Nandy, Billnass wafungua siri ya ‘911’

MSANII wa Bongo Fleva,  Faustina Charles Mfinanga ‘Nandy’, ameanza ukurasa mpya wa safari yake ya muziki baada ya kutangaza ujio wa albamu mpya inayokwenda kwa jina la ‘911’, ikiwa ni mradi unaokuja miaka minane tangu alipotoa albamu yake ya kwanza ‘The African Princess’, mwaka 2018.

Nandy alitangaza ujio wa kazi hiyo katika hafla maalumu iliyofanyika usiku wa kuamkia Novemba 2, 2026, jijini Dar es Salaam na alifunguka kuhusu safari ya maandalizi ya albamu hiyo iliyochukua takribani miaka miwili.

Kwa mujibu wa maelezo yake, amefanya kazi kubwa kuhakikisha anawapatia mashabiki wake muziki wenye ubora na ladha tofauti.

Katika hafla hiyo, Nandy alieleza safari ya albamu mpya imekuwa na changamoto mbalimbali, huku akionyesha kuwa sasa anataka kuanza ukurasa mwingine wa kisanii kupitia ‘911’.

Albamu yake ya kwanza, ‘The African Princess’, iliyotoka mwaka 2018 bado ni sehemu muhimu ya historia yake ya muziki na ilimpatia mashabiki nyimbo zilizovuma kama ‘Aibu’ na ‘Hazipo’.

‘911’ YABEBWA NA LADHA ZA KIMATAIFA

Tofauti na kazi zake zilizopita, ‘911’ imebeba ladha ya kimataifa baada ya Nandy kushirikisha wasanii kutoka mataifa sita ambayo ni Tanzania, Nigeria, Uganda, Ghana, Uingereza na Jamaica.

Albamu hiyo inatarajiwa kuwa na zaidi ya nyimbo 10, hatua inayoonyesha namna msanii huyo anavyotaka kupanua wigo wa muziki wake na kuwafikia mashabiki wa mataifa mbalimbali.

Akitoa ladha ya kile kilichomo ndani ya albamu hiyo, Nandy alipanda jukwaani na kutambulisha kwa mara ya kwanza wimbo wake mpya unaokwenda kwa jina la ‘Oya’.