MATUKIO ya vurugu na uharibifu wa viti kwenye Uwanja wa Benjamin Mkapa, Dar yaliyotokea juzi Jumapili katika mechi ya Kombe la Shirikisho Afrika iliyowakutanisha Simba na CS Sfaxien ya Tunisia, yanaziweka timu hizo kikaangoni ambapo kila moja inanyemelewa na adhabu kulingana na uzito wa kosa lililotokea.
Mchezo huo wa Kundi A ambao Simba iliibuka na ushindi wa mabao 2-1, haukumalizika salama kutokana na fujo zilizotokea ambazo zilisababisha kung’olewa viti 256 vya uwanja huo, kuumia kwa shabiki mmoja na kupigwa refa wa mechi hiyo, Andofetra Rakotojaona kutoka Madagascar.
Adhabu ambayo Simba haina namna ya kukwepa ni kulipa fidia ya uharibifu uliofanyika uwanjani hapo kwa vile yenyewe ndio ilikuwa mwenyeji na ndio ambayo imeukodi kwa ajili ya matumizi yake ya kucheza mashindano ya kimataifa.
Tayari Wizara ya Habari, Utamaduni, Sanaa na Michezo imeshatoa taarifa ya kuitaka Simba ihakikishe inalipa gharama za uharibifu ambao umetokea juzi uwanjani hapo.
“Waziri wa Habari, Utamaduni, Sanaa na Michezo Profesa Palamagamba Kabudi amemuagiza Katibu Mkuu wa Wizara hiyo kuchukua hatua mara moja kwa kuwaandikia timu ya Simba Sports Club na kuwanakili Shirikisho la Kandanda Tanzania (TFF) ili gharama za uharibifu uliosababishwa katika mechi hiyo zilipwe,” ilifafanua taarifa hiyo ya Wizara.
Ukiondoa kulipa gharama za uharibifu wa viti, Simba inaweza kujikuta ikikumbana na adhabu ya faini isiyozidi Dola 10,000 (Sh23.7 milioni) ikiwa itabainika mashabiki wake kuhusika na vurugu hizo kwa vile litakuwa tukio la kwanza la kung’oa na kurusha viti uwanjani kufanywa na mashabiki wake kwenye mechi za mashindano ya klabu Afrika.
Rungu kubwa linaweza kuiangukia CS Sfaxien kutokana na idadi kubwa ya makosa ambayo iliyafanya kama timu katika mchezo wa juzi pamoja na mashabiki wake na ambayo yalichangia kwa kiasi kikubwa vurugu zilizotokea juzi.
Kosa la kwanza ni bughudha ambayo wachezaji na maofisa wake wa benchi la ufundi walifanya kwa waamuzi na maofisa wengine wa mchezo huo wakati na baada ya mchezo na mfano ni tukio la kuvamiwa na kupigwa kwa refa Rakotojaona baada ya mchezo kumalizika.
Mbali na hilo, picha mbalimbali za video zilionyesha mashabiki wa CS Sfaxien wakipigana na maofisa usalama katika vyumba vya kubadilishia nguo mara baada ya kumalizika kwa mchezo huo. Maofisa hao wa benchi la ufundi na wachezaji wa Sfaxien mbali na vurugu kwa refa pia waliwapiga na kuwarushia makopo ya maji maofisa usalama uwanjani pindi walipojaribu kuwazuia kufanya vurugu katika mechi ya juzi.
Mashabiki hao pia walihusika katika kung’oa viti na kuvirusha uwanjani pamoja na kupigana na mashabiki wa Simba na walinzi wa uwanjani jambo lililosababisha mmojawao kuumia.
Kosa jingine ambalo lilifanywa na mashabiki hao wa Sfaxien ni kuonyesha ishara za kisiasa baada ya kupeperusha bendera za Palestina jambo ambalo ni kinyume cha katiba na miongozo ya Shirikisho la Mpira wa Miguu Afrika (Caf).
Kwa mujibu wa ibara ya 49 ya Katiba ya Shirikisho la Mpira wa Miguu Afrika (Caf), hairuhusiwi uonyeshwaji wa jumbe zenye mlengo wa kisiasa katika eneo kunakofanyika tukio la kimashindano.
“Hakuna uonyeshwaji wowote wa kisiasa, kidini au propaganda za kibaguzi ambao unaruhusiwa katika eneo la kimashindano la Caf,” inafafanua ibara hiyo.
Muda wa mapumziko, walitembeza bendera kubwa ya nchi hiyo katika jukwaa la upande wa Kaskazini ambako walikuwa wamekaa.
Wakati wakifanya hivyo, Ofisa Habari wa Caf kwenye mechi hiyo, Ahmed Hussein kutoka Uganda alionekana akipiga picha kwa simu yake ya mkononi tukio la mashabiki hao kupeperusha bendera hizo, ikionekana kama kuchukua ushahidi wa jambo hilo. Kwa mujibu wa kanuni za nidhamu za Caf, mchezaji au ofisa wa timu anayefanya kosa la kumshambulia refa au ofisa wa mchezo anaweza kufungiwa kuanzia idadi ya mechi nne hadi miezi sita na kupewa adhabu ya kuanzia Dola 5,000 (Sh11.9 milioni).
Kosa la vurugu linalofanywa na timu nzima linaweza kupelekea adhabu ya faini inayoweza kufikia hadi Dola 300,000 (Sh711.7 milioni) na isiyopungua Dola 50,000 (Sh118.6) kutegemeana na uzito na ukubwa wa kosa lenyewe. Katibu Mkuu wa zamani wa TFF, Angetileh Osiah alisema kwa mazingira ya vurugu za juzi, timu zote mbili zitakutana na adhabu.
“Simba wao watatakiwa kulipa hasara iliyotokea kwa Mkapa kwa sababu wao ndio waliokodi uwanja na wanatakiwa kuurudisha ukiwa kama walivyoukuta, Shirikisho haliwezi kuidai CS Sfaxien.
“Mengi yanazungumzwa kuhusiana na tukio la jana (juzi) kuhusu suala la Simba kufungiwa kuingiza mashabiki sioni hilo likitokea wala hawawezi kupokea adhabu yoyote kutoka Caf labda CS Sfaxien na wao sio kufungiwa watapigwa faini,” alisema Osiah.
Ofisa habari wa Simba, Ahmed Ally alisema: “Sisi Simba tunaalaani aina yoyote ya vitendo vya vurugu kwenye viwanja vya mpira wa miguu. Mamlaka zote za usimamizi wa mchezo wameona, wamechukua ripoti, naamini wataenda kuwasilisha katika mamlaka za juu zaidi ili tuweze kujua kitu gani kinafanyika.
“Vitendo vya vurugu uwanjani ni vitendo visivyokubalika hasa katika soka la kisasa na tunaamini mamlaka zitatoa uamuzi wa haki.”
