Serena, Venus Williams waaga US Open

NEW YORK, MAREKANI: SI mara nyingi mchezo wa raundi ya kwanza wa tenisi ya wanawake wa wachezaji wawili huwa kivutio kikuu cha kipindi cha usiku katika US Open, lakini Serena na Venus Williams si jozi ya kawaida.

Licha ya kuwa na jumla ya umri wa miaka 90, nyota ya dada hao wawili wa Marekani bado inang'aa, huku uwezo wao wa kushindana katika kiwango cha juu ukiendelea kuwavutia mashabiki.

Hata hivyo, kurejea kwao kwenye mashindano ya Grand Slam kulimalizika kwa huzuni baada ya kupoteza mchezo wao wa raundi ya kwanza dhidi ya chipukizi namba 14, Chan Hao-ching na Maya Joint.

Dada hao, wenye umri wa miaka 44 na 46, walipambana hadi mwisho kabla ya kupoteza kwa seti 6-3, 6-7 (6-8), 7-6 (10-7) katika mchezo uliofanyika mbele ya mashabiki wengi kwenye Uwanja wa Arthur Ashe.

“Itakuwa vigumu kuamini jinsi mchezo huu ulivyokuwa wa ushindani,” amesemsa Chanda Rubin, aliyewahi kucheza tenisi na sasa ni mchambuzi.

Rubin alikumbuka kuwa aliwahi kupoteza dhidi ya Serena na Venus katika fainali ya mashindano ya wawili ya US Open mwaka 1999.

“Baada ya seti ya kwanza ulijiuliza kama Serena na Venus wataweza kurejesha makali yao, lakini walifanya hivyo,” amesemsa.

MAPOKEZI MAKUBWA

Miaka minne baada ya kuonekana kwao kwa mara ya mwisho kwenye Uwanja wa Arthur Ashe, Serena na Venus walipokelewa kwa shangwe kubwa walipoingia uwanjani.

Uwanja huo una historia kubwa kwa dada hao, ambao kwa pamoja wameshinda mataji manane ya US Open katika mchezo wa mmoja mmoja, huku wakitwaa pia mataji mawili ya wachezaji wawili wakiwa pamoja.

Mashabiki walitoa kelele kubwa tangu mwanzo, ingawa hali ilitulia katika seti ya kwanza ambayo dada hao walipoteza.

Lakini kelele zilirudi kwa nguvu katika seti ya pili baada ya Serena na Venus kuonyesha uwezo wao wa kupambana na kusawazisha mchezo.

Katika seti ya mwisho, matumaini ya mashabiki yalionekana kufifia baada ya dada hao kuwa nyuma kwa 4-1.

Hata hivyo, kama ilivyokuwa katika sehemu kubwa ya safari yao ya kihistoria ya tenisi, Serena na Venus walionyesha moyo wa kupambana na kurejea mchezoni, hatimaye kulazimisha mchezo wa tie-break uliokuwa ukichezwa hadi pointi 10.

Walipoanza kwa kuongoza 5-0, mashabiki wa Marekani walionekana kuamini ushindi ulikuwa karibu.

Lakini Chan na Joint walirejea kwa nguvu, wakitumia pia makosa ya Serena na Venus, ambao kila mmoja alifanya.

Hatimaye, jozi hiyo ya Marekani ilikubali kipigo na kuagana na mashindano hayo, huku mashabiki wakiwapa mapokezi ya heshima baada ya mchezo.