Kigogo mmoja atang’oka Carabao Cup

LONDON, ENGLAND: LIVERPOOL imepangwa kukutana na Chelsea katika mchezo wa kuvutia wa raundi ya nne ya Kombe la Carabao, huku Arsenal ikipewa safari ya kuwakabili Fleetwood Town ya Ligi Daraja la Pili.

Liverpool na Chelsea zilikutana katika droo iliyofanyika Jumatano, katika mchezo ambao unatarajiwa kuwa kivutio kikubwa cha raundi hiyo kutokana na kukutanisha vigogo wawili wa Ligi Kuu England.

Mchezo huo pia utakuwa wa kipekee kwa kocha wa Chelsea, Xabi Alonso, ambaye atarejea Anfield kwa mara ya kwanza tangu alipochukua mikoba ya kuinoa Chelsea. Alonso aliwahi kuwa kiungo muhimu wa Liverpool wakati wa uchezaji wake.

Kwa upande mwingine, Arsenal itasafiri kwenda Highbury kuwavaa Fleetwood Town, timu ya League Two ambayo imefuzu kwa mara ya kwanza katika historia yake hadi raundi ya nne ya mashindano hayo.

Fleetwood ilitinga hatua hiyo baada ya kuichapa Sheffield United kwa bao 1-0, na sasa ndiyo timu iliyopo daraja la chini zaidi kati ya zilizobaki kwenye mashindano.

Arsenal, ambayo msimu uliopita ilimaliza ikiwa mshindi wa pili wa Carabao Cup, ilitinga raundi ya nne baada ya kuifunga Ipswich Town mabao 4-2 Jumanne usiku.

Mabingwa watetezi Manchester City bado hawajajua mpinzani wao wa raundi ya nne, baada ya kupangwa kucheza na Norwich City katika mchezo wa raundi ya tatu Alhamisi. Mshindi wa pambano hilo atakutana na Brighton.

Everton, inayotafuta taji lake kubwa la kwanza tangu mwaka 1995, itakuwa mwenyeji wa Newcastle katika mchezo mwingine unaovuta hisia. Newcastle ndiyo ilitwaa Carabao Cup msimu wa 2024/25.

Everton itacheza mchezo huo katika uwanja wa Hill Dickinson Stadium.

Sunderland nayo imepangwa kuwa mwenyeji wa Brentford, huku Fulham ikiikaribisha Crystal Palace katika mchezo mwingine wa timu za Ligi Kuu England. Palace ilifuzu baada ya kuiondoa Middlesbrough wiki iliyopita.

Bournemouth itakuwa mwenyeji wa Aston Villa baada ya Villa kupata ushindi wake wa kwanza wa msimu katika mashindano ya ndani, ikiichapa Coventry City mabao 3-1 Jumatano.

Kwa upande wa timu za League One, Bradford City na Peterborough ndizo pekee zilizosalia kwenye mashindano hayo, na droo imezikutanisha zenyewe. Bradford itakuwa mwenyeji wa mchezo huo.

Michezo yote ya raundi ya nne imepangwa kuchezwa katika wiki inayoanza Oktoba 26, tofauti na raundi ya tatu ambayo iligawanywa katika wiki mbili.

Brighton iliandika moja ya matokeo yaliyowashangaza wengi katika raundi ya tatu baada ya kutoka nyuma kwa mabao 2-0 na kuifunga Manchester United mabao 3-2 kwenye Uwanja wa Old Trafford.

Michezo yote itachezwa katika wiki inayoanza Oktoba 26.

DROO YA RAUNDI YA NNE

Fleetwood Town vs Arsenal

Manchester City au Norwich City vs Brighton

Everton vs Newcastle

Sunderland vs Brentford

Liverpool vs Chelsea

Bradford City vs Peterborough

Fulham vs Crystal Palace

Bournemouth vs Aston Villa