amekuwa mmoja wa wachezaji muhimu katika safu ya ushambuliaji ya klabu hiyo.

Uamuzi wa Rais wa Real Madrid, Florentino Perez, wa kumuongezea mkataba hadi 2032 umeongeza ujumbe kwamba klabu inamtazama Vinicius kama sehemu muhimu ya mustakabali wake.

MSHAHARA SI URITHI

Hata hivyo, kuwa na mshahara unaolinganishwa na Ronaldo hakumaanishi moja kwa moja kwamba Vinicius amefikia kiwango cha urithi wa Mreno huyo.

Vilevile, kuvaa jezi namba saba hakutoshi kumfanya awe Cristiano mwingine.

Ronaldo alitumia miaka mingi akifunga mabao, kushinda mataji na kuandika historia kupitia mechi kubwa kabla ya kuwa sehemu isiyotenganishwa na historia ya kisasa ya Real Madrid.

Vinicius bado ana muda wa kutengeneza historia yake mwenyewe, na hilo ndilo jukumu kubwa lililo mbele yake.

Kwa sasa ana mkataba mkubwa, ana imani ya rais wa klabu, amevaa jezi namba saba na tayari ameanza kung'ara katika usiku mkubwa wa Ligi ya Mabingwa.

SASA NI ZAMU YAKE

Florentino Perez tayari amefanya uamuzi wake kwa kumsainisha Vinicius hadi 2032 na kumweka miongoni mwa wachezaji wanaolipwa vizuri zaidi katika klabu hiyo.

Sasa mpira uko mikononi mwa Mbrazil huyo.