Gyokeres aweka rekodi Sweden, mashabiki wamshukia Arteta

LONDON, ENGLAND: MASHABIKI wa Arsenal wamemshukia kocha wao Mikel Arteta baada ya mshambuliaji Viktor Gyokeres kuandika historia mpya akiwa na timu ya taifa ya Sweden, huku akionyesha kiwango kinachowafanya mashabiki kujiuliza kwa nini hapewi nafasi kubwa kwenye kikosi cha Gunners.

Gyokeres, 28, amekuwa akipata muda mchache wa kucheza Arsenal katika hatua za mwanzo za msimu huu, licha ya kuwa na mchango mkubwa katika mafanikio ya timu hiyo msimu uliopita.

Mshambuliaji huyo aliingia kwenye vitabu vya historia baada ya kufunga bao katika sare ya Sweden ya 1-1 dhidi ya Bosnia and Herzegovina kwenye Ligi ya Mataifa (Nations League).

Bao hilo lilimfanya Gyokeres kuwa mchezaji wa kwanza kufunga katika mechi sita mfululizo za Nations League.

Kabla ya bao hilo, mshambuliaji huyo alikuwa amefunga dhidi ya Poland, Romania, Slovakia na Estonia, huku akifunga mabao manne katika mchezo dhidi ya Azerbaijan.

Katika mchezo dhidi ya Bosnia, Gyokeres alipokea pasi baada ya Alexander Bernhardsson kurejesha mpira, kabla ya kupiga shuti kali lililomshinda kipa Salko Hamzic na kuandika bao hilo muhimu.

Kiwango hicho kiliwafanya baadhi ya mashabiki wa Arsenal kutumia mitandao ya kijamii kuhoji uamuzi wa Arteta wa kumpa Gyokeres nafasi chache uwanjani.

Shabiki mmoja aliandika: “Tulimdhibiti mnyama.”

Mwingine alisema: “Gyokeres amefunga kwa ustadi wa hali ya juu. Angalia ubora wa mpira huo. Arsenal haina mfungaji bora kuliko yeye.”

Shabiki mwingine alikwenda mbali zaidi kwa kuandika: “Arteta anapaswa kukamatwa.”

Mwingine akaandika: “Lo! Hilo ni bao kali sana! Huyu ndiye Gyokeres.”

Shabiki mwingine aliongeza: “Amekuwa mnyama kwenye mchezo huu. Ni vizuri kumuona akianza kuonekana kama Gyokeres wa zamani wa Sporting tena, Arsenal apewe nafasi.”

AMEPATA DAKIKA 29 TU

Licha ya rekodi hiyo, Gyokeres amepewa dakika 29 pekee za kucheza kwenye Ligi Kuu England msimu huu.

Mshambuliaji huyo wa zamani wa Coventry pia aliingia akitokea benchi katika mchezo ambao Arsenal ilipokea kipigo cha kushangaza cha mabao 3-0 dhidi ya Brighton kabla ya mapumziko ya mechi za kimataifa.

Hata hivyo, nafasi ya Gyokeres kuanza katika kikosi cha kwanza inaweza kuongezeka baada ya mshambuliaji Kai Havertz kupata majeraha ya misuli ya paja.

Havertz alilazimika kurejea mapema kutoka kwenye majukumu ya timu ya taifa baada ya kupata tatizo hilo, hali ambayo inaweza kumfanya Arteta ampe Gyokeres nafasi zaidi katika safu ya ushambuliaji ya Arsenal.