Waziri Pembe aongeza morali Zanzibar Spice Boys
Muktasari:
- Katika hafla hiyo, Waziri huyo, amekabidhi Sh500,000 kwa kila mchezaji wa timu hiyo kuwasaidia katika safari yao huku akiwaombea safari njema yenye mafanikio na kuwataka kuitangaza vyema Zanzibar.
WAZIRI wa Habari, Sanaa, Utamaduni na Michezo Zanzibar, Riziki Pembe Juma, amewapongeza wazazi wa wachezaji chipukizi wa timu ya Zanzibar Spice Boys kwa kuwaunga mkono kushiriki fursa ya mashindano ya PQ Cup Brazil 2026.
Waziri huyo ameyasema hayo Septemba 30, 2026 katika hafla ya kuwaaga vijana hao iliyofanyika Ukumbi wa Hoteli ya New Amaan Complex, Unguja.
Amepongeza hatua ya wazazi kujitokeza kuwaunga mkono watoto wao kwani safari hiyo itawapa vijana uzoefu, kujiamini na kuwajengea uwezo wa kushiriki michuano ya kimataifa.
“Twendeni tukachangamkie fursa na kuzitafuta nyingine ili tutakaporejea tuwe na kitu cha kuleta ushirikiano na kufungua milango yetu,” amesema.
Pia amewataka wadau mbalimbali kujitokeza kuwaunga mkono vijana hao waliopata fursa ya kuiwakilisha Zanzibar na Tanzania nchini Brazil, ili kuwapa moyo na ari ya kufanya vizuri katika mashindano hayo.
Katika hafla hiyo, Waziri huyo, amekabidhi Sh500,000 kwa kila mchezaji wa timu hiyo kuwasaidia katika safari yao huku akiwaombea safari njema yenye mafanikio na kuwataka kuitangaza vyema Zanzibar.
