Safari ya Como yenye picha kibao ndani yake

COMO, ITALIA: UWANJA wa Stadio Giuseppe Sinigaglia, Italia ulikuwa ukiandaa mechi za Ligi Daraja la Nne (Serie D). Lakini, Jumatano wiki hii, uliandaa mchezo dhidi ya Manchester United katika Ligi ya Mabingwa Ulaya. Huo umekuwa mpando wa haraka kwa Como walioichapa Man United mabao 4-0 wiki hii kwenye mashindano hayo.

San Siro, Delle Alpi, Olimpico na Artemio Franchi; Manchester United imewahi kucheza katika baadhi ya viwanja maarufu zaidi nchini Italia kwa miaka mingi ilipokuwa ikishiriki mashindano ya Ulaya. Jumatano, iliongeza uwanja mwingine katika orodha hiyo.

MANDHARI BORA

Kwa watu wasiofahamu vizuri soka la Italia, Stadio Giuseppe Sinigaglia huenda usiwe miongoni mwa majina ya viwanja yanayotambulika kwa urahisi. Hata hivyo, uwanja huo wa nyumbani wa Como una mvuto na upekee wa aina yake, ambao angalau uliwaacha na kumbukumbu mashabiki wa United waliosafiri kwenda huko. Ukiwa karibu kabisa na Ziwa Como lenye mandhari ya kuvutia, huku Milima ya Alps ya Italia ikitoa mandhari ya kuvutia nyuma yake, inakuwa vigumu kupata maeneo mengi ya soka yenye mandhari nzuri zaidi katika ligi tano bora za Ulaya.

Ingawa uwanja huo unaendelea kufanyiwa maboresho, sehemu ya kazi hizo ilikamilishwa kwa haraka msimu huu ili kukidhi matakwa ya Shirikisho la Soka Ulaya (UEFA), kwa sasa bado una sehemu za karibu na mashabiki, mwonekano wa kawaida usio na mapambo mengi na hauna majivuno. Uwezo wake wa kuingiza watazamaji bado ni 13,602.

Mwonekano na ukubwa wa kawaida wa uwanja huo huenda usilingane na malengo ya muda mrefu ya klabu hiyo. Hata hivyo, hali hiyo pia inaonyesha kasi ya kupaa kwa Como, ambayo ilitoka nafasi ya chini ya 3,500 katika viwango miaka saba iliyopita hadi 29 kufikia Jumatano.

Ni muhimu kuweka wazi tangu mwanzo kwamba kupaa kwa Como siyo hadithi ya mafanikio ya ghafla inayotokana tu na usajili bora, ufundishaji mzuri na kujenga timu hatua kwa hatua. Klabu hiyo ilinunuliwa 2019 na Djarum Group, kampuni tanzu ya PT Djarum, mojawapo ya kampuni kubwa zaidi za utengenezaji wa sigara duniani. Ingawa ilianza msimu wa 2019/20 katika daraja la tatu, ununuzi huo uliifanya ghafla kuwa na wamiliki matajiri zaidi katika soka la Italia. Ikiwa wamiliki hao walikuwa na dhamira ya kweli ya kubadili mafanikio ya klabu uwanjani, basi ilikuwa ni suala la muda tu kabla Como haijarejea Serie A.

Muda mfupi baada ya ununuzi huo, Como ilipanda kutoka Serie D hadi Serie C, ambako ilitumia misimu miwili kabla ya kurejea Serie B. Klabu hiyo ilikuwa imeshiriki Serie B kwa msimu mmoja tu tangu mtangulizi wake wa kisheria alipofutwa 2005.

NAHODHA CHELSEA ANA MCHANGO

Nahodha wa zamani wa Chelsea, Dennis Wise, alikuwa na nafasi muhimu katika hatua za mwanzo za umiliki wa Djarum. Alianza kama mshauri, kabla ya kuchukua nafasi ya mtendaji mkuu na baadaye kuwa rais wa klabu, aliliambia gazeti la The Guardian la Uingereza mapema mwaka huu.

“Nilichukua udhibiti kamili wa klabu ya soka, kuanzia juu hadi chini, nikiajiri kila mtu aliyekuwa akifanya kazi ndani ya jengo hilo,” aliongeza.

“Wakati huo hakukuwa na watu wengi waliokuwa wakifuatilia mambo yetu kwa karibu kutoka mbali, na wamiliki waliniachia nifanye mambo yangu kwa kiasi kikubwa.

“Sikuwa na fedha nyingi za kutumia katika usajili, hivyo nililazimika kutafuta mikataba mizuri. Wakati mmoja tulikuwa na wachezaji 14 wa mkopo. Ilikuwa ni suala la kuingiza na kutoa wachezaji, kwa sababu hakukuwa na fedha za kutumia. Kisha, ghafla, mambo yakaanza kuwa bora.”

Como kurejea Serie B mwaka 2021 kulikuwa muhimu katika kuvutia watu wengi zaidi, kama Wise alivyodokeza. Muda mfupi baadaye, hakuwa tena mtu pekee maarufu kutoka Ligi Kuu England aliyehusika katika klabu hiyo.

Kabla ya msimu wa 2022/23, kiungo wa zamani wa Barcelona, Arsenal, Chelsea na timu ya taifa ya Hispania, Cesc Fabregas, alijiunga na Como kama mchezaji na pia akawa mmoja wa wawekezaji wenye hisa chache katika klabu hiyo. Thierry Henry, aliyekuwa mchezaji mwenzake Fabregas Arsenal, naye aliwekeza muda mfupi baadaye.

Ingawa Fabregas aliichezea Como kwa msimu mmoja tu kabla ya kustaafu mwishoni mwa 2022/23, alibaki katika klabu hiyo, akianza kwa kufundisha timu za vijana na timu ya akiba kwa miezi michache. Baadaye, alipandishwa haraka na kupewa jukumu la ukocha wa timu ya kwanza kwa muda kabla ya mwaka huo kumalizika.

Kutokuwa na leseni ya ukocha ya UEFA Pro kulimaanisha kuwa Fabregas aliruhusiwa kushika nafasi ya kocha mkuu kwa mwezi mmoja tu, na hata hilo lilihitaji ruhusa ya kipekee. Baada ya muda huo kwisha, alitangazwa rasmi kuwa msaidizi wa Osian Roberts, ingawa kiuhalisia bado ndiye aliyekuwa akiiongoza timu.

Ilikuwa hadi majira ya kiangazi 2024, baada ya Shirikisho la Soka la Italia (FIGC) kumkubali kujiunga na kozi ya UEFA Pro, ndipo Fabregas alipothibitishwa rasmi kuwa kocha mkuu wa Como.

Hata hivyo, kufikia wakati huo, yeye na Roberts walikuwa tayari wameiongoza timu kupanda tena Serie A baada ya kumaliza katika nafasi ya pili. Hilo lilihitimisha miaka 21 ya klabu hiyo bila kushiriki ligi kuu na kuthibitisha kuwa uamuzi wa kujaribu kumpa Fabregas nafasi ya ukocha ulikuwa na msingi. Kama ilivyotarajiwa kwa kiasi kikubwa, klabu hiyo imeendelea kufanya vizuri zaidi tangu wakati huo.

NAFASI YA 10, USAJILI KIBOKO

Kumaliza katika nafasi ya 10 katika msimu wake wa kwanza baada ya kurejea Serie A kuliisaidia Como kuepuka kushuka daraja kwa urahisi na kuweka msingi wa kujenga mafanikio zaidi. Hata hivyo, ni lazima kusisitiza kuwa klabu hiyo ilitumia fedha nyingi katika usajili, ikiwemo Euro 60 milioni zinazodaiwa kuwa kiasi ambacho hatimaye ililipa Real Madrid kumsajili Nico Paz.

Matumizi ya Como katika dirisha la usajili la majira ya kiangazi 2024 yalizidi Euro 160 milioni. Kwa upande mwingine, klabu nyingine mbili zilizopanda daraja, Parma na Venezia, zilitumia jumla ya Euro 78 milioni, kiasi ambacho ni chini ya nusu ya matumizi ya Como.

Hata hivyo, ukweli ni kwamba matumizi hayo yameleta matokeo yaliyokusudiwa. Uwekezaji zaidi 2025 uliisaidia kupunguza pengo lililokuwepo kati yake na timu zilizokuwa zikigombea nafasi za kufuzu Ligi ya Mabingwa Ulaya. Mwishoni mwa 2025/26, Como iliipiku AC Milan kwa pointi moja na kumaliza katika nafasi ya nne. Ilikuwa na safu bora zaidi ya ulinzi katika ligi, ikiruhusu mabao 29, huku mabao yake 65 ya kufunga yakizidiwa na mabingwa Inter Milan pekee waliopachika 89.

NAMBA HIZI HAPA

Fabregas alitekeleza mfumo wa uchezaji ulioifanya Como kurekodi kiwango kikubwa zaidi cha kumiliki mpira katika Serie A, kwa wastani wa asilimia 61.6, pamoja na presha kali zaidi kwa wapinzani. Timu hiyo iliruhusu wastani wa pasi 9.1 za wapinzani kwa kila hatua moja ya kujilinda.

Kuhusiana na hilo, Como ilikuwa miongoni mwa timu nane pekee katika ligi tano kubwa za Ulaya zilizofikisha mabao mawili kwa tarakimu, yaani 10 au zaidi, yaliyotokana na kuunasa mpira katika eneo la juu la uwanja. Ilifunga mabao 10 ya aina hiyo na kujiweka katika kundi la timu kubwa kama PSG (15), Bayern Munich (12), Real Madrid (11), Liverpool na Barcelona (kila moja mabao 10), miongoni mwa nyingine.

Paz ndiye sura ya mradi wa klabu. Mchezaji huyo wa timu ya taifa ya Argentina ni kiungo mwenye nguvu na uwezo mkubwa, anayesifiwa kwa kufanya uamuzi sahihi katika mashambulizi, kipaji chake cha kuumiliki mpira na bidii yake uwanjani.

Kenan Yildiz, aliyepiga chenga mara 158 ndiye mchezaji pekee katika ligi hiyo aliyemzidi Paz, aliyepiga 136 msimu uliopita. Paz pia alishika nafasi ya tatu katika Serie A kwa kurejesha umiliki wa mpira katika eneo la mwisho la nusu ya tatu la uwanja, akifanya hivyo mara 26.

Hata hivyo, takwimu iliyovutia zaidi ni kwamba hakuna kiungo mwingine aliyekaribia kufikia idadi ya ushiriki wa mabao 18 ya nyota huyo wa Como; wote walikuwa nyuma yake kwa tofauti ya angalau mabao manne au asisti nne.

UKOSOAJI

Lakini katika upande mwingine kupaa kwa Como hakujapokewa kwa furaha na kila mtu. Kama ilivyo kwa klabu yoyote inayopiga hatua kwa kasi baada ya kupata uwekezaji mkubwa ghafla, hadithi ya Como imekuwa ikikabiliwa na ukosoaji mkubwa nchini Italia.

Miongoni mwa mitazamo inayotolewa mara kwa mara ni kwamba klabu hiyo ni mradi wa kukuza utalii. Wakosoaji wanadai kuwa ilibebwa kwa sababu tu ya mahali ilipo na ukaribu wa uwanja wake na mojawapo ya vivutio vya asili vinavyofahamika zaidi nchini Italia.

Kwa namna ya kushangaza, ukosoaji mwingine unatokana na muda mdogo wa kucheza wanaopewa wachezaji Waitaliano kikosini. Msimu uliopita, Como iliwapa Waitaliano dakika 14 kucheza katika Serie A.

Na mchezaji huyo alikuwa mmoja tu, Edoardo Goldaniga. Dakika hizo zilikuwa chache kwa 5,485 ikilinganishwa na timu nyingine yoyote katika ligi hiyo, Udinese ikiwa ndiyo iliyofuata kwa dakika nyingi zaidi.

Klabu hiyo tayari imeboresha hali hiyo msimu huu, huku wachezaji Waitaliano wakikusanya dakika zaidi ya 313 za kucheza. Hilo limeifanya kuipita Udinese yenye 261 na Venezia 39. Hata hivyo, bado haijafanya vya kutosha kuwashawishi wakosoaji wote.

Pia haiwezi kusahaulika kuwa klabu hiyo inaungwa mkono na wamiliki matajiri zaidi katika soka la Italia, jambo ambalo kwa watu wengi linapunguza kiasi cha kuvutia kwa mafanikio yake.

Vyovyote iwavyo, hakuna ubishi kwamba kupaa kwa Como kumekuja kwa haraka na kuvutia. Ingawa inaeleweka kwa baadhi ya watu kupuuza mafanikio yake na kuyahusisha tu na nguvu ya ubepari, wapo mashabiki wa kweli walioiona timu hiyo ikihangaika katika daraja la nne, ikikumbwa na kufilisika mara kadhaa na hata kushushwa daraja kwa sababu za kiutawala.