Manchester City ilivyoipa rekodi mbili PSG

PSG imeweka rekodi mbili muhimu baada ya kuifunga Manchester City kwa mabao 4-2 katika mchezo wa Ligi ya Mabingwa Ulaya uliochezwa jana Jumatano, Oktoba 14, 2026, katika Uwanja wa Etihad, jijini Manchester, England.

Ushindi huo umeifanya PSG, inayotetea ubingwa wa mashindano hayo, kuendeleza kiwango chake kizuri dhidi ya timu za England, huku ikiweka historia katika mwanzo wa kampeni yake ya msimu huu ya mashindano hayo.

Rekodi ya kwanza ni kufunga mabao 10 katika mechi zake mbili za mwanzo za Ligi ya Mabingwa Ulaya, jambo ambalo halijawahi kufanywa na timu nyingine katika historia ya mashindano hayo.

PSG ilianza kwa ushindi wa mabao 6-1 dhidi ya Slovan Bratislava kisha kuendeleza ubabe wake kwa kuichapa Manchester City kwa mabao 4-2.

Rekodi ya pili ni kuendeleza mfululizo wa kutofungwa na timu za England katika Ligi ya Mabingwa Ulaya hadi kufikisha mechi 10, ikiwa imeshinda nane na kutoka sare mbili.

Katika mechi hizo 10, PSG imefunga mabao 26 na kuruhusu mabao 10, takwimu zinazoonyesha uimara wake inapokutana na wapinzani kutoka England katika mashindano hayo.

Mfululizo huo umeendelea baada ya kuishinda Manchester City, ambayo ilijikuta nyuma kwa mabao matatu ndani ya dakika 32 za kipindi cha kwanza kabla ya kujaribu kurejea katika kipindi cha pili.

Pia, mshambuliaji wa PSG, Ousmane Dembélé, alifikia rekodi ya Kylian Mbappé baada ya kufunga katika mechi sita mfululizo za timu hiyo katika Ligi ya Mabingwa Ulaya.

Mbappé aliwahi kufunga katika mechi sita mfululizo za mashindano hayo mwaka 2022.

Hata hivyo, Dembélé na Mbappé bado wana kibarua cha kufikia rekodi ya Edinson Cavani, ambaye mwaka 2017 alifunga katika mechi saba mfululizo za mashindano hayo.

Katika mchezo huo, PSG ilianza kwa kasi na kupata mabao kupitia Désiré Doué katika dakika ya 13, Dembélé katika dakika ya 15 na Vitinha katika dakika ya 32, matokeo yaliyoifanya kwenda mapumziko ikiwa mbele kwa mabao 3-0.

Manchester City ilirejea kipindi cha pili kwa kufunga mabao mawili kupitia Erling Haaland katika dakika ya 53 na 75, lakini bao la Maghnes Akliouche katika dakika ya 62 liliihakikishia PSG ushindi wake mnono.

Matokeo hayo yameifanya PSG kuendelea kujiweka katika nafasi nzuri katika kampeni ya kutetea ubingwa wake wa Ulaya, huku Manchester City ikilazimika kujitathmini baada ya kuruhusu mabao matatu katika kipindi cha kwanza cha mchezo wa nyumbani kwa mara ya kwanza tangu mwaka 2015.

“Timu yetu ni ya ajabu. Ina ujasiri na inataka kushinda kila mchezo. Lakini kipindi cha pili ni somo kwetu kwamba tunapaswa kufanya vizuri zaidi, kwa sababu tungeweza kupoteza mchezo huu. Ni matokeo mazuri sana kwetu, lakini tunahitaji kuboresha zaidi,"amesema Meneja wa PSG, Luis Enrique.