Mkongwe Sergio Ramos kurejea Real Madrid

SERGIO RAMOS anaweza kurejea kucheza soka nchini Hispania kwa kujiunga na Getafe, katika hatua inayoweza kumkutanisha tena na rafiki yake wa muda mrefu Real Madrid, Dani Carvajal.

Ramos, mwenye umri wa miaka 40, yuko huru kusaini na klabu yoyote baada ya kuondoka Monterrey ya Mexico mwishoni mwa mwaka 2025, huku Getafe ikionyesha nia ya kumsajili ili kuongeza uzoefu katika kikosi chake.

Rais wa Getafe, Angel Torres, amethibitisha kuwa amekuwa akiwasiliana na Rene Ramos, kaka na wakala wa beki huyo, kuhusu uwezekano wa kumleta katika kikosi hicho kinachoshiriki La Liga.

Hata hivyo, Torres amesisitiza kuwa usajili wa Ramos si kipaumbele cha haraka kwa klabu hiyo, ambayo kwa sasa ina mabeki sita wa kati na inahitaji kuimarisha zaidi maeneo mengine, hasa pembeni mwa uwanja.

Licha ya hilo, rais huyo hajaifunga milango ya usajili huo, akieleza kuwa Ramos bado yupo kwenye orodha ya wachezaji wanaoweza kujiunga na Getafe, huku uwezekano wa kufanya hivyo katika dirisha la usajili la Januari ukiendelea kuwepo. Endapo dili hilo litakamilika, Ramos atakutana tena na Carvajal, ambaye hivi karibuni alijiunga na Getafe baada ya kuondoka Real Madrid.

Ramos ni mmoja wa mabeki walioacha alama kubwa katika historia ya Real Madrid na timu ya taifa ya Hispania, akiwa sehemu ya kizazi kilichopata mafanikio makubwa katika soka la kimataifa.

Alex Scott

BOURNEMOUTH imeweka thamani ya zaidi ya Pauni 100 milioni kwa kiungo wake Alex Scott, ambaye anawindwa na vigogo wa Ligi Kuu England, Chelsea na Liverpool, kuelekea dirisha la usajili la Januari. Bournemouth sasa iko tayari kuzingatia ofa ya kumuuza Scott (23) iwapo itapokea kiasi kinachokaribia Pauni 100 milioni.

Florian Wirtz

KIUNGO wa kimataifa wa Ujerumani, Florian Wirtz, hana mpango wa kuondoka Liverpool licha ya taarifa zinazohusisha Chelsea na nia ya kumsajili ili kuungana tena na kocha wake wa zamani wa Bayer Leverkusen, Xabi Alonso. Wirtz(23), alijiunga na Liverpool akitokea Bayer Leverkusen majira ya joto ya mwaka 2025.

Younes Ebnoutalib

TOTTENHAM inaendelea kufuatilia maendeleo ya mshambuliaji wa Eintracht Frankfurt ya Ujerumani, Younes Ebnoutalib, mwenye umri wa miaka 23, anayeendelea kuvutia kutokana na kiwango chake msimu huu. Tottenham imekuwa ikimfuatilia Ebnoutalib kwa muda, huku ikitathmini uwezekano wa kumsajili katika dirisha lijalo la usajili.

David Otorbi

NEWCASTLE inaendelea kumfuatilia kiungo wa Valencia, David Otorbi,19, ikiwa ni sehemu ya mipango ya klabu hiyo kutathmini vipaji chipukizi vinavyoweza kuimarisha kikosi chake. Otorbi, ambaye pia anaweza kucheza kama winga, amevutia uangalizi baada ya kuanza kupata nafasi katika kikosi cha wakubwa cha Valencia.

Yuito Suzuki

TOTTENHAM imeanza kuangalia uwezekano wa kumsajili kiungo mshambuliaji wa Freiburg ya Ujerumani, Yuito Suzuki (24), katika mipango ya Kocha Roberto De Zerbi kuimarisha kikosi chake. Hata hivyo, Tottenham inakabiliwa na ushindani wa AC Milan ya Italia, ambayo pia inafuatilia maendeleo ya Suzuki.

Daniel Banjaqui

BARCELONA inaendelea kumfuatilia beki wa kulia wa Benfica ya Ureno, Daniel Banjaqui (18), lakini inakabiliwa na ushindani kutoka kwa Newcastle na Manchester United zinazovutiwa na huduma za chipukizi huyo. Barcelona imerejea kumchunguza Banjaqui baada ya kuvutiwa na maendeleo yake katika kikosi cha Benfica.

Finn Jeltsch

BARCELONA inakabiliwa na ushindani kutoka kwa Real Madrid na Liverpool  katika harakati za kuwania saini ya beki wa kati wa Stuttgart, Finn Jeltsch (20). Real Madrid  inafuatilia maendeleo ya Mjerumani huyo, huku ikitazama uwezekano wa kuimarisha safu yake ya ulinzi kwa muda mrefu. Liverpool pia imeingia kwenye orodha hiyo.

Xavi Espart

Arsenal na Tottenham zimeanza kumfuatilia kwa karibu beki chipukizi wa Barcelona, Xavi Espart (19), ingawa kipengele kikubwa cha kuvunja mkataba wake kinaweza kuwa kikwazo katika jitihada za kumsajili. Mkataba wake hadi 2030 unaripotiwa kuwa na kipengele cha kuvunja mkataba kinachozidi Euro100 milioni.

Viktor Gyokeres

Mshambuliaji wa Sweden, Viktor Gyokeres (28), anatarajiwa kushinikiza kuondoka Arsenal katika dirisha la usajili la Januari 2027 kutokana na kukosa nafasi ya kutosha ya kucheza. Kwa sasa, Kai Havertz anatajwa kuwa chaguo la kwanza la Arteta katika nafasi ya mshambuliaji wa kati, hali inayoongeza ushindani kwa Gyokeres.