Abby Chams na safari ya kutikisa Afrika

ABIGAIL Anthony Chamungwana maarufu kama Abigail Chams au Abby Chams, mwaka 2026 ameendelea kuonyesha kwa nini anatajwa kuwa miongoni mwa wasanii wa kike wa Tanzania wanaopanda kwa kasi, safari hii akifanya maonyesho kwenye majukwaa makubwa nje ya Tanzania.

Mwaka huu umekuwa wa matukio muhimu kwa msanii huyo, huku akivuka mipaka ya nyumbani na kuonekana katika matukio makubwa ya burudani na michezo barani Afrika.

Miongoni mwa show kubwa alizopanda jukwaani mwaka huu ni Africa Forward: Le Concert, iliyofanyika Mei 12, 2026 jijini Nairobi, Kenya, ambapo aliungana na mastaa mbalimbali wa Afrika kutumbuiza.

Abby alikuwa sehemu ya orodha ya wasanii wakubwa wa Afrika waliotumbuiza kwenye show hiyo, akiwemo Yemi Alade, Fally Ipupa, Youssou N’Dour, Nandy na wengineo.

Lakini si kuonekana tu kwenye jukwaa hilo kulifanya jina lake liendelee kuzungumzwa. Abby alipata nafasi ya kupanda jukwaani pamoja na gwiji wa muziki kutoka Senegal, Youssou N’Dour, katika utendaji wa pamoja wa wimbo wake maarufu 7 Seconds. Tukio hilo lilipewa uzito kama moja ya matukio yaliyokutanisha vizazi viwili vya muziki wa Afrika.

Kutoka Nairobi, safari yake ikaendelea Kigali nchini Rwanda, ambapo alipewa nafasi ya kutumbuiza katika Basketball Africa League (BAL) Playoffs and Finals 2026. BAL yenyewe iliweka rekodi ya tukio hilo kwenye tovuti yake rasmi kama “Abigail Chams Halftime Show in Kigali”, likiwa miongoni mwa burudani zilizotolewa wakati wa michuano hiyo.

Kabla ya show hiyo, taarifa za maandalizi ya BAL zilimtaja Abby kuwa miongoni mwa wasanii wa Afrika Mashariki waliopangwa kutumbuiza katika hatua za mwisho za mashindano hayo yaliyofanyika BK Arena, Kigali.

Kwa Abby, majukwaa hayo mawili yalikuwa zaidi ya burudani. Yalikuwa sehemu ya safari yake ya kujenga jina nje ya Tanzania na kuonyesha uwezo wake mbele ya mashabiki wa nchi mbalimbali.

Na kama hiyo haitoshi, mwaka huu Abby pia ameendelea na muziki wake mpya. Agosti 14, 2026, alitoa single “Yoyo”, ikiwa ni moja ya kazi zake mpya baada ya mfululizo wa matukio yaliyoongeza mwonekano wake katika Afrika Mashariki.

Hii inaifanya 2026 kuwa mwaka ambao Abby Chams hakukaa kwenye muziki pekee, bali alijaribu pia kuthibitisha uwezo wake wa kubeba jukwaa kubwa.

Pia, hakusita kuonyesha uwezo wake kwenye ardhi ya Zanzibar, ambapo alitumbuiza katika Full Moon Party iliyofanyika ufukweni mwa Kendwa Rocks. Show hiyo iliyowakutanisha watalii na mashabiki mbalimbali ilimpa nafasi ya kuonyesha uwezo wake wa kutumbuiza live, huku akiwaburudisha waliohudhuria kwa nyimbo zake na kuacha burudani ya aina yake kwenye moja ya maeneo maarufu ya Zanzibar.

Kwa kuangalia majukwaa aliyopata mwaka huu, safari ya Abby Chams kimataifa inaonekana bado haijafika mwisho. Kuna mengi zaidi yanakuja.