Yamal aongoza shangwe, Hispania yatua kifalme
Muktasari:
- Hispania ilirejea nyumbani ikiwa mabingwa wa dunia kufuatia ushindi wa bao 1-0 dhidi ya Argentina kwenye fainali iliyochezwa Jumapili, na kuongeza nyota ya pili kwenye jezi yao.
MADRID, HISPANIA: MSHAMBULIAJI chipukizi wa Hispania, Lamine Yamal alikuwa kivutio kikubwa wakati wa gwaride la mabasi ya wazi jijini Madrid baada ya taifa hilo kutwaa Kombe la Dunia 2026.
Hispania ilirejea nyumbani ikiwa mabingwa wa dunia kufuatia ushindi wa bao 1-0 dhidi ya Argentina kwenye fainali iliyochezwa Jumapili, na kuongeza nyota ya pili kwenye jezi yao.
Mashujaa hao walipokelewa kwa shamrashamra kubwa na takribani mashabiki milioni mbili waliovalia rangi za taifa na kubeba bendera pamoja na mabango yaliyotawala mitaa ya Madrid.
Yamal, Nico Williams wafunika
Katika hali ya furaha, Yamal mwenye umri wa miaka 19 alionyesha umahiri wake wa kucheza muziki akiwa juu ya basi la wazi.
Nyota huyo wa Barcelona alicheza pamoja na winga wa Athletic Bilbao, Nico Williams, huku wawili hao wakifanya miondoko iliyowasisimua mashabiki waliojitokeza kwa maelfu.
Wachezaji wengine walionekana wakiwa wamevua fulana, wakijifunika bendera ya Hispania huku wakifurahia sherehe hizo.
Mshambuliaji mkongwe Borja Iglesias naye alichukua jukumu la kuwa DJ wa kikosi, akisimamia muziki uliowafanya wachezaji na mashabiki kuendelea kushangilia.
Ferran amchokoza Trump
Mbali na shamrashamra hizo, mashabiki waligundua jambo lililowafanya wengi kutabasamu.
Shujaa wa fainali, Ferran Torres, alionekana amevaa kofia nyekundu iliyoandikwa "Make Spain Great Again", ikiwa ni kejeli ya kaulimbiu maarufu ya Rais wa Marekani, Donald Trump, inayosema "Make America Great Again."
Kejeli hiyo ilikuja siku moja baada ya Trump kukabidhi medali kwa mabingwa hao wa dunia kwenye hafla ya kukabidhi zawadi.
Rodri ampongeza Ferran
Baadaye, wachezaji wote walipanda jukwaani huku kila mmoja akiingia kwa muziki wake maalumu.
Beki mpya wa Real Madrid, Marc Cucurella, aliwashangaza mashabiki baada ya kuanza kupiga ngoma wakati wa utambulisho wake.
Nahodha wa Hispania, Rodri, aliwashukuru mashabiki na kutumia nafasi hiyo kumpongeza Ferran Torres.
"Tumeshinda Kombe la Dunia. Sasa tuna mataji mawili. Wachezaji hawa ni wa kipekee. Pia ningependa kumkumbuka mtu muhimu kwangu, mchezaji ambaye amekosolewa bila sababu, lakini leo ameandika historia ya soka la Hispania - Ferran," alisema Rodri.
De la Fuente awashukuru Wahispania
Kocha wa Hispania, Luis de la Fuente, aliwashukuru mashabiki kwa sapoti yao kubwa katika safari ya kutwaa ubingwa.
"Asanteni Hispania kwa kutuunga mkono na kwa kuwa hapa nasi. Tuna bahati kuwa na watu 26 wa kipekee ambao pia ni wachezaji bora zaidi duniani. Ni heshima kubwa kuwa kocha wao na kushiriki nao wakati huu wa kihistoria. Tukiwa pamoja tuna nguvu zaidi. Viva Espana!" alisema kocha huyo.
