Kombe jipya la Shirikisho Afrika si mchezo

SHIRIKISHO la Soka Afrika mapema jana lilizindua kombe jipya la michuano ya Kombe la Shirikisho Afrika kabla ya kupigwa kwa mechi ya pili ya fainali kati ya Simba na RS Berkane ambayo miamba hao wa Morocco walitwaa ubingwa wao wa tatu wa michuano hiyo ya pili kwa ukubwa.

Mechi hiyo ya marudiano iliyomalizika kwa sare ya bao 1-1 ilipigwa jioni ya jana kwenye Uwanja wa New Amaan Complex, uliopo mjini Unguja, visiwani Zanzibar na Berkane kutwaa taji hilo jipya kabisa baada ile ya awali kwao Morocco kushinda kwa mabao 2-0.

Rais wa CAF, Dk Patrice Motsepe ndiye aliyelizindua na kulitambulisha kombe hilo jipya ikiwa ni saa chache tangu alipozindua na kulitambulisha lile la Ligi ya Mabingwa Alhamisi ambalo linalowaniwa na Mamelodi Sundowns ya Afrika Kusini na Pyramids ya Misri zilizotoka sare ya 1-1 juzi jijini Pretoria, Afrika Kusini katika mechi ya kwanza ya fainali na zitarudiana Jumapili ijayo, jijini Cairo, Misri.

Hii inamaanisha kwamba bingwa wa msimu huu wa mataji hayo ya Afrika kwa ngazi za klabu wote wamebeba mapya. Makombe ya zamani kwa msimu uliopita yalitwaliwa na Al Ahly kwa Ligi ya Mabingwa Afrika na Zamalek kwa Kombe la Shirikisho ambazo zote zilitema mapema msimu huu.

Al Ahly ilitolewa nusu fainali na Mamelodi kwa jumla ya bao 1-0, kama ilivyokuwa kwa Zamalek ambao walitemeshwa hatua ya robo fainali na Stellenbosch pia ya Afrika Kusini.

Kombe jipya lililotambulishwa jana Zanzibar kisha kubebwa na bingwa mpya, limetajwa kuwa na mvuto wa kipekee kulinganisha na lile la zamani na hapa chini ni tofauti ya kombe hilo jipya kulinganisha na lile la zamani.

Muundo wa kombe hilo ni mpya na wenye kuvutia zaidi kuendana na historia na utajiri kwa hadhi ya mashindano hayo ya pili kwa ukubwa kwa ngazi za klabu barani Afrika.

Kombe hilo lina mseto wa rangi ya fedha na dhahabu sambamba na matte (mwale wa umeme) wa dhababu sambamba na ramani ya Afrika iliyochorwa pia kwa dhahabu inayong'ara.

Mwale wa umeme hiyo ya dhahabu ni kuonyesha nguvu na ushindani wa mashindano haya na msingi wa kombe umeundwa kwa marumaru na una mwonekano wa kupigwa nyundo, ukiwakilisha mila na heshima, na umeandikwa jina la mashindano pamoja na washindi wa zamani.

Kombe hili lina urefu wa sentimita 45 na uzito wa kilo 8-10.

Kombe hili jipya limeundwa kwa mchanganyiko wa uzuri wa kisasa na heshima ya kihistoria ya mashindano ya CAF. Hili ndilo linaloliweka mashindano haya katika hadhi ya juu kimataifa:

TOFAUTI ILIVYO

1. Muundo wa Kombe (Design)

La zamani: Lilikuwa na muundo wa kawaida, usio na vipengele vya kina vya sanaa au ramani ya bara la Afrika. Halikuwa na uwasilishaji mkubwa wa utambulisho wa bara.

Jipya: Limebuniwa kwa ustadi mkubwa wa kisasa – lina mpira wa dhahabu wa matte juu ukiwa na ramani ya Afrika, likiwa na mikono miwili ya dhahabu inauinua. Hii inaashiria umoja na fahari ya bara.

2. Ujumbe na Falsafa

La zamani: Halikuwa na falsafa ya kina iliyobeba maadili au malengo ya CAF kama ilivyo sasa.

Jipya: Limebeba falsafa ya matumaini, imoja, na ubora wa soka la Afrika. Limekusudiwa kuonyesha nguvu, ushindani na hadhi ya mashindano ya klabu Afrika.

3. Nyenzo zilizotumika (Materials)

La zamani: Lilitengenezwa kwa chuma cha kawaida bila vipengele vya kuvutia vya kisanii.

Jipya: Limetengenezwa kwa mchanganyiko wa fedha inayong'aa, dhahabu ya matte, na msingi wa marumaru yenye muundo wa kupigwa nyundo – kuwakilisha mila, historia, na hadhi ya mashindano.

4. Ukubwa na Uzito

La zamani: Halikujulikana sana kwa vipimo vyake rasmi, wala halikuwa maarufu kwa uzito au ukubwa wa kuvutia.

Jipya: Lina urefu wa sentimita 45, uzito wa kilo 8–10 – linalenga kuonekana kuwa ni taji la kifahari la bara.

5. Hisia na Utambulisho wa Afrika

La zamani: Halikuwa linaonyesha wazi utambulisho wa Kiafrika.

Jipya: Lenye ramani ya Afrika kwa dhahabu, limeundwa ili kuhamasisha fahari ya Afrika kila mshindi anabeba bara zima.

6. Thamani yake

La zamani: Halijawahi kutajwa kokote na CAF thamani halisi ya taji hilo la Shirikisho Afrika, lakini inatajwa inaweza kuwa ya chini zaidi kulinganisha na la sasa kifedha.

Jipya: Haijatangazwa wazi na CAF, lakini kwa mujibu wa vyanzo mbaliambali vya mtandaoni na akili mnemba ni kwamba huenda likawa kati ya Dola 25,000-70,000 (zaidi ya Sh 65-180 milioni kulingana na viwango vya soko na ubunifu).

Hata hivyo, ni kwamba thamani hii ni nyenzo tu – thamani halisi ya kihistoria, kiutamaduni, na kiibada kwa timu na bara ni kubwa zaidi.

Hata kombe la bei ya chini linaweza kuwa na uzito mkubwa wa kiheshima kuliko thamani ya fedha.

Ikumbukwe pia CAF haijatangaza iwapo kombe hilo jipya lina dhahabu/fedha halisi au ni plated (kupakwa) jambo hilo linaweza kupunguza au kuongeza thamani ya kombe hilo.