Namba za Ligi ya Mabingwa Ulaya zinasema zaidi

PARIS, UFARANSA: MECHI ya Ligi ya Mabingwa Ulaya (UEFA), msimu wa 2026/27 imeacha gumzo kubwa baada ya matokeo yaliyotikisa soka la Ulaya, yakiongozwa na kipigo cha Manchester United dhidi ya Como, PSG kuichapa Barcelona na Liverpool kufanya maajabu kwa kuibuka na ushindi wa mabao 4-3 dhidi ya Villarreal.

Como, ambao ni wageni katika mashindano hayo, waliitawala Manchester United na kushinda kwa mabao 4-1, matokeo ambayo kwa namna f’lani yaliipa United nafuu kutokana na namna mchezo ulivyokwenda.

Kwa upande mwingine, Paris Saint-Germain (PSG) waliishinda Barcelona kwa mabao 4-2, huku Real Madrid ikiifunga RB Leipzig 4-1.

Hizi hapa ni takwimu muhimu zilizopatikana katika michezo ya raundi hiyo ya tatu.

MAN UNITED KWENYE MTEGO

2-4-5:

Kocha Michael Carrick alianza mwaka 2026 akiwa na rekodi nzuri katika mechi zake 11 za kwanza akiwa na Manchester United, akikusanya ushindi mara saba, sare mbili na vipigo viwili.

Hata hivyo, rekodi yake katika mechi 11 zilizofuata imebadilika kwa kiasi kikubwa, akipata ushindi mara mbili, sare nne na kupoteza mechi tano.

Mechi 7

Manchester United sasa imecheza mechi saba mfululizo bila ushindi katika mashindano yote. Hii ni mara ya kwanza tangu ilipokumbana na mwenendo wa aina hiyo tangu ilipocheza mechi nane bila kushinda kati ya Novemba na Desemba 2015.

Historia nyingine mbaya kwa United

United imekuwa timu ya kwanza kutoka England kuruhusu bao ndani ya dakika mbili za mwanzo katika mechi mbili mfululizo za mashindano makubwa ya Ulaya.

Pia, hii ni mara ya tatu kwa miamba hiyo kupoteza mechi mbili mfululizo za Ligi ya Mabingwa Ulaya kwa tofauti ya zaidi ya bao moja. Hali kama hiyo ilitokea mwaka 1994 dhidi ya Barcelona na Göteborg, kisha mwaka 2003 ilipofungwa na Deportivo La Coruña na Real Madrid.

Miaka 22 na siku 43

Kiungo mshambuliaji  wa Como Nico Paz ameweka rekodi akiwa na umri wa miaka 22 na siku 43, baada ya kuhusika moja kwa moja katika mabao matatu, akifunga mawili na kutoa pasi moja ya mwisho ya bao katika mchezo wa Ligi ya Mabingwa.

Amekuwa mchezaji mdogo zaidi kutoka Argentina kufanya hivyo katika mechi moja ya mashindano hayo tangu Lionel Messi alipofanya hivyo akiwa na miaka 21 dhidi ya Bayern Munich, Aprili 2009.

Paz pia amekuwa mchezaji mdogo zaidi kufunga mabao mawili katika mchezo mmoja dhidi ya Manchester United kwenye Ligi ya Mabingwa, akivunja rekodi iliyokuwa ikishikiliwa na Raúl González wa Real Madrid katika robo fainali ya msimu wa 1999/2000.

Mabao 10

Real Madrid imefunga mabao 10 katika mechi zake tatu za kwanza za Ligi ya Mabingwa Ulaya msimu huu. Ni mara ya kwanza tangu msimu wa 2014/15, chini ya kocha Carlo Ancelotti, kwa timu hiyo kufikia idadi hiyo baada ya michezo mitatu ya mwanzo.

Ushindi wa mabao 4-1 dhidi ya RB Leipzig ulimpa Kylian Mbappé nafasi ya kuandika historia nyingine akiwa na jezi ya Los Blancos.

Mbappé alifunga bao na kutoa asisti katika mchezo huo, ikiwa ni mara yake ya kwanza kufanya hivyo katika mechi moja ya Ligi ya Mabingwa Ulaya akiwa mchezaji wa Real Madrid.

Kwa ujumla, hiyo ilikuwa mara ya 10 katika maisha yake ya soka kufunga na kutoa asisti katika mechi moja ya mashindano hayo. Mara yake ya mwisho kufanya hivyo ilikuwa Novemba 2022, dhidi ya Juventus akiwa PSG.

Mabao 99

Mbappé sasa amehusika moja kwa moja katika mabao 99 ya Ligi ya Mabingwa Ulaya katika mechi 101, akifunga mabao 73 na kutoa asisti 26.

Ni takwimu inayodhihirisha mchango mkubwa wa mshambuliaji huyo katika mashindano hayo makubwa ya klabu barani Ulaya.

Diomande naye aingia vitabuni

Yan Diomande amekuwa mchezaji wa nne mwenye umri mdogo zaidi katika historia ya Ligi ya Mabingwa kufunga bao na kutoa asisti baada ya kuingia akitokea benchi.

Akiwa na miaka 19 na siku 341, anafuatia Erling Haaland, Désiré Doué na Kingsley Coman katika orodha hiyo. Pia amekuwa mchezaji mdogo zaidi wa Real Madrid kufanya hivyo, akivunja rekodi ya Guti aliyoiweka Septemba 1999 akiwa na miaka 22 na siku 325.

Mechi 10

Harry Kane anaendelea kuonyesha makali yake baada ya kufunga katika mechi 10 mfululizo za Ligi ya Mabingwa Ulaya.

Kwa kufanya hivyo, amempita Robert Lewandowski na Ruud van Nistelrooy katika mbio za rekodi ya kufunga katika mechi nyingi mfululizo, huku akibakiwa na Cristiano Ronaldo pekee aliye mbele yake kwa rekodi hiyo.

Mabao 17

Kane amehusika moja kwa moja katika mabao 17 katika mechi 11 alizoichezea Bayern Munich msimu huu, akifunga mabao 10 na kutoa asisti saba.

Miongoni mwa wachezaji wanaocheza katika klabu za ligi tano kubwa za Ulaya, ni Lamine Yamal pekee aliyekuwa mbele yake kwa jumla ya mabao na asisti, akiwa na mchango wa mabao 20.

Penalti 17

Bao lake dhidi ya Arsenal lilikuwa penalti yake ya 17 kufunga katika historia ya Ligi ya Mabingwa Ulaya.

Kwa takwimu hiyo, Kane amebakiwa na penalti mbili kufikia rekodi ya Robert Lewandowski na Cristiano Ronaldo, ambao kila mmoja amefunga penalti 19. Lionel Messi anashikilia nafasi ya kati akiwa na penalti 18.

Eze 25

Eberechi Eze alifunga bao dakika ya 25 baada ya kuingia akitokea benchi katika mchezo dhidi ya Bayern Munich.

Hilo limekuwa bao la mapema zaidi kufungwa na mchezaji wa akiba wa Arsenal katika mchezo wa Ligi ya Mabingwa Ulaya tangu Thierry Henry alipofunga dakika ya 21 dhidi ya Sparta Prague, Oktoba 2005.

Pia, lilikuwa bao la mapema zaidi kufungwa na mchezaji wa akiba kutoka England katika mechi kubwa ya Ulaya tangu Raphael Meade alipofunga dakika ya 18 katika ushindi wa Sporting CP wa mabao 6-0 dhidi ya IA Akranes kwenye UEFA Cup, Oktoba 1986.

20

Aston Villa imekuwa timu ya pili kufikisha ushindi wa 20 katika historia ya European Cup/UEFA Champions League kwa muda mfupi zaidi.Villa imehitaji mechi 30 kufikia idadi hiyo, ikiwa nyuma ya Real Madrid pekee, ambayo ilifikisha ushindi 20 katika mechi 29.

163

Kipa Manuel Neuer amecheza mechi yake ya 163 katika historia ya Ligi ya Mabingwa Ulaya, akilingana na Lionel Messi na Thomas Müller kwa idadi ya mechi katika mashindano hayo.

Wachezaji hao watatu wanashika nafasi ya tatu kwa idadi ya mechi, nyuma ya Cristiano Ronaldo mwenye mechi 183 na Iker Casillas mwenye mechi 177.

4-3

Liverpool imeendeleza historia yake ya kugeuza matokeo katika michezo ya Ulaya inayochezwa nyumbani.

Takwimu zinaonyesha kuwa kila ilipokuwa nyuma kwa mabao 0-2 kabla ya dakika ya 30 katika mechi kubwa ya Ulaya nyumbani, iliishia kushinda.

Aprili 1976 dhidi ya Club Brugge: ilikuwa nyuma dakika ya 12, lakini ikashinda 3-2. Oktoba 1996 dhidi ya Sion: ilikuwa nyuma dakika ya 23, lakini ikashinda 6-3. Aprili 2016 dhidi ya Borussia Dortmund: ilikuwa nyuma dakika ya tisa, lakini ikashinda 4-3.

Oktoba 2026 dhidi ya Villarreal: ilikuwa nyuma dakika ya 29, lakini ikashinda 4-3.

52

Rio Ngumoha amekuwa mchezaji wa tatu mwenye umri mdogo zaidi kutoa asisti zaidi ya moja katika mchezo mmoja wa Ligi ya Mabingwa Ulaya, akiwa na miaka 18 na siku 52. Waliomtangulia ni Warren Zaïre-Emery, aliyefanya hivyo akiwa na miaka 17 na siku 231 dhidi ya AC Milan, pamoja na Theo Walcott, aliyefanya hivyo akiwa na miaka 17 na siku 250 dhidi ya Hamburger SV.

10

Lamine Yamal ameendeleza mfululizo wake wa kuhusika katika mabao katika mechi 10 mfululizo za Barcelona kwenye mashindano yote.

Katika mechi hizo, amehusika katika mabao 20, akifunga na kutoa asisti. Mfululizo huo ni mrefu zaidi kwa mchezaji wa Barcelona tangu Lionel Messi alipofanya hivyo katika mechi 12 mfululizo mwaka 2018.

Yamal pia ndiye mchezaji pekee katika ligi tano kubwa za Ulaya aliyefikisha mabao 10 au zaidi na asisti 10 au zaidi katika mashindano yote msimu huu.