Garcia amchakaza Conor, akimbizwa hospitali

LAS VEGAS, MAREKANI: BONDIA Conor Benn alipelekwa hospitalini mara moja baada ya kupata kipigo kikali kutoka kwa Ryan Garcia katika pambano lao la kuwania mkanda wa WBC uzani wa welterweight katika pambano lililofanyika alfajiri ya jana jijini Las Vegas.

Bondia Garcia ameendeleza ubabe wake kwenye ndondi baada ya kumchapa Conor kwa Technical Knockout (TKO) raundi ya pili na kutetea mkanda wake wa WBC uzani wa welterweight.

Garcia alihitaji dakika nne na sekunde 25 pekee kumaliza pambano hilo, akimlazimisha Benn kuanguka chini ya ulingo, katika pambano ambalo tangu mwanzo lilionekana kuwa mtihani mkubwa mno kwa mpinzani huyo.

Garcia, mwenye umri wa miaka 28, alimuangusha Benn kwa ngumi kali ya kulia mwanzoni mwa raundi ya pili, kabla mwamuzi Thomas Taylor kusitisha pambano baada ya Garcia kuendelea kumshambulia akiwa amebanwa kwenye kamba za ulingo.

Kusimamishwa kwa pambano hilo kulikuwa mara ya kwanza katika maisha ya Benn ya ndondi za kulipwa kupoteza kwa TKO, tangu aanze kurejea kwenye uzani wa pauni 147, sawa na kilo 66.7.

Benn aliingia kwenye pambano hilo akiwa na lengo la kuonyesha kuwa yuko tayari kupambana katika kiwango cha juu, lakini kasi, nguvu na usahihi wa Garcia vilimfanya ashindwe kuhimili mashambulizi ya mpinzani wake.

Baada ya kuanguka na kuonekana kupata kipigo kikali, Benn alipelekwa hospitalini kwa uchunguzi zaidi kama hatua ya tahadhari.

Conor, mtoto wa bondia mkongwe Nigel Benn, alianza pambano kwa kasi akimvamia Garcia tangu kengele ya kwanza, lakini mpango huo uligeuka kuwa janga baada ya kukutana na mfululizo wa ngumi za kushoto za Garcia.

Raundi ya kwanza iliyodumu kwa sekunde 85 ilikuwa kama utangulizi wa adhabu kubwa iliyofuata. Garcia hakutegemea mkono wake wa kushoto pekee, kwani ngumi zake za kulia pia zilionekana kuwa na nguvu kubwa, hali iliyomfanya Benn ashindwe kupata jibu.

Benn aliangushwa kwenye sakafu ya ulingo baada ya kushambuliwa kwa mfululizo wa ngumi kutoka mikono yote miwili. Alipoinuka kwa kusuasua, mwamuzi Thomas Taylor alimtazama kwa muda kabla ya kuruhusu pambano liendelee.

Hata hivyo, Garcia hakumruhusu Benn kupata nafasi ya kurejea. Mchanganyiko wa ngumi za kushoto na kulia ulimfanya mwamuzi kuingilia kati na kusitisha pambano hilo, kabla Benn hajapata madhara makubwa zaidi.

Ushindi huo ulikuwa uthibitisho mwingine wa uwezo wa Garcia, ambaye alionekana kuwa bora zaidi kwa kasi, mbinu na nguvu za ngumi. Benn hakuweza kuendana naye katika sehemu yoyote muhimu ya pambano.

Kabla ya pambano hilo, mjadala mkubwa uliibuka kuhusu uzito wa Benn baada ya kufikia kiwango cha pauni 147, sawa na kilo 66.7, katika zoezi la kupima uzito siku moja kabla ya pambano.

Kulikuwa pia na madai kwamba Benn ameongeza zaidi ya kilo 12 baada ya zoezi hilo la kupima uzito, jambo ambalo lingemfanya kuwa mzito kwa kiasi kikubwa wakati wa kuingia ulingoni. Hata hivyo, haikuthibitishwa wazi iwapo madai hayo yalikuwa ya kweli.

Garcia alikuwa ameonya kabla ya pambano kwamba Benn hakustahili kupewa nafasi ya kuwania mkanda wa WBC uliowahi kushikiliwa kwa fahari na baba yake. Baada ya kilichotokea ulingoni, Garcia alionekana kuthibitisha hoja yake kwa vitendo.

Kwa mashabiki waliolipa fedha nyingi kushuhudia pambano hilo, kilichokuwa muhimu zaidi ni kuona mabondia hao wakitoa burudani waliyokuwa wameiahidi. Hata hivyo, tofauti ya uwezo kati yao ilikuwa wazi tangu kengele ya kwanza.

Kabla ya pambano kuanza, mashabiki pia walipata muda wa kumkumbuka bondia maarufu wa Uingereza, Ricky Hatton, aliyefariki akiwa na umri mdogo. Picha yake ilionyeshwa kwenye skrini kubwa huku eneo hilo likiwa katika mwonekano wa rangi nyeusi na nyeupe kwa heshima yake.

Garcia aliingia ulingoni akiwa amejifunga bendera ya Mexico huku nyimbo za kizalendo za nchi hiyo zikisikika, akipokelewa kwa shangwe kubwa na mashabiki wake.

Benn, kama ilivyotarajiwa, alianza kwa kushambulia, lakini alikutana na mvua ya ngumi za kushoto za Garcia. Ndani ya muda mfupi, nguvu na kasi ya Garcia vilimzidi Benn, kabla pambano hilo halijafikia tamati katika raundi ya pili.

Kwa jumla, Garcia alithibitisha kwa mara nyingine kwamba ni mmoja wa mabondia hatari zaidi katika uzani huo, huku Benn akiondoka Las Vegas akiwa amepata somo zito kuhusu kiwango kinachohitajika kushindana kwenye kilele cha ndondi za dunia.