Xabi Alonso amjaza Morgan Rogers
LONDON, ENGLAND: KOCHA wa Chelsea, Xabi Alonso, amesema klabu hiyo itaendelea kufanya biashara katika dirisha la usajili hadi dakika za mwisho huku akimsifu nyota mpya Morgan Rogers, aliyesajiliwa kwa Pauni 117 milioni kutoka Aston Villa na kuweka rekodi ya kuwa mchezaji ghali zaidi wa Uingereza.
Rogers kwa sasa yupo mapumzikoni baada ya kuitumikia England katika Kombe la Dunia.
Akizungumza kwa mara ya kwanza tangu Chelsea ilipomuwahi Rogers mbele ya Arsenal, Alonso amesema:
"Wachezaji wote waliochelewa kujiunga nasi kwa sababu walifika hatua za mwisho za Kombe la Dunia watakuwa tayari. Tunao kadhaa na lazima wawe tayari."
"Ni usajili mkubwa sana."
"Tulihitaji mchezaji muhimu katika nafasi hiyo na naamini hakukuwa na chaguo bora zaidi ya Morgan Rogers."
"Tulikuwa tukimfuatilia kwa muda mrefu. Atakuwa mchezaji muhimu sana katika timu yetu."
"Tulifurahi kila kitu kilikamilika haraka na sasa tunaye Morgan."
"Tunahitaji wachezaji wanaoweza kuleta athari ya haraka na naamini Morgan hatahitaji muda mrefu kuzoea mfumo, klabu na wenzake."
"Ndiyo aina ya mchezaji tuliyekuwa tunaitafuta."
Baada ya usajili wa Rogers, Chelsea pia ipo mbioni kumsajili beki Maxence Lacroix kutoka Crystal Palace kwa ada inayokadiriwa kufikia Pauni 52 milioni.
Tangazo rasmi linatarajiwa kutolewa muda wowote.
Alipoulizwa kuhusu Lacroix, Alonso amesema:
"Tunataka kujenga timu yenye ushindani."
"Tupo kwenye mchakato huo."
"Tuna ubora mkubwa na vipaji vingi, lakini tunahitaji kujua nini kinahitajika ili kushindana katika Ligi Kuu England."
"Tunataka kikosi chenye uwiano mzuri kati ya ubora na nguvu ya kiakili."
"Soko la usajili bado liko wazi kwa wiki kadhaa."
"Tuna mpango na dira, lakini lazima tufanye tathmini katika muda sahihi."
"Hatuwezi kusema nini kitatokea, lakini mambo yanaweza kubadilika."
Chelsea pia inalazimika kupunguza idadi ya wachezaji wake.
Lacroix akitangazwa rasmi atakuwa beki wa kati wa 10 ndani ya kikosi hicho.
Wengine ni Levi Colwill, Trevoh Chalobah, Aaron Anselmino, Wesley Fofana, Tosin Adarabioyo, Mamadou Sarr, Josh Acheampong, Axel Disasi na Benoit Badiashile.
Alonso ameongeza:
"Tunajua bado kutakuwa na mabadiliko."
"Lazima tuwe tayari kuchukua hatua haraka."
"Kikubwa ni kuwa na mpango ulio wazi, ingawa mambo yanaweza kubadilika hadi siku ya mwisho ya usajili."
"Sipendi kuzungumzia malengo yetu mapema."
"Tunataka kuwa na msimu mzuri na kustahili kumaliza juu kadiri iwezekanavyo."
"Hilo linahitaji kazi kubwa, maendeleo ya timu, kocha mpya, wachezaji wapya na mawazo mapya."
"Hadi sasa tuna hisia nzuri."
Chelsea ilikuwa timu iliyokimbia umbali mfupi zaidi kuliko zote katika Ligi Kuu England msimu uliopita.
Alonso, ambaye akiwa Bayer Leverkusen timu yake ilikuwa miongoni mwa zinazokimbia zaidi, amesema hilo lazima libadilike.
"Tunahitaji kushindana."
"Tunahitaji nguvu."
"Tunahitaji kukimbia."
"Tunahitaji kufanya kazi kwa bidii."
"Tunahitaji kujitoa kwa asilimia 100 katika kila mchezo wa Ligi Kuu England."
"Kushinda kila mechi ni kazi ngumu."
"Lazima tujiandae kwa hilo na ndiyo maana tunatumia kipindi hiki cha maandalizi."
Chelsea itaanza kampeni yake ya Ligi Kuu England kwa mchezo dhidi ya Fulham utakaochezwa Agosti 24.
