Huruma siyo malezi! Yanga yawabamiza Wamadagascar Chamazi

MABINGWA wa Ligi Kuu NBC, Yanga ikiwa katika kiwango cha juu, leo ilitumia msemo wa huruma siyo malezi baada ya kuibuka na ushindi mnono wa mabao 4-0 dhidi ya CFFA ya Madagascar katika mchezo wa Ligi ya Mabingwa Afrika uliopigwa kwenye Uwanja wa Azam Complex.

Huo ulikuwa mchezo wa kwanza wa raundi ya pili ya awali, ambapo mshindi wa jumla katika michezo yote miwili ambayo itapigwa kwenye uwanja huo atafuzu hatua ya makundi ya mashindano hayo.

Baada ya kupoteza mchezo uliopita wa Ligi Kuu dhidi ya Simba, Yanga ilionekana kurejea katika ubora wake katika mchezo huo, ingawa ilikosa nafasi nne za wazi za kufunga ndani ya dakika 20 za mwanzo.

Katika mchezo huo, ambao Yanga ilicheza bila kipa wake namba moja, Djigui Diarra kutokana na majeraha, Cheikh Toure alikuwa wa kwanza kuifungia timu yake bao katika dakika ya 39, huku mashabiki wakionekana kuwa wachache uwanjani.

Toure, ambaye awali alikosa nafasi kadhaa za kufunga, alitumia vizuri kosa la kipa wa CFFA, aliyedaka mpira ukamponyoka, na kufunga kirahisi.

Kuonyesha kuwa walipania kupata ushindi mnono, Yanga ilifunga mabao matatu ndani ya dakika 15 za kipindi cha pili. Albert Kangwanda alifunga bao la pili dakika ya 47, Mudathir Yahya akaongeza la tatu dakika ya 54, kabla ya Maxi Nzengeli kufunga bao la nne dakika ya 59 baada ya kuonyesha kiwango kizuri kwenye mchezo huu.

Mbali na Maxi mchezaji mwingine aliyeonyesha kiwango bora alikuwa Kangwanda, ambaye aliisumbua safu ya ulinzi ya CFFA na kuifanya iwe katika wakati mgumu kwa muda mwingi wa mchezo.

MABADILIKO YA MANQOBA

Licha ya Yanga kuwa mbele kwa mabao 4-0, benchi la ufundi chini ya kocha Manqoba Mngithi lililazimika kufanya mabadiliko kutokana na hali ya baadhi ya wachezaji wake.

Dakika ya 45, beki wa kulia Yao Attohoula alitolewa baada ya kuonekana kuwa na maumivu, nafasi yake ikichukuliwa na kinda Ibrahim Kazimoto, likionekana kuwa pigo lingine kwa Yanga.

Dakika ya 65, Mngithi ambaye alikuwa kwenye presha kubwa baada ya kupoteza mchezo wa Dabi alifanya mabadiliko mengine mawili, akimtoa Toure na kumwingiza Stephen Aziz Ki. Pia, Peter Shalulile alitolewa na nafasi yake kuchukuliwa na Selemani Mwalimu.

Hata hivyo, kuingia kwa wachezaji hao kulionekana kupunguza makali ya safu ya ushambuliaji ya Yanga, huku CFFA ikipata uhuru zaidi wa kumiliki mpira kwa muda mrefu.

Dakika ya 78, Yanga ilipata pigo lingine baada ya Kangwanda kutolewa kwa machela kutokana na kushindwa kuendelea na mchezo. Nafasi yake ilichukuliwa na Juma Abushiri, maarufu kama Chuga.

Yanga sasa ina nafasi kubwa ya kufuzu kwa hatua ya makundi ya Ligi ya Mabingwa Afrika, itakapokutana tena na CFFA katika mchezo wa marudiano Oktoba 21, 2026.

Iwapo itafanikiwa kufuzu, Yanga itaweka rekodi ya kucheza hatua ya makundi ya michuano hiyo kwa mara ya nne mfululizo.