Saliba amerudi, mtego kwa Arteta

LONDON, England: KOCHA wa Arsenal, Mikel Arteta, anakabiliwa na changamoto ya kuchagua mabeki wa kati watakaocheza katika kikosi chake baada ya nyota wake William Saliba kurejea mazoezini kufuatia kukaa nje kwa muda mrefu kutokana na majeraha.

Hata hivyo, hilo ni tatizo ambalo makocha wengi wa timu kubwa barani Ulaya wangetamani kuwa nalo, kutokana na ubora wa mabeki alionao Mhispania huyo.

Saliba, ambaye alikuwa mhimili muhimu wa Arsenal katika mafanikio yake ya kutwaa ubingwa wa Ligi Kuu England msimu uliopita, amekuwa nje tangu kuanza kwa msimu huu kutokana na jeraha la mgongo.

Beki huyo mwenye umri wa miaka 25 alipata tatizo hilo baada ya kulazimika kutoka uwanjani mapema katika mchezo wa nusu fainali ya Kombe la Dunia ambao Ufaransa ilifungwa na Hispania.

Wakati Saliba akiwa nje, beki mpya Ezri Konsa amechukua nafasi yake kwa mafanikio makubwa, akishirikiana na Gabriel Magalhaes kuunda ukuta imara wa ulinzi.

Tangu Konsa alipojiunga na Arsenal akitokea Aston Villa kwa ada ya pauni milioni 55, amekuwa miongoni mwa wachezaji waliofanya vizuri zaidi, akiisaidia timu hiyo kuendelea kuwa na safu imara ya ulinzi.

Katika mechi tisa za Ligi Kuu England, Arsenal imeruhusu mabao matano pekee, ikiwa na rekodi bora ya ulinzi katika ligi hiyo.

Saliba alikuwa akisumbuliwa na tatizo la mgongo tangu msimu uliopita, lakini baada ya Kombe la Dunia alipelekwa kwa mtaalamu kwa uchunguzi zaidi.

Baada ya tathmini, iliamuliwa kuwa hakuhitaji kufanyiwa upasuaji, lakini alihitaji muda mrefu wa matibabu na kurejesha utimamu wa mwili. Wakati huo, klabu haikutaja muda maalumu wa kurejea kwake.

Awali, beki huyo wa kimataifa wa Ufaransa alikuwa akifanya mazoezi binafsi katika kituo cha Arsenal, lakini sasa amerejea katika mazoezi ya pamoja na wenzake, hatua inayokuja kabla ya mchezo wa Ligi ya Mabingwa Ulaya dhidi ya Slavia Prague na ratiba ngumu ya kipindi cha sikukuu za mwisho wa mwaka.

Saliba na Gabriel wamekuwa sehemu muhimu ya mafanikio ya Arsenal, iliyotwaa ubingwa wa Ligi Kuu England kwa mara ya kwanza baada ya miaka 22 msimu uliopita.

Ushirikiano wao ulikuwa msingi wa uimara wa timu hiyo iliyofungwa mabao 27 pekee katika ligi. Saliba pia alichaguliwa katika kikosi bora cha mwaka cha Chama cha Wachezaji wa Kulipwa England (PFA) kwa mara ya nne mfululizo.

Arsenal imekuwa ikisisitiza kuwa itakuwa makini katika mchakato wa kumrejesha Saliba uwanjani, lakini kurejea kwake katika utimamu wa mwili kutampa Arteta wakati mgumu wa kupanga safu yake ya ulinzi.

KONSA AMEJITANGAZA

Kabla ya kumsajili Konsa kwa pauni milioni 55, kulikuwa na maswali kuhusu umuhimu wa Arsenal kuongeza beki mwingine wa kati, ikizingatiwa tayari ilikuwa na mabeki saba wa kikosi cha kwanza na ushirikiano imara wa Saliba na Gabriel.

Hata hivyo, Konsa amethibitisha thamani yake tangu alipojiunga na Arsenal, kiasi cha baadhi ya wachambuzi kumtaja yeye na Gabriel kuwa miongoni mwa jozi bora za mabeki wa kati duniani.

Katika mechi tisa za Ligi Kuu England, Konsa ameanza saba, licha ya kujiunga na Arsenal saa chache kabla ya mchezo wa ufunguzi dhidi ya Coventry. Alipata nafasi ya kucheza kwa mara ya kwanza dhidi ya klabu yake ya zamani, Aston Villa.

Arteta ameeleza kuwa namna beki huyo alivyozoea mazingira ya Arsenal imekuwa ya kushangaza, akitumia neno 'unbelievable' kuelezea mchango wake.

Konsa alicheza mechi 286 akiwa Aston Villa baada ya kujiunga na klabu hiyo Julai 2019 akitokea Brentford. Pia alikuwa sehemu ya kikosi kilichotwaa taji la Europa League mwezi Mei, ikiwa ni mara ya kwanza kwa Villa kushinda taji la Ulaya tangu mwaka 1982.

Katika kiwango cha kimataifa, Konsa amejijengea nafasi ya kuwa mchezaji wa kikosi cha kwanza cha England, akianza mechi saba kati ya nane ambazo timu hiyo ilicheza katika Kombe la Dunia.

Jambo jingine linaloweza kuwa na umuhimu katika nafasi yake Arsenal ni uwezo wake wa kucheza beki wa kulia, baada ya kuanza katika nafasi hiyo kwenye mchezo wa robo fainali dhidi ya Norway.

Beki huyo mwenye umri wa miaka 29 anasifika kwa umbile lake kubwa, kasi na ukali wake katika mapambano ya kuwania mpira, sifa ambazo zimewavutia mashabiki wa Arsenal.

Konsa alifunga bao la kwanza katika ushindi wa mabao 2-0 dhidi ya Everton na akaonyesha tena kiwango bora katika ushindi dhidi ya Liverpool kwenye Uwanja wa Anfield Jumapili, ambao ulikuwa wa kwanza kwa Arsenal kupata ushindi hapo baada ya miaka 14.