YANGA imeonyesha dhamira ya kufanya makubwa msimu huu baada ya kumtangaza aliyekuwa kocha mkuu wa Simba, Fadlu Davids, kuwa kocha mkuu mpya wa timu hiyo.
Yanga ilimtangaza kocha huyo jana usiku, baada ya kipindi kirefu cha sintofahamu kuhusu nani angechukua nafasi ya aliyekuwa kocha mkuu wa timu hiyo, Manqoba Mngqithi, ambaye aliondolewa baada ya kushindwa kufanya vizuri katika michezo miwili ya Ligi Kuu Bara.
Fadlu anawasili Yanga akiwa na jukumu kubwa la kuweka rekodi mpya. Kwanza, anakuwa miongoni mwa makocha wa kigeni waliofundisha timu zote mbili, Simba na Yanga, katika miaka ya hivi karibuni. Hata hivyo, matarajio ya mashabiki kwake ni makubwa zaidi kutokana na kile alichokionyesha alipokuwa akiinoa Simba.
Hakuna mwenye shaka kuhusu uwezo wake wa kufundisha soka nchini Tanzania, kwani tayari alionyesha ubora wake alipokuwa na Simba.
Fadlu alikuwa miongoni mwa makocha walioirejesha ushindani katika Ligi Kuu Bara baada ya Yanga kutawala kwa muda mrefu bila kupata upinzani mkubwa.
Katika msimu wake akiwa na Simba, yaani 2024/2025, Fadlu aliifanya timu hiyo kuipa Yanga upinzani mkubwa hadi katika mchezo wa mwisho wa ligi. Hata hivyo, Simba ilipoteza mchezo huo na kuukosa ubingwa kwa tofauti ya pointi nne pekee.
Msimu huo, pamoja na mambo mengine, moja ya sababu zilizoigharimu Simba katika mbio za ubingwa ilikuwa ni kupoteza michezo yote miwili dhidi ya Yanga. Kama ingejipanga vizuri zaidi, huenda ingeweza kushinda angalau mchezo mmoja kati ya hiyo miwili na kutwaa ubingwa.
Hali hii inaonyesha kuwa Fadlu ni miongoni mwa makocha wenye uwezo mkubwa. Katika msimu wa 2023/2024, kabla ya kujiunga na Simba, timu hiyo ilimaliza ligi ikiwa nyuma ya Yanga kwa pointi 11 na kushika nafasi ya tatu. Hata hivyo, baada ya kuwasili kwake, alifanya mabadiliko makubwa katika kikosi hicho na mwisho namba zinazungumza.
Si suala la kuifanya timu kupunguza tofauti ya pointi pekee, bali pia uwezo wa wachezaji kupambana uwanjani. Kuimarika kwa kiwango cha timu katika kila mchezo ni jambo jingine linalompa Fadlu heshima kama mmoja wa makocha wenye uwezo mkubwa.
Faida nyingine ni kwamba Fadlu tayari ameweka historia akiwa na Simba. Ni wazi kuwa, katika kipindi cha takribani miaka 90 tangu kuanzishwa kwa klabu hiyo, wamepita makocha wengi wakubwa. Fadlu alipotua Simba, ilikuwa ndiyo mara yake ya kwanza kupata ajira kama kocha mkuu wa timu, baada ya kufanya kazi ya ukocha msaidizi katika klabu ya Raja Casablanca, pamoja na uzoefu huo mdogo aliweza kuiongoza Simba hadi kufika fainali ya Kombe la Shirikisho Afrika. Hilo ni daraja jingine muhimu alilojenga katika historia ya klabu hiyo.
Uzoefu wake wa kushiriki michuano ya Shirikisho la Soka Afrika (CAF) kwa zaidi ya miaka mitatu, kuanzia alipokuwa kocha msaidizi wa Raja Casablanca hadi alipojiunga na Simba, unaonyesha kuwa tayari ana uzoefu wa kutosha katika mashindano hayo makubwa. Aidha, anazifahamu timu nyingi zinazoshiriki michuano hiyo, jambo linaloweza kumrahisishia kazi ya kuiongoza Yanga kwa mafanikio akiwa amebakiza wiki mbili tu ili acheze mchezo wake wa kwanza wa hatua ya makundi.
Pamoja na ubora wake, kuna jambo ambalo Yanga inapaswa kulielewa na kukubali kutoka kwa Fadlu: ama mashabiki wakubali kuona timu ikicheza kwa tahadhari na kulinda matokeo, au wacheze vizuri bila kuwa na uhakika wa ushindi.
Hili ni angalizo muhimu kwa Yanga, na hakuna sababu ya kuwaficha mashabiki ukweli huu. Kila mmoja anaweza kuwa na mtazamo wake, lakini ukweli ni kwamba Fadlu ni aina ya makocha wanaopenda kulinda matokeo ambayo timu yao tayari imeyapata, hata kama ni katika dakika za mwanzo za mchezo.
Falsafa ya soka anayopendelea Fadlu ni kulinda uongozi wa mabao badala ya kuendelea kutafuta mabao mengi zaidi. Hili ni jambo muhimu ambalo mashabiki wanapaswa kulielewa mapema.
Katika timu alizozifundisha, Fadlu amekuwa akipendelea mfumo wa soka usiozingatia sana burudani, lakini unaolenga kuhakikisha timu haipotezi mchezo. Kwa hiyo, mashabiki wa Yanga wanaposema kuwa timu imeshinda lakini haijacheza soka la kuvutia, wanapaswa kuelewa kuwa huenda hilo likawa sehemu ya falsafa ya kocha huyo.
Fadlu ni miongoni mwa makocha ambao, timu yake ikipata bao moja, kwa mfano katika dakika ya 10, anaweza kubadilisha mfumo wa uchezaji na kuelekeza nguvu katika kulinda matokeo. Wachezaji wake wanaweza kujilinda zaidi, kuruhusu wapinzani kushambulia mara kwa mara, lakini mwishowe timu ikabaki na ushindi. Hivyo, mashabiki wa Yanga wanapaswa kujiandaa kisaikolojia na kukubaliana na aina hiyo ya uchezaji.
Jambo lingine ambalo Yanga inapaswa kulifahamu ni kwamba Fadlu atahitaji kupewa nafasi ya kushiriki katika mchakato wa usajili wa baadhi ya wachezaji anaowahitaji kwa ajili ya kikosi chake.
Nadhani wengi wanawakumbuka wachezaji kama Charles Ahoua, Leonel Ateba, Dese Mukwala, Rushine de Reuck, Neo Maema na wengine wengi.
Simba haiwezi kukataa kwani Fadlu aliwahitaji wachezaji hao na uongozi ukamuunga mkono katika kuwasajili. Hivyo, uongozi wa Yanga unapaswa kuelewa kuwa kuna wakati kocha huyo atahitaji kuleta wachezaji anaowaamini na ambao wanaendana na falsafa yake. Ni vyema uwe tayari kumuunga mkono katika hilo.
Jambo jingine ambalo Yanga inapaswa kulifahamu ni kwamba Fadlu ni kocha mwenye uwezo mkubwa, lakini pia ana misimamo yake. Viongozi wa klabu wanapaswa kujiandaa kukabiliana na hali hiyo. Anapokuwa amemwamini mchezaji fulani na kutaka asajiliwe, huwa anasimamia msimamo wake ili kuhakikisha klabu inampata mchezaji anayemtaka.
Kila mmoja anakumbuka suala la Anthony Mligo na Miraj Abdallah. Sina haja ya kulieleza kwa undani, lakini ukweli ni kwamba kocha alisimamia msimamo wake kuhusu kumtaka Mligo, na tunafahamu kilichotokea. Hivyo, Wananchi wanapaswa kuelewa kuwa kuna wakati Fadlu atashikilia msimamo wake, na hawapaswi kukasirishwa na hali hiyo.
Kwa mujibu wa watu waliofanya kazi na Fadlu, yeye pamoja na wasaidizi wake hutumia muda mwingi kufanya kazi, wakati mwingine hadi usiku wa manane. Inadaiwa kuwa husafiri na mashine ya kutengeneza kahawa katika kila mkoa au nchi wanayokwenda.
Wanafanya vikao vingi na wachezaji pamoja na benchi la ufundi, wakilenga kuhakikisha timu yao inakuwa imara katika kila eneo. Hii inaonyesha kiwango cha maandalizi na umakini wanaouweka katika kazi yao, kuwaitisha makocha wasaidizi vikao saa saba usiku ni jambo la kawaida kwake, wasaidizi wake wawe tayari muda wote.
Jambo la mwisho ni kwamba Fadlu anasisitiza sana nidhamu ndani ya timu, bila kujali mchezaji anayehusika na kosa. Kwa mtazamo huo, ni muhimu viongozi wa Yanga kumpa nafasi na uhuru wa kutekeleza majukumu yake, huku wakihakikisha wachezaji wanaheshimu utaratibu na misingi ya nidhamu atakayoiweka.
Kwa kifupi, Yanga imempata kocha mwenye falsafa, misimamo na utaratibu wake wa kazi. Sasa ni jukumu la viongozi, wachezaji na mashabiki kuelewa falsafa hiyo, kuunga mkono kazi yake na kumpa muda wa kujenga timu yenye ushindani.
