Harry Kane alishindwa kwa tofauti ya pointi 28!

LONDON, ENGLAND: MSHAMBULIAJI wa Bayern Munich na nahodha wa timu ya taifa ya England, Harry Kane ameandika historia mpya katika soka duniani baada ya kutwaa tuzo ya Ballon d’Or 2026, akimzidi staa wa Real Madrid na Ufaransa, Kylian Mbappe, kwa tofauti ya pointi 28 pekee.

Kane alitwaa tuzo hiyo kubwa zaidi ya heshima binafsi kwa mchezaji wa soka katika hafla iliyofanyika Jumatatu usiku kwenye Ukumbi wa London Palladium, baada ya kufanya vizuri kwa kiwango cha juu katika msimu wa 2025/26.

Ushindi huo unamfanya Kane kuwa Mwingereza wa kwanza kutwaa Ballon d’Or tangu mwaka 2001, wakati ambapo Michael Owen aliposhinda tuzo hiyo.

Nyota huyo alijizolea sifa kutokana na kiwango chake bora akiwa na Bayern Munich pamoja na timu ya taifa ya England, akifunga jumla ya mabao 73 katika msimu huo.

Mabao yake yalikuwa sehemu muhimu ya mafanikio ya Bayern Munich kutwaa mataji matatu ya ndani ya nchi, huku pia akiiongoza England akiwa nahodha hadi nafasi ya tatu katika michuano ya Kombe la Dunia.

Matokeo kamili ya upigaji kura yameonyesha jinsi ushindani kati ya Kane na Mbappe ulivyokuwa mkali, huku mshambuliaji huyo wa England akikusanya pointi 1,055 dhidi ya 1,027 za Mbappe aliyemaliza nafasi ya pili.

Tofauti hiyo ya pointi 28 ni ndogo zaidi kuliko ile iliyotokea mwaka 2024 kati ya Rodri na Vinicius Junior, ambapo Rodri alishinda kwa tofauti ya pointi 41.

MESSI ALIWAPITA POINTI SABA

Licha ya ushindi wa Kane kuwa wa tofauti ndogo, bado haujafikia rekodi ya ushindani mkali zaidi katika miaka ya karibuni.

Mwaka 2019, Lionel Messi alimzidi Virgil van Dijk kwa pointi saba pekee katika kinyang’anyiro cha Ballon d’Or.

Pia, mwaka 1996, Matthias Sammer alimshinda nyota wa Brazil, Ronaldo, kwa pointi moja tu, huku mwaka 1966 Sir Bobby Charlton naye akimzidi Eusebio kwa pointi moja.

Katika upigaji kura wa mwaka huu, Kane alipata kura 40 za nafasi ya kwanza, kila moja ikiwa na pointi 15, wakati Mbappe alipata kura 23 za nafasi ya kwanza.

Hata hivyo, waandishi wa habari wawili walimwacha Kane nje ya orodha yao ya wachezaji 10 bora, huku Mbappe akipuuzwa na wapiga kura watatu.

Lamine Yamal, ambaye pia alikuwa akitajwa kuwa miongoni mwa wagombea wakubwa wa tuzo hiyo, alimaliza nafasi ya tatu akiwa na pointi 881, tofauti ya pointi 174 dhidi ya Kane.

Rodri na Lionel Messi walikamilisha orodha ya wachezaji watano bora.