Tanzanite Queens macho yote kwa Canada
Muktasari:
- Tanzania italazimika kuwania pointi tatu dhidi ya Canada baada ya kupoteza mechi ya pili mfululizo kwenye kundi hilo dhidi ya England kwa mabao 5-1 na ile ya kwanza iliyopoteza mabao 4-1 dhidi ya Brazil.
BAADA ya kupoteza mechi mbili za kundi B katika fainali za Kombe la Dunia chini ya umri wa miaka 20, timu ya Taifa ya Tanzania (Tanzanite Queens) sasa inaelekeza macho yote kwenye mechi ya mwisho dhidi ya Canada itakayopigwa keshokutwa, Septemba 11, kuanzia saa 12 jioni.
Tanzania italazimika kuwania pointi tatu dhidi ya Canada baada ya kupoteza mechi ya pili mfululizo kwenye kundi hilo dhidi ya England kwa mabao 5-1 na ile ya kwanza iliyopoteza mabao 4-1 dhidi ya Brazil.
Mabao ya leo yalifungwa na Rachel Maltby aliyeweka hat-trick, na mengine yakifungwa na
Princess Ademiluyi na Jessie Gale huku lile la Tanzania likifungwa na mshambuliaji Jamila Rajabu baada ya juhudi binafsi za mlinzi wa pembeni, Diana Mnally kuukokota mpira kutoka chini.
Kwenye kundi hilo ni Tanzanite pekee ndio haijakusanya pointi Brazil imekusanya pointi sita, England ikiwa nafasi ya pili na pointi nne na Canada yenye moja. Sasa matumaini ya Tanzania yapo kwenye mchezo wa mwisho dhidi ya Canada ambao unaonekana kuwa na uzito mkubwa katika matumaini ya kusonga mbele.
Baada ya kuanza mashindano kwa kipigo cha mabao 4-1 dhidi ya Brazil, Tanzanite Queens ilihitaji kujikusanyia pointi katika michezo iliyofuata ili kuongeza nafasi zake za kufuzu hatua ya 16 bora. Mfumo wa mashindano unaipa nafasi pia baadhi ya timu zitakazomaliza nafasi ya tatu, hivyo kila pointi na tofauti ya mabao inaweza kuwa na thamani kubwa katika hesabu za mwisho za kundi.
England nayo iliingia katika mchezo huo ikiwa na pointi moja baada ya kulazimisha sare ya bao 1-1 dhidi ya Canada katika mchezo wa kwanza. Rachel Maltby aliiokoa England kwa mkwaju wa penalti dakika za mwisho baada ya Canada kuongoza kupitia Annabelle Chukwu, matokeo yaliyofanya timu hizo zigawane pointi.
Kwa kifupi, safari ya Tanzanite Queens Poland bado haijaisha, lakini hesabu zake zinahitaji ushindi. Pointi tatu dhidi ya Canada ndizo zinazoiweka Tanzania kwenye matumaini ya kuandika historia kwa kufuzu hatua ya 16 bora katika ushiriki wake wa kwanza wa Kombe la Dunia la Wanawake U-20.
