Mwisho wa enzi… Messi, Ronaldo wameondoka, nani kurithi jezi zao?

LISBON, URENO: MKONGWE Cristiano Ronaldo ametangaza kustaafu kuitumikia timu ya taifa ya Ureno, Novemba 5, hatua inayokamilisha mabadiliko ambayo Argentina tayari imeanza kuyapitia baada ya Lionel Messi kuaga timu yake ya taifa.

Sasa timu hizo mbili zinakabiliwa na jukumu la kutafuta viongozi wapya na kuamua ni nani atakayezivaa jezi zao maarufu zilizokuwa zikivaliwa na mastaa hao.

Kwa zaidi ya miongo miwili, Messi na Ronaldo walitawala soka la kimataifa na kuwa alama kubwa za nchi zao, Argentina na Ureno.

Mabao, mataji na rekodi walizoweka viliwafanya kuwa sehemu muhimu ya historia ya timu hizo, huku jezi namba 10 ya Argentina na namba 7 ya Ureno zikipata umaarufu wa kipekee kutokana na uwepo wao.

Sasa timu hizo zinapaswa kujifunza kushindana bila ya nyota wao wakubwa, huku zikitafuta wachezaji wenye uwezo wa kuchukua nafasi zao ndani na nje ya uwanja.

Changamoto si kupata tu wachezaji wenye uwezo wa kuziba nafasi zao, bali pia viongozi watakaoweza kubeba majukumu ya kuiongoza timu kama walivyofanya Messi na Ronaldo kwa miaka mingi.

ARGENTINA YATAFUTA MRITHI WA NAMBA 10

Baada ya Messi kuaga timu ya taifa, kocha Lionel Scaloni ameanza maandalizi ya kujenga kizazi kipya cha Argentina, maarufu kama Albiceleste.

Scaloni amethibitisha kuwa jezi namba 10 haitastaafishwa, ingawa bado hajaamua ni mchezaji gani atakayepewa jukumu la kuivaa.

Miongoni mwa majina yanayotajwa kuwania nafasi hiyo ni Nicolas Paz, Franco Mastantuono, Julian Alvarez, Tomas Aranda na Lautaro Martinez.

Paz ni mmoja wa wachezaji wanaovutia zaidi kutokana na uwezo wake wa kushambulia na kutengeneza nafasi za mabao. Sambamba naye, Aranda ni miongoni mwa vijana wanaochipukia ambao wameanza kuibua matarajio kutokana na kipaji na uwezo wao.

Kwa upande wa Mastantuono, ana historia ya kipekee kwa kuwa ndiye mchezaji wa mwisho kuivaa jezi namba 10 ya Argentina katika mchezo rasmi ambao Messi hakucheza. Alifanya hivyo dhidi ya Ecuador, Septemba 2025.

Hata hivyo, Alvarez na Martinez wana hoja nyingine zinazoweza kuwapa nafasi ya kurithi jezi hiyo kutokana na uzoefu wao wa kimataifa, uwezo wa kufunga mabao na nafasi kubwa waliyonayo katika kikosi cha Argentina.

URENO NAYO YATAFUTA MRITHI WA CR7

Tangazo la Ronaldo la Novemba 5 limefungua ukurasa mpya kwa timu ya taifa ya Ureno, baada ya nyota huyo kumaliza safari yake ya miaka 23 katika kikosi hicho.

Akiwa na umri wa miaka 41, Ronaldo anaondoka akiwa amecheza mechi 234 na kufunga mabao 146, rekodi zinazomfanya kuwa mchezaji mwenye mechi nyingi na mabao mengi zaidi katika historia ya timu hiyo ya taifa.

Kuondoka kwake kunaacha nafasi kubwa ya uongozi ndani ya kikosi hicho, huku mjadala mwingine ukiwa ni nani atakayechukua jezi namba 7 aliyokuwa akiivaa kwa miaka mingi.

Miongoni mwa majina yanayohusishwa na jezi hiyo ni Rafael Leao. Mshambuliaji huyo aliivaa namba 7 katika mchezo dhidi ya Denmark, Oktoba 1, baada ya Ronaldo kuondoka kambini mwa timu ya taifa.

Hata hivyo, namba hiyo alipewa kutokana na kanuni za upangaji wa namba za wachezaji katika mashindano husika, na si kwamba tayari ameteuliwa kuwa mrithi rasmi wa Ronaldo.

Ureno pia ina wachezaji wengine wenye uwezo wa kubeba majukumu makubwa zaidi katika kizazi kipya, wakiwamo Bruno Fernandes, Bernardo Silva, Joao Neves, Vitinha na Pedro Neto.

Uzoefu wa wachezaji wakongwe pamoja na kukua kwa vijana hao utakuwa muhimu katika kujenga kikosi kitakachokuwa na viongozi wapya.

JEZI MBILI ZA KIHISTORIA, CHANGAMOTO YA KIZAZI KIPYA

Hali ya Argentina na Ureno inafungua mjadala mkubwa kuhusu namna timu hizo zitakavyokabiliana na maisha mapya bila ya nyota waliokuwa nguzo zao kwa muda mrefu.

Messi anaondoka katika timu ya taifa ambayo tayari ina muundo imara wa ushindani na wachezaji kadhaa wenye uzoefu wa mashindano makubwa.

Kwa upande wa Ureno, timu hiyo italazimika kujipanga upya baada ya kumpoteza mfungaji bora wa muda wote na mchezaji ambaye kwa miaka mingi alikuwa kitovu cha timu hiyo.

Kwa hiyo, changamoto ya nchi hizo haitakuwa kutafuta tu wachezaji wa kuvaa jezi namba 10 na 7, bali pia kupata viongozi watakaoweza kuendeleza mafanikio na kuandika historia yao wenyewe.