Hello

Your subscription is almost coming to an end. Don’t miss out on the great content on Nation.Africa

Ready to continue your informative journey with us?

Hello

Your premium access has ended, but the best of Nation.Africa is still within reach. Renew now to unlock exclusive stories and in-depth features.

Reclaim your full access. Click below to renew.

Alonso kwenye presha ya makipa

ALONSO Pict

Muktasari:

  • Kwa mujibu wa kura iliyopigwa na gazeti la Daily Mail Sport na kushirikisha karibu mashabiki 2,000 wa Chelsea, asilimia 57.9 walipendelea Penders aendelee kuwa kipa namba moja badala ya Martinez.

LONDON, ENGLAND: KOCHA wa Chelsea, Xabi Alonso, anakabiliwa na uamuzi mgumu kuhusu nani atakuwa chaguo lake la kwanza katika lango la timu hiyo kuelekea mchezo wa Ligi Kuu England dhidi ya Leeds United utakaochezwa Jumamosi.

Uamuzi huo unamhusu kipa chipukizi Mike Penders na kipa mwenye uzoefu Emiliano Martinez, ambaye amejiunga na Chelsea akitokea Aston Villa.

Kwa mujibu wa kura iliyopigwa na gazeti la Daily Mail Sport na kushirikisha karibu mashabiki 2,000 wa Chelsea, asilimia 57.9 walipendelea Penders aendelee kuwa kipa namba moja badala ya Martinez.

Penders ana umri wa miaka 21, raia wa Ubelgiji na bado hajapata nafasi ya kucheza katika timu ya taifa ya nchi yake.

ALO 03

Kwa upande mwingine, Martinez ana umri wa miaka 34, ni raia wa Argentina na alikuwa sehemu ya kikosi kilichotwaa Kombe la Dunia mwaka 2022. Pia ana uzoefu wa kucheza mechi 234 katika Ligi Kuu England.

Alonso alishawahi kueleza umuhimu wa uzoefu kwa makipa wakati wa ziara ya maandalizi ya msimu mpya ya Chelsea.

Wakati huo, alikuwa akilinganisha uwezo wa Penders na Robert Sanchez.

Kocha huyo alisifu kipaji cha Penders, lakini akasisitiza kuwa uzoefu ni jambo muhimu katika nafasi ya golikipa.

Amesema kuwa kuwa na uhakika katika lango ni jambo linaloweza kuipa timu utulivu.

Sanchez alipewa nafasi ya kuanza katika mchezo wa kwanza wa Chelsea wa msimu dhidi ya Fulham, lakini alifanya makosa kadhaa yaliyomfanya kocha huyo kupoteza imani naye.

ALO 01

Baadaye alipelekwa kwa mkopo Como ya Italia, ambako amekuwa akishindania nafasi ya kucheza na Jean Butez chini ya kocha Cesc Fabregas.

Martinez arejea

Martinez alijiunga na Chelsea akitokea Aston Villa kwa ada ya pauni 7.5 milioni, huku akielezwa kuwa ndiye aliyekuwa akitarajiwa kuwa kipa wa kwanza wa klabu hiyo.

Kwa sasa amerudi katika hali ya kucheza baada ya kupona jeraha la taya alilolipata katika mchezo dhidi ya Everton.

Jeraha hilo lilimlazimu kufanyiwa upasuaji mwezi mmoja uliopita, lakini tayari ameanza kucheza tena bila kutumia barakoa ya kujikinga.

Alionekana akiwa na timu ya taifa ya Argentina katika mchezo wa kirafiki dhidi ya Costa Rica, ambao Argentina ilishinda mabao 7-0 Jumanne usiku.

Baada ya mchezo huo, alirejea London kujiunga tena na Chelsea, huku kukiwa na matarajio ya kuwa anaweza kucheza dhidi ya Leeds.

ALO 02

Hata hivyo, uamuzi wa mwisho utakuwa wa Alonso kwa kushirikiana na mkuu wa makipa Ben Roberts pamoja na kocha msaidizi wa makipa James Russell.

Taarifa kutoka ndani ya klabu zinaeleza kuwa kuna uwezekano Martinez akarejea moja kwa moja kwenye kikosi cha kwanza kutokana na uzoefu wake na uwezo wake wa kuongoza safu ya ulinzi.

Martinez anajulikana kuwa mchezaji mwenye ushawishi mkubwa ndani ya kikosi, hivyo kumpa nafasi ya benchi kunaweza kuibua changamoto katika usimamizi wa wachezaji.

Penders naye ana hoja

Pamoja na uzoefu wa Martinez, Penders amekuwa akionyesha kiwango kizuri tangu alipopewa nafasi ya kucheza.

Katika mchezo wake wa kwanza wa Ligi Kuu akiwa Chelsea dhidi ya Tottenham Hotspur, alifanya kosa la kuupiga mpira na kuujaza mwenyewe langoni, katika kipigo cha mabao 2-0.

Hata hivyo, hakukata tamaa na baadaye alionyesha uwezo mkubwa katika michezo dhidi ya Liverpool kwenye Kombe la Carabao, Manchester United na Sunderland katika Ligi Kuu.

Alitunukiwa tuzo ya kuokoa mpira bora wa mwezi Oktoba baada ya kuzuia shuti la Bryan Mbeumo katika Uwanja wa Stamford Bridge.

Penders anaonekana kuwa na kipaji kikubwa na Chelsea inaweza kuona ni muhimu kuendelea kumpa nafasi ili kuongeza uzoefu wake.

Baada ya mchezo dhidi ya Leeds, Chelsea inakabiliwa na ratiba ngumu itakayowakutanisha na Nottingham Forest, Crystal Palace, Liverpool na Manchester City kuelekea mwezi Desemba.

Hivyo, Alonso anatakiwa kufanya uamuzi utakaozingatia uzoefu, kiwango cha sasa na mipango ya muda mrefu ya klabu.