Amorim awalipua mastaa AC Milan

MILAN, ITALIA: KOCHA wa AC Milan, Ruben Amorim, amewashukia vikali nyota wa kikosi chake akiwatuhumu kukosa ari, nidhamu na umakini baada ya kupokea kichapo cha mabao 2-0 kutoka kwa Ferencvaros ya Hungary katika mchezo wa Ligi ya Europa.

Milan ilikumbana na kipigo hicho cha aibu kwenye Uwanja wa San Siro, huku mashabiki wake wakionyesha hasira kutokana na kiwango kibovu kilichoonyeshwa na timu hiyo.

Kilichozidisha maumivu kwa mashabiki wa Milan ni ukweli kwamba Ferencvaros ilicheza dakika 15 za mwisho ikiwa na wachezaji 10 baada ya mmoja wa nyota wake kutolewa kwa kadi nyekundu, lakini wenyeji walishindwa kutumia faida hiyo kupata hata bao moja.

Akizungumza baada ya mchezo huo, Amorim hakuficha hasira zake, akisema wachezaji wake hawakustahili kuvaa jezi ya klabu hiyo kwa namna walivyojitokeza uwanjani.

"Unapochezea Milan una jukumu kubwa. Huwezi kwenda uwanjani na kucheza kwa namna hii," amesema Amorim.

Kocha huyo mwenye umri wa miaka 41 ameongeza kuwa kikosi chake bado hakijawa tayari kushindana katika michuano miwili mikubwa kwa wakati mmoja, Serie A na Ligi ya Europa.

"Tunahitaji kuboresha namna tunavyojiandaa na kuingia kwenye michezo. Hakuna cha kusema usiku huu. Tulipaswa kushinda kwa sababu ulikuwa mchezo muhimu. Sina cha kuwatetea wachezaji wangu, tunahitaji kuelewa kilichotokea," amesema.

Amorim alikiri huenda naye alifanya makosa katika maandalizi ya mchezo huo, lakini akasisitiza kuwa tatizo la kukosa mwitikio na kupambana limekuwa likijitokeza kwa kikosi hicho.

"Labda nilifanya jambo lisilo sahihi katika siku chache zilizopita. Mwaka uliopita timu ilikuwa na matatizo kama haya na leo hatukuwa tayari. Hatukuwa na mtazamo wa kupambana kurejea mchezoni kwa gharama yoyote baada ya kuwa nyuma," amesema.

Amesema hata wachezaji walioanza mchezo walikuwa na uwezo wa kuipa Milan ushindi, hivyo hakuwa tayari kutumia sababu za mabadiliko ya kikosi kujitetea.

"Hatuna visingizio. Mchezaji yeyote aliyekuwa uwanjani angeweza kushinda mchezo huu. Tulipaswa kufanya vizuri zaidi katika mipira ya pili na mambo mengine mengi," ameongeza.

Kocha huyo alitaja kipindi cha kwanza kuwa sehemu mbaya zaidi ya mchezo huo, akisema wachezaji wake walikosa dhamira, umakini na maandalizi ya kisaikolojia.

Alisisitiza kuwa Milan ilishindwa kubadilisha kasi kutoka kwenye ushindi wa dabi dhidi ya Inter na kuingia kwenye mashindano mengine.

Pamoja na kufanya mabadiliko kadhaa kwenye kikosi kilichoanza katika ushindi wa dabi, Amorim amesema hakuwa na sababu ya kuamini kuwa wachezaji wake hawakuwa na uwezo wa kuifunga Ferencvaros.

"Tatizo si ubora wa kiufundi wala mabadiliko ya kikosi. Hatukuwa tayari kisaikolojia. Siwezi kukubali kuambiwa kikosi cha kwanza hakikuwa na uwezo wa kushinda mchezo huu," amesema.

Milan kwa sasa inashika nafasi ya tano kwenye msimamo wa Serie A, ikiwa pointi saba nyuma ya vinara, huku kwenye Ligi ya Europa ikiwa nafasi ya 28, nje ya maeneo ya kufuzu hatua ya mtoano.

Hata hivyo, Amorim amesisitiza kuwa bado hajakata tamaa kuhusu michuano hiyo na kuahidi kupambana hadi mwisho.

"Hatuko tayari kucheza kila baada ya siku tatu kwa sasa, lakini sitaisalimisha Ligi ya Europa. Tutapambana hadi mwisho. Hilo ni ahadi yangu," amesema.

Amorim alijiunga na Milan baada ya kutimuliwa Manchester United, ambako alishindwa kuipa timu hiyo matokeo yaliyotarajiwa.

Akiwa Old Trafford, alisimamia msimu ambao United ilimaliza nafasi ya 15 kwenye Ligi Kuu England, ikiwa ni moja ya misimu mibaya zaidi katika historia yake ya Premier League.

Sasa macho yake yanaelekezwa kwenye mchezo ujao dhidi ya Genoa, ambapo Milan itakuwa na nafasi ya kurejea kwenye ushindani na kurejesha imani ya mashabiki wake.