KIKOSI kamili cha Azam FC kinahesabu saa tu kwa sasa kabla ya kupaa kwenda Tunisia kuweka kambi ambapo ndio wanaenda kuweka kambi ya maanzalizi msimu wa 2023/24 kocha Youssouph Dabo, tayari ameanza kazi na mastaa wake akitoa programu mbili kwa siku.
Azam imeanza maandalizi nyumbani kabla ya kutimka huku ikithibitika kuwa program yao ya mazoezi ni kufanya mara mbili kwa siku, asubuhi na jioni kuhakikisha wanakuwa na kikosi bora.
Azam juzi walianza rasmi maandalizi ya msimu mpya wa 2023/24 wa Ligi Kuu Bara na michuano ya kimataifa kwa kufanya mazoezi mara moja asubuhi na siku zilizofuata kuendelea kufanya mara mbili kwa siku.
Kwa mujibu wa kocha huyo, watakuwa na vipindi viwili vya mazoezi asubuhi na jioni, asubuhi watakuwa wanaangalia utimamu wa mwili kwa wachezaji wake na jioni ni mazoezi ya kiufundi.
“Kwanza tunataka kuwa na kikosi bora na cha ushindani katika michuano ijayo, tutalazimika kuwa bize na mazoezi kuweza kufikia malengo mabayo tumejiwekea mwanzoni mwa msimu mpya,” alisema Dabo.
Alisema mikakati yao ni kuona wanaanda timu iliyokuwa ya ushindani kuweza kuonyesha changamoto kwenye ligi kwa msimu ujao kwa kuhakikisha wanakuwa na kikosi imara hasa ukiangalia wana wachezaji wenye uwezo.
Kikosi cha timu hiyo kinatarajiwa kuondoka nchini kesho kwenda Tunisia katika mji wa Sousse aliozaliwa na kuishi aliyekuwa kocha wa Yanga, Nasreddine Nabi.
