Ricardo Momo afunguka Mondi, Zuchu kuongeza familia

BAADA ya Diamond Platnumz na mkewe, Zuchu, kutangaza kupata mtoto mnamo Agosti 2, mwaka huu, furaha ilitawala kwa mashabiki na watu wa karibu wa familia hiyo.

Katika mahojiano maalumu ya Dakika 5 na Mwanaspoti, kaka wa Diamond na meneja wa Wasafi, Mohamed Salum maarufu kama Ricardo Momo anazungumzia furaha ya familia, safari ya Diamond kwenye muziki, tasnia ya muziki nchini, maisha yake binafsi na hata mapenzi katika soka.

Mwanaspoti: Kwanza hongera kwa Diamond na Zuchu kuongeza familia. Umepokeaje habari hizo?

Ricardo Momo: Asante sana. Kila mtoto anayezaliwa ni furaha kwa wazazi na familia kwa ujumla. Tunamshukuru Mungu kwa hatua hii mpya katika maisha yao na tunawaombea afya njema pamoja na mtoto.

Mwanaspoti: Kama kaka wa Diamond, ulimshauri nini baada ya kupata mtoto?

Ricardo Momo: Nimemwambia aendelee kumuweka Mungu mbele, aendelee kuijali familia yake na kutimiza wajibu wake kama baba. Hicho ndicho muhimu zaidi.

Mwanaspoti: Diamond ni mtu wa aina gani akiwa nyumbani tofauti na anavyoonekana jukwaani?

Ricardo Momo: Nyumbani ni mtu wa kawaida kabisa. Anapenda familia, anapenda kucheka na ndugu zake na kuhakikisha kila mmoja anakuwa vizuri.

Mwanaspoti: Ujio wa mtoto huyu una maana gani kwa familia yenu?

Ricardo Momo: Ni furaha kuona familia inaendelea kukua. Tunamshukuru Mungu na tunaamini mtoto ataleta furaha zaidi kwa wazazi wake.

Mwanaspoti: Umekuwa karibu na Diamond tangu alipokuwa anaanza muziki. Ni jambo gani linakufanya ujivunie zaidi?

Ricardo Momo: Ni namna ambavyo hakukata tamaa. Alijituma sana mpaka kufikia hapa alipo leo.

Mwanaspoti: Familia yenu imekuwa ikizungumziwa sana kwenye mitandao ya kijamii. Mnalichukuliaje hilo?

Ricardo Momo: Hilo haliwezi kuepukika kwa sababu Diamond ni mtu maarufu. Lakini kuna mambo ambayo ni ya kifamilia na yanapaswa kubaki ndani ya familia.

Mwanaspoti: Wewe kama meneja unaionaje tasnia ya muziki wa Tanzania kwa sasa?

Ricardo Momo: Imekua sana. Wasanii wetu wanafanya vizuri ndani na nje ya nchi. Kinachobaki ni kuendelea kufanya kazi kwa weledi na kulinda hakimiliki.

Mwanaspoti: Ni changamoto gani bado unaiona kwenye tasnia?

Ricardo Momo: Wasanii wengi wana vipaji, lakini wanahitaji kuelewa kwamba muziki ni biashara. Nidhamu na mipango ni muhimu.

Mwanaspoti: Mbali na muziki, wewe ni shabiki wa timu gani? Watu wengi hudhani wewe ni Simba.

Ricardo Momo: (Anacheka) Hilo swali nalipata mara nyingi. Napenda sana mpira wa miguu na huwa nafuatilia ligi yetu, lakini watu wengi wananihusisha na Simba. Nawafurahisha tu kwa utani, ila kikubwa kwangu ni kuona soka la Tanzania linaendelea kukua.

Mwanaspoti: Diamond je, huwa mnapata nafasi ya kujadili mpira nyumbani?

Ricardo Momo: (Anacheka) Ndiyo, kama ilivyo kwenye familia nyingi. Tukikutana lazima mijadala ya mpira itokee. Lakini yote huwa ni ya utani na burudani.

Mwanaspoti: Kumekuwa na mazungumzo kuhusu maisha yako binafsi, ikiwemo suala la kuoa mke mwingine. Unasemaje?

Ricardo Momo: Maisha binafsi yanahitaji kuheshimiwa. Si kila jambo linalozungumzwa mitandaoni huwa ni la kujibu. Kikubwa ni kuhakikisha familia inaendelea kuwa na amani.

Mwanaspoti: Unawaombea nini Diamond na Zuchu baada ya kuanza hatua hii mpya?

Ricardo Momo: Nawatakia afya njema, upendo, busara katika malezi ya mtoto wao na Mungu aendelee kuwaongoza katika kila hatua.

Mwanaspoti: Mashabiki wa Diamond na Zuchu wana ujumbe gani kutoka kwako?

Ricardo Momo: Nawashukuru kwa upendo wanaouonyesha siku zote. Waendelee kuwaombea na kuwaunga mkono katika safari yao ya maisha na kazi.