Barcola aitingisha Paris Saint-Germain

MABADILIKO makubwa yanaonekana kumsubiri winga wa Paris Saint-Germain, Bradley Barcola, baada ya taarifa kueleza kuwa amesitisha rasmi mazungumzo ya kuongeza mkataba mpya na mabingwa hao wa Ufaransa.

Barcola, mwenye umri wa miaka 23, amekuwa akihusishwa na tetesi za kuondoka PSG kutokana na kutoridhishwa na nafasi yake ndani ya kikosi cha kocha Luis Enrique. Mkataba wake wa sasa umebakiza miaka miwili, hali iliyozidi kuchochea uvumi wa kuondoka kwake.

Kwa mujibu wa gazeti la L’Equipe, uamuzi wa kusitisha mazungumzo umefungua rasmi pazia la vita vya usajili, huku Liverpool ikionekana kuwa mbele katika mbio za kuwania saini yake.

Ripoti zinaeleza kuwa Arsenal pia inaendelea kumfuatilia Barcola, lakini Liverpool ndiyo yenye nafasi nzuri zaidi kwa sasa kumshawishi nyota huyo kutua Anfield.

Inaelezwa kuwa mradi wa kisoka wa Liverpool chini ya kocha mpya Andoni Iraola umemvutia Barcola, ambaye anadaiwa kuweka kipaumbele cha kuhamia kwenye klabu hiyo.

Hata hivyo, bado haijafahamika kama PSG itakubali kumuuza katika dirisha hili la usajili, huku maamuzi yakitegemea mwenendo wa soko na mipango ya klabu hiyo inayomwania nyota wa RB Leipzig, Yan Diomande.

Mbali na Liverpool na Arsenal, vigogo wengine waliotajwa kumfuatilia Barcola ni Bayern Munich na Chelsea. Hata hivyo, taarifa zinaeleza kuwa mchezaji huyo tayari amekataa uwezekano wa kujiunga na Chelsea.

Vinicius JR

REAL Madrid imeweka dau la euro milioni 160 (pauni milioni 137) kwa mshambuliaji wake Vinicius Jr iwapo itapokea ofa ya kumuuza msimu huu. Hata hivyo, Arsenal haijawasilisha ofa rasmi hadi sasa, huku mabingwa hao wa Hispania wakisisitiza hawatamruhusu nyota huyo wa Brazil kuondoka kwa ada yoyote iliyo chini ya kiwango walichoweka katika dirisha hili la usajili.

Bruno Guimaraes

BRUNO Guimaraes amewaeleza mawakala wake kuwa anataka mustakabali wake ujulikane ndani ya wiki moja kabla ya kurejea kambini kwa maandalizi ya msimu mpya na Newcastle United. Arsenal inaendelea kufuatilia hali yake kwa karibu, lakini Newcastle bado haijaonyesha dalili za kuwa tayari kuanza mazungumzo ya kumuachia kiungo huyo muhimu wa Brazil.

Sávio Moreira Savinho

TOTTENHAM Hotspur inaonekana kuwa mbele katika mbio za kumsajili winga wa Brazil, Savinho (22), kutoka Manchester City. Mazungumzo kati ya pande hizo yanaendelea vizuri, huku Spurs ikiamini inaweza kukamilisha usajili huo kabla ya kuanza kwa msimu mpya wa Ligi Kuu England na kuwashinda klabu nyingine zinazovutiwa na huduma za mchezaji huyo.

Yan Diomande

REAL Madrid imefikia makubaliano ya awali ya maslahi binafsi na winga wa Ivory Coast mwenye umri wa miaka 19, Yan Diomande, anayekipiga RB Leipzig. Sasa mabingwa hao wa Hispania wanajiandaa kuanza mazungumzo rasmi kuhusu ada ya uhamisho, wakiamini nyota huyo chipukizi anaweza kuwa sehemu muhimu ya kikosi chao kwa miaka mingi ijayo.

Iliman Ndiaye

AL-HILAL ya Saudi Arabia imeanza mazungumzo ya kumsajili winga wa Senegal, Iliman Ndiaye (26), kutoka Everton. Klabu hiyo ina matumaini ya kumshawishi mchezaji huyo kwa ofa nono, huku Everton ikisubiri kuona kama dau litakalowasilishwa litafikia kiwango wanachokitaka kabla ya kuridhia uhamisho huo katika dirisha hili la usajili.

Pedro Neto

CHELSEA haitakuwa tayari kumuuza kirahisi winga wake Pedro Neto (26), huku ikitarajia kupata ada kubwa kutokana na maslahi yanayoonyeshwa na Liverpool, Manchester City na klabu kutoka Saudi Arabia. Mabosi wa Stamford Bridge wanaamini nyota huyo bado ana nafasi kubwa ya kuwa tegemeo muhimu katika mipango ya kocha kwa msimu ujao.

Mohamed Salah

BESIKTAS bado inasubiri uamuzi wa mshambuliaji wa Misri, Mohamed Salah (34), baada ya kuwasilisha ofa yake ya mwisho. Salah kwa sasa ni mchezaji huru baada ya kuondoka Liverpool, huku akitafakari kwa makini hatua yake inayofuata kabla ya kuamua klabu atakayochezea katika msimu mpya wa mashindano.

Junior Kroupi

BOURNEMOUTH haina mpango wa kumuuza mshambuliaji wake wa Kifaransa mwenye umri wa miaka 20, Junior Kroupi, licha ya kuvutiwa naye na Barcelona. Klabu hiyo ya England inaamini mshambuliaji huyo ni sehemu muhimu ya mipango yake ya muda mrefu na haitakuwa tayari kusikiliza ofa yoyote kirahisi katika dirisha hili.

Franco Mastantuono

FULHAM ndiyo chaguo linalopewa nafasi kubwa la kumpokea kwa mkopo kiungo chipukizi wa Argentina, Franco Mastantuono (18), iwapo Real Madrid itaamua kumtoa kwa mkopo msimu ujao. Klabu hiyo inaamini hatua hiyo itampa nafasi ya kupata uzoefu zaidi, kuzoea ushindani wa Ligi Kuu England na kuendelea kukuza kiwango chake.