Salah aachwa Misri kisa nyasi bandia

CAIRO, MISRI: TIMU ya taifa ya Misri imemwacha mshambuliaji Mohamed Salah kwenye kikosi kitakachocheza dhidi ya Sudan Kusini katika mchezo wa kufuzu Kombe la Mataifa ya Afrika (AFCON2027), kutokana na mechi hiyo kuchezwa kwenye uwanja wenye nyasi bandia.

Salah, ambaye kwa sasa anakipiga katika klabu ya Trabzonspor ya Uturuki baada ya kuondoka Liverpool, hakuambatana na kikosi cha Misri kilichosafiri kwenda Juba kwa mchezo huo utakaochezwa Jumanne, Septemba 29.

Mchezaji huyo mwenye umri wa miaka 34, alicheza katika sare ya bila mabao dhidi ya Angola mjini Cairo Ijumaa, lakini alitolewa baada ya kucheza kwa takriban dakika 60 na kocha Hossam Hassan.

Shirikisho la Soka la Misri (EFA) lilisema uamuzi huo ulifikiwa na benchi la ufundi kwa lengo la kumpumzisha na kumlinda mshambuliaji huyo.

“Benchi la ufundi la timu ya taifa ya Misri, likiongozwa na Hossam Hassan, limeamua kumpumzisha Mohamed Salah katika mchezo dhidi ya Sudan Kusini utakaochezwa Septemba 29 kutokana na aina ya uwanja,” EFA lilisema.

“Ilifikiwa makubaliano kati ya benchi la ufundi na Salah kabla ya mchezo dhidi ya Angola kwamba hatacheza dhidi ya Sudan Kusini, huku benchi likiona ni vyema kuchukua hatua hiyo kwa ajili ya kumlinda mchezaji,” iliongeza taarifa hiyo.

Kumekuwa na mtazamo kwamba kucheza kwenye nyasi bandia kunaweza kuongeza hatari ya majeraha licha ya maendeleo ya teknolojia katika utengenezaji wa nyuso hizo. Hata hivyo, tafiti zilizopo hazijaonesha ushahidi wa jumla kwamba nyasi bandia husababisha hatari kubwa zaidi ya majeraha.

Salah aliondoka Liverpool mwishoni mwa msimu uliopita baada ya kuitumikia klabu hiyo kwa miaka tisa, akicheza mechi 442 na kufunga mabao 257, huku akisaidia klabu hiyo kutwaa mataji tisa makubwa.

Tangu ajiunge na Trabzonspor, Salah amefunga mabao saba na kutoa pasi mbili za mabao katika mechi sita za Ligi Kuu ya Uturuki msimu huu.