Jumapili ni Liverpool, Arsenal pekee

LONDON, ENGLAND: MZUNGUKO wa Ligi Kuu England wa wikendi hii utakuwa tofauti na ilivyozoeleka, baada ya kukosekana kwa mchezo wa saa 1:00 usiku  Jumapili, kutokana na Aston Villa kuhusika katika mashindano ya Ligi ya Mabingwa Ulaya.

Kwa kawaida, muda huo hutumika kwa angalau mchezo mmoja wa Jumapili katika ratiba ya Ligi Kuu England. Hata hivyo, wikendi hii hakutakuwa na mchezo wowote katika muda huo, huku Liverpool ikitarajiwa kukutana na Arsenal saa 12:30 jioni kwa saa za Tanzania, ikiwa ndiyo mechi pekee ya Jumapili.

Mabadiliko hayo yametokana na Aston Villa kupangiwa kucheza na Barcelona katika Ligi ya Mabingwa Ulaya Jumanne, Novemba 3. Kutokana na mchezo huo, pambano lake dhidi ya Fulham lililokuwa limepangwa kuchezwa Jumapili, limehamishiwa na sasa litapigwa Jumamosi saa 11:00 jioni kwa saa za Tanzania.

Mchezo huo utachezwa Uwanja wa Villa Park na utarushwa moja kwa moja na kituo cha televisheni cha Sky Sports, ambacho awali kilikuwa kimepanga kuonyesha pambano hilo katika muda wake wa kwanza.

Kwa kawaida, timu zinazoshiriki mashindano ya Ulaya hupendelea kupata angalau siku mbili kamili za kupumzika kati ya michezo, jambo linalochangia mabadiliko ya ratiba za ligi za ndani.

Wikendi iliyopita, michezo minne ilichezwa mapema Jumapili, huku mechi mbili pekee zikipigwa katika muda wa kawaida wa saa 3:00 usiku Jumamosi.

Tofauti na hapo, wikendi hii kutakuwa na michezo mitano itakayoanza saa 6:00 mchana Jumamosi na mmoja tu Jumapili, Liverpool dhidi ya Arsenal.

Ratiba ya Jumamosi pia itakuwa na michezo itakayoanza saa 3:30 asubuhi, saa 8:30 usiku na saa 11:00 jioni, huku mchezo mwingine ukipigwa Jumatatu saa 11:00 jioni.