TFF kuvuna Sh2.4 bilioni CAF
Muktasari:
- Hatua hiyo imetangazwa na Rais wa CAF, Patrice Motsepe, ikiwa ni sehemu ya mkakati wa kuongeza uwezo wa kifedha wa vyama wanachama na kuviwezesha kuwekeza zaidi katika maendeleo ya soka.
SHIRIKISHO la Soka Tanzania (TFF) linatarajia kunufaika na ongezeko la mgao wa mwaka kutoka Shirikisho la Soka Afrika (CAF), baada ya kiwango cha fedha kinachotolewa kwa vyama wanachama kupandishwa hadi Dola 700,000, sawa na takribani Sh2.4 bilioni.
Hatua hiyo imetangazwa na Rais wa CAF, Patrice Motsepe, ikiwa ni sehemu ya mkakati wa kuongeza uwezo wa kifedha wa vyama wanachama na kuviwezesha kuwekeza zaidi katika maendeleo ya soka.
Kwa mujibu wa taarifa hiyo, mgao wa mwaka kwa kila chama mwanachama umeongezeka kwa asilimia 33 kutoka Dola 525,000 hadi Dola 700,000.
TFF ni miongoni mwa vyama 54 vinavyotambuliwa na CAF, hivyo ongezeko hilo linaweza kuongeza nafasi ya kuimarisha programu mbalimbali za maendeleo ya soka nchini, kutegemea vipaumbele vya shirikisho hilo na masharti ya matumizi ya fedha hizo.
Fedha hizo zinalenga kusaidia maendeleo ya soka la vijana na wanawake, kuboresha utawala na usimamizi wa vyama, pamoja na kuendeleza programu zinazowapa fursa wachezaji, makocha na waamuzi.
Kwa Tanzania, mgao huo unaweza kusaidia kuimarisha mashindano ya vijana na wanawake, mafunzo ya makocha na waamuzi pamoja na shughuli nyingine zinazolenga kukuza mchezo huo.
CAF imeeleza kuwa tangu mwaka 2021, ilipoanza kutoa Dola 200,000 kwa kila chama mwanachama kwa mwaka, mgao huo umeendelea kuongezeka hatua kwa hatua hadi kufikia Dola 400,000, kisha Dola 525,000 na sasa Dola 700,000.
Kwa kuzingatia viwango hivyo, mgao wa sasa umeongezeka kwa Dola 500,000 ikilinganishwa na mwaka 2021, sawa na ongezeko la asilimia 250.
Mbali na vyama wanachama, CAF pia imeongeza mgao wa mwaka kwa vyama vya kanda kutoka Dola 750,000 hadi Dola 900,000, ikiwa ni ongezeko la Dola 150,000, sawa na asilimia 20.
Chama cha Klabu za Soka Afrika (ACA) nacho kitanufaika na ongezeko la mgao wake wa mwaka kutoka Dola 400,000 hadi Dola 500,000.
Hatua hizo ni sehemu ya juhudi za CAF kuimarisha uwezo wa kifedha wa taasisi za soka barani Afrika ili ziweze kutekeleza majukumu yake kwa ufanisi na kuendeleza mchezo huo kwa misingi endelevu.
Motsepe amesisitiza umuhimu wa kuwekeza katika maendeleo ya soka barani Afrika, huku ongezeko la mgao likilenga kuzipa taasisi hizo uwezo zaidi wa kutekeleza mipango yao ya maendeleo.
