Mondi amfungulia milango Chino Kidd
Muktasari:
- Chino Kidd amesema Diamond amekuwa akimuunga mkono kwa kucheza dance challengi za nyimbo zake, hatua inayosaidia muziki wake kuwafikia watu wengi zaidi kutokana na ukubwa wa jina la mwanamuziki huyo na wingi wa mashabiki wanaomfuatilia katika majukwaa mbalimbali ya kijamii.
WAKATI wasanii wengi wakitafuta njia za kusukuma kazi zifike kwa mashabiki wengi, msanii wa Bongofleva, Chino Kidd, amefichua namna supastaa wa muziki wa Tanzania, Diamond Platnumz, anavyompa sapoti inayochangia kuitangaza kazi yake kupitia mitandao ya kijamii.
Chino Kidd amesema Diamond amekuwa akimuunga mkono kwa kucheza dance challengi za nyimbo zake, hatua inayosaidia muziki wake kuwafikia watu wengi zaidi kutokana na ukubwa wa jina la mwanamuziki huyo na wingi wa mashabiki wanaomfuatilia katika majukwaa mbalimbali ya kijamii.
Chino Kidd ameeleza namna anavyothamini kitendo cha Diamond kutumia ushawishi wake kutangaza kazi zake, akiona ni jambo lenye maana kubwa kwa msanii anayejenga jina lake katika soko la muziki.
Kwa msanii kama Chino Kidd, ambaye amejijengea nafasi katika muziki na uchezaji wa dansi kupata sapoti kutoka kwa mwanamuziki mwenye jina kubwa kama Diamond kunaweza kuongeza mwonekano wa kazi zake na kuwafikia mashabiki ambao huenda hawakuwa na nafasi ya kuzifahamu hapo awali.
NGUVU YA CHALENJI
Katika zama hizi ambazo mitandao ya kijamii imekuwa sehemu muhimu ya kutangaza muziki, dance challengi zimeendelea kuwa miongoni mwa njia zinazotumiwa na wasanii kuongeza umaarufu wa nyimbo zao.
Wimbo unapochezewa na mtu mwenye ushawishi mkubwa, unaweza kuvuta hisia za mashabiki na kuwafanya nao kushiriki kwa kuiga miondoko, kutengeneza video zao na kusambaza kazi hiyo kwa watu wengine.
Hali hiyo ndiyo inayofanya sapoti ya Diamond kuwa jambo analolipa uzito Chino Kidd, kwani msanii huyo ana wafuasi wengi na jina linalotambulika ndani na nje ya Tanzania.
Kwa upande mwingine, Chino Kidd amesisitiza msimamo wake wa kuunga mkono muziki mzuri bila kuangalia tofauti za wasanii, timu wanazoshabikia au lebo wanazotoka.
CHINO HANA UBAGUZI
Chino Kidd amekuwa akifahamika pia kwa uwezo wake wa kucheza nyimbo za wasanii mbalimbali, jambo linaloonyesha namna anavyotumia kipaji chake cha dansi kuunga mkono kazi za wanamuziki wengine.
Amesema kwake muziki mzuri ndio unaopaswa kupewa nafasi, bila kujali umetoka kwa msanii gani au unahusishwa na lebo ipi.
Msimamo huo unaweka wazi namna Chino anavyochukulia muziki kama eneo linaloweza kuwakutanisha wasanii na mashabiki wenye mitazamo tofauti, huku akitumia majukwaa ya kijamii kuonyesha kazi anazozipenda na kufanya kwa ukubwa zaidi ili kuwafikia mashabiki zake.
