Coy Mzungu atoa sababu Cheka Tu kufika mwisho

MWANZO wa safari ya Cheka Tu ulikuwa ndoto ya kijana Coy Mzungu, lakini baada ya miaka tisa ya kulijenga jukwaa hilo na kuwapa nafasi wachekeshaji mbalimbali, sasa ameamua kulifunga pazia.

Kwa miaka hiyo, Cheka Tu limekuwa miongoni mwa majukwaa yaliyowapa nafasi wachekeshaji wengi kuonekana, kujenga majina na kuamini kuwa wanaweza kufika mbali kupitia vipaji vyao.

Lakini sasa safari hiyo imefika mwisho, huku Coy akisema uamuzi huo haujatokana na sababu moja, bali ni mkusanyiko wa mambo aliyopitia katika kipindi chote alichokuwa akibeba jukwaa hilo.

Uamuzi huo umeambatana na shoo ya mwisho iliyopewa jina la The Last Dance, inayotarajiwa kufanyika Oktoba 2 katika Uwanja wa Mpira wa Kikapu Don Bosco, Mbuyuni, Dar es Salaam.

Akizungumza na Mwanaspoti, Coy anasema licha ya jamii kuangalia zaidi vijana waliokuwa wakipata nafasi kupitia Cheka Tu, watu wengi hawakuwahi kujiuliza hali yake kama mtu aliyekuwa nyuma ya jukwaa hilo.

Mwanaspoti: Kwa nini umeamua kuifikisha mwisho Cheka Tu?

Coy Mzungu: Mambo ni mengi sana. Kuyataja moja baada ya lingine ni ngumu. Hata kwenye shoo yenyewe tunaweza kuelezea baadhi ya sababu kwa nini platform yetu inafikia mwisho, lakini ukweli ni kwamba kuna mambo mengi sana nyuma ya uamuzi huu.

Mwanaspoti: Huu uamuzi ulikaa chini ukaufikiria? Maana kuna vijana wengi ambao bado wana ndoto ya kuona Cheka Tu ikiendelea.

Coy: Lakini mimi pia nina ndoto. Mimi ni kijana, napambana na ninatamani kufika sehemu fulani. Lakini mara nyingi hakuna anayejali hilo.

Watu wanaangalia zaidi, “Coy anawapandisha wapi vijana?” au “anawapa nafasi gani?” Lakini ni wachache wanaouliza, “Coy yukoje? Anaendeleaje? Ana hali gani?” Unapojenga jukwaa kwa ajili ya watu, watu wanaangalia wanaonufaika na jukwaa hilo, lakini hawamuangalii aliyelijenga. Hata ukiwa unapitia mambo magumu, watu wanaendelea kusema, “toa jukwaa, endeleza watu, fanya shoo.”

Lakini hakuna anayekuuliza baada ya hiyo shoo unaishije, una madeni kiasi gani au uko katika hali gani.

Mwanaspoti: Kwa hiyo umefikia uamuzi huu kwa sababu ya presha hiyo?

Coy: Ni zaidi ya hapo. Kuna mambo mengi ambayo nimepitia. Tatizo ni kwamba huwezi kutoka kila siku ukaanza kuwaambia watu, “jamani nina shida, ninapitia changamoto.”

Mwishowe mtu anakuona kama wewe ndiye unayefaidika zaidi, kwamba unakuwa milionea kwa sababu tu umeanzisha jukwaa. Halafu kijana mmoja akitoka na kusema “nilikuwa nanyonywa,” watu wanachukua hilo na kuanza kusema, “Coy ananyonya vijana.”

Lakini watu hao hao hawajiulizi, kama kweli ninawanyonya vijana, kwa nini vijana hao ndio wanaolalamika ninapotaka kuacha?

Mwanaspoti: Hujafanya shoo kwa mwaka mzima. Hapo ndipo watu wakaanza kusema umeishiwa, watu wamekukimbia au unanyonywa.

Coy: Hilo ndilo jambo. Hawa vijana wanaosemwa kwamba Coy anawanyonya wako wengi. Sasa naamini kuna haja mmoja wao ajitokeze, aanze kusaka kama nilivyowahi kufanya mimi, abebe wenzake na aonje ule mzigo.

Ajue kwamba kumbe kubeba wenzako kuna gharama, kuna changamoto na wakati mwingine unajikuta hujijali mwenyewe.

Mwanaspoti: Lakini inaonekana kuna kitu kilikukwaza mpaka ukasema sasa basi, ngoja niache.

Coy: Ndiyo maana nimekuwa nikisema, jibu ni mambo mengi. Kama ingekuwa kuna jambo moja lililonikwaza, ningelitaja. Ningesema hiki ndicho kilichonifanya nisifanye tena shoo. Lakini sivyo.

Kwa ujumla, watu wanapenda kuwakumbusha vijana waliopo nyuma yangu, wale wanaonufaika na comedy ya Cheka Tu, wale wenye ndoto ya kufika kwenye jukwaa hili na wanaomuona Coy kama inspiration.

Lakini kuna swali moja ambalo halijaulizwa mara nyingi: huyo mtu aliyesababisha vijana hao kuona inawezekana, yeye anaendeleaje?

Mwanaspoti: Unamaanisha nani? Unaweza kumtaja?

Coy: Hii sio habari ya mtu mmoja. Nilitolea mfano tu kuhusu namna ambavyo mtu akitoka na kusema “fulani ananyonya watu,” kila mtu anachukua hilo bila kutafuta ukweli.

Tatizo ni kwamba Tanzania watu wengi hawakai chini kutafuta ukweli. Kitu kikiwekwa kwenye mitandao ya kijamii, ndicho kinachobebwa. Media zinaanza kuandika, “Coy anaonekana ananyonya vijana,” lakini hakuna anayekupigia simu kwa nia ya kujua upande wako.

Hakuna anayesema, “Coy, hebu tuongee, mbona naona hivi na hivi? Kuna nini?” Watu wengi wanakucheki kwa manufaa yao. Mwandishi anakupigia kwa sababu anataka content itakayouza kwenye media.

Lakini nani anakupigia kwa ajili yako mwenyewe? Nani anasema, “Bwana, tunaona unapitia haya, lakini tusije tukakupoteza”?

Mwanaspoti: Kwa hiyo kimya cha mwaka mmoja ndicho kilichokufanya ufikie uamuzi huu?

Coy: Tumejipanga. Hata taarifa hii mimi sikuwa nimepanga kuitoa. Ndio maana hujaona nimeiposti mimi. Mdogo wangu ndiye aliyeiposti kupitia ukurasa wa Cheka Tu na mimi nikakubali. Awali nilikuwa nimekataa kwa sababu ni jambo gumu kwangu kulikubali. Nilipoanza ndoto hii nilikuwa mwenyewe. Nilikuwa na sleepless nights, napambana kwa hali na mali kuhakikisha nafikisha kitu mahali.

Kwa hiyo kufika hatua ya kusema kila kitu kina mwanzo na mwisho si rahisi. Lakini nimekubali kwamba platform ya kufanya shoo kila mwezi inafikia mwisho.

Mwanaspoti: Na baada ya Cheka Tu una mpango gani?

Coy: Mimi naweza hata kuamua kuuza maembe. Nitaanza zero, nitaanza kitu ambacho sijawahi kufanya na nitafanya. Labda Mungu ananiambia “Bwana nakuitia.”

Ni ngumu kukubali, lakini inabidi. Ndio maana tumeandaa The Last Dance, shoo ya kuwaaga Watanzania. Nimeandaa shoo ambayo naamini kama haitaacha alama, basi itafanya watu watarajie kuona kitu kikubwa kwenye nchi hii.

Kwa wale wanaosema ni mashabiki wetu na wanaipenda comedy ya Cheka Tu, wakija watapata nafasi ya kuishuhudia na tutaagana nao.

Mwanaspoti: Kwa kipindi chote cha mwaka mmoja ulipokuwa kimya, watu walikuwa wanajiuliza ulikuwa unaendeleaje?

Coy: Nilikaa kimya kwa sababu niliamua kuachana na shughuli hii kwa muda na kuendelea na maisha yangu.

Katika kipindi chote nilichokaa kimya, mmesikia sehemu yoyote nimeomba chakula? Nimeomba kodi? Nimeomba msaada wa maisha? Hakuna.

Kwa hiyo nimegundua kwamba naweza kumudu maisha nje ya comedy. Ndio maana nilikaa kimya bila kutoa ‘justification’ kwa mtu yeyote. Lakini nimeona haitakuwa ‘fair’ kwa watu wanaoipenda hii ‘platform’.

Kuna watu kweli wanaipenda Cheka Tu na comedy yake. Ndio maana nimeona niwaage, ili kesho tukikutana nisiulizwe, “Coy, mbona hujafanya shoo?”

Mwanaspoti: Wengine wanaona hii inaweza kuwa kiki ya kutengeneza hamasa ya shoo, kwa sababu wewe mwenyewe hukutoa taarifa hiyo.

Coy: Hapana, sio kiki. Ni kweli, Cheka Tu imefika mwisho.

Nimeacha msisitizo wa mwisho wa Coy uwe ndiyo hitimisho la makala, kwa sababu una nguvu zaidi kuliko kumalizia na maelezo ya shoo.