Chirwa arejea Geita Gold
Muktasari:
- Katika mechi hiyo iliyoisha kwa sare ya kufungana mabao 2-2, Chirwa alifunga penalti dakika ya 45+8 na kushindwa kuendelea baada ya jeraha hilo.
MSHAMBULIAJI wa Geita Gold, Mzambia Obrey Chirwa ameanza mazoezi na kikosi baada ya kupona jeraha la bega lililotokana na mechi ya Ligi Kuu Bara dhidi ya Azam FC iliyopigwa Uwanja wa Bukombe, Geita, Agosti 28, 2026.
Katika mechi hiyo iliyoisha kwa sare ya kufungana mabao 2-2, Chirwa alifunga penalti dakika ya 45+8 na kushindwa kuendelea baada ya jeraha hilo.
Akizungumza na Mwanaspoti, Kocha Mkuu wa Geita Gold, Zubery Katwila amesema mshambuliaji huyo ameanza rasmi mazoezi na wachezaji wenzake na yupo fiti kucheza, jambo linalompa wigo mpana wa kufanya machaguo.
“Amerudi katika kipindi kizuri ambacho timu inamuhitaji, kila kocha anapenda kuona wachezaji wakiwa fiti maeneo yote, kwa sababu inasaidia kufanya mabadiliko mbalimbali ya kimbinu kutokana na mpinzani unayekutana naye,” amesema Katwila.
Kocha huyo amesema mechi ijayo ya ligi dhidi ya Dodoma Jiji itakayopigwa keshokutwa huenda mshambuliaji huyo akacheza kutegemeana na hali itakavyokuwa siku husika.
Chirwa ni mfungaji bora wa Championship 2025-2026 akiwa na mabao 18 alipokuwa Kagera Sugar idadi sawa na Maulid Shaban aliyekuwa anaichezea Geita Gold ambapo wote kwa sasa wako timu moja.
Mshambuliaji huyo amekuwa na mwenendo mzuri na kikosi cha Geita Gold, kwani hadi sasa ameshakifungia mabao manne kwenye Ligi Kuu Bara.
