Kane aitafuta rekodi ya Ronaldo

MUNICH, UJERUMANI: NAHODHA wa England, Harry Kane, anakaribia kuvunja rekodi ya Cristiano Ronaldo ya kufunga katika mechi nyingi mfululizo za Ligi ya Mabingwa Ulaya, baada ya kuendeleza moto wake wa mabao akiwa na Bayern Munich.

Kane alifunga mabao mawili katika mchezo ambao Bayern ilitoka sare ya 3-3 dhidi ya Viking FK ya Norway Jumanne usiku, matokeo yaliyotokana na timu hiyo ya Ujerumani kujikuta ikifungwa mabao mawili mapema kabla ya kurejea mchezoni.

Mabao hayo yalimwezesha Kane kufikisha mechi tisa mfululizo za Ligi ya Mabingwa akifunga, rekodi ambayo pia imewahi kufikiwa na Robert Lewandowski na Ruud van Nistelrooy.

Mabao mawili ya Kane yalimfikisha jumla ya mabao 36 katika michezo 40 ya Ligi ya Mabingwa tangu atimize umri wa miaka 30, akimpita Lionel Messi aliyekuwa na mabao 35 katika mashindano hayo akiwa na umri huo.

Hata hivyo, Ronaldo ndiye anayeshikilia rekodi ya kufunga katika mechi nyingi zaidi mfululizo katika mashindano hayo, baada ya kufanya hivyo katika michezo 11 mfululizo akiwa na Real Madrid msimu wa 2017/18, ambapo alifunga mabao 17 katika kipindi hicho.

Kane sasa anahitaji kufunga katika mechi mbili zaidi ili kuifikia rekodi hiyo, na mechi moja nyingine ya kufunga itamwezesha kuivunja.

Hata hivyo, safari hiyo haitakuwa rahisi, kwani Bayern inatarajiwa kukutana na Arsenal, Atletico Madrid na Lille katika michezo yake mitatu ijayo ya mashindano hayo.

Arsenal na Atletico zinajulikana kwa uimara wa safu zao za ulinzi, hali inayompa Kane mtihani mkubwa katika harakati zake za kuweka historia mpya.

Iwapo atafanikiwa, rekodi hiyo itaongeza heshima kwa mshambuliaji huyo, ambaye ameendelea kuthibitisha ubora wake katika soka la Ulaya akiwa na Bayern Munich.

Kane amekuwa miongoni mwa washambuliaji wanaofanya vizuri zaidi duniani, na kuvunja rekodi inayoshikiliwa na Ronaldo kutakuwa hatua nyingine kubwa katika safari yake ya kujijengea jina katika historia ya Ligi ya Mabingwa.