Wadanganyifu wanastahili kadi nyekundu

LONDON, ENGLAND: Mwanahabari na wachambuzi wa soka England wamesema vitendo vya Gabriel na Alexis Mac Allister vya udanganyifu wao uwanjani hauishii kuwa jambo la kuaibisha, bali unaonyesha tabia inayopaswa kukemewa katika soka. Kwa maoni yao wachezaji wanaojaribu kumhadaa mwamuzi wanapaswa kukabiliwa na adhabu kali.

Mwanahabari Ladyman anaamini kuwa tishio la kupewa kadi nyekundu linaweza kuwafanya wachezaji wafikirie mara mbili kabla ya kujihusisha na vitendo vya udanganyifu. Adhabu hiyo, kwa mtazamo wake, ingesaidia kulinda uadilifu wa mchezo na kupunguza tabia ya kutafuta faida kwa njia zisizo za haki.

Hoja yake ni kwamba mwamuzi anapodanganywa, si timu pinzani pekee inayoweza kuathirika, bali pia uaminifu wa mashindano. Uamuzi unaotokana na taarifa isiyo sahihi unaweza kubadili mwelekeo wa mchezo, hasa pale unapohusisha penalti, kadi au bao.

Hata hivyo, Ladyman anasema hatua za ndani ya mchezo hazipaswi kuwa njia pekee ya kushughulikia tatizo hilo. Ikiwa vitendo hivyo havitagunduliwa au kuadhibiwa wakati mchezo unaendelea, anataka mamlaka husika vipitie tukio hilo baada ya mechi na kuchukua hatua dhidi ya waliohusika.

Kwa mtazamo huo, mapitio ya baada ya mchezo yangekuwa njia ya kuziba pengo pale ambapo mwamuzi na wasaidizi wake hawakufanikiwa kuona udanganyifu. Pia yangetoa ujumbe kwamba wachezaji hawawezi kuepuka uwajibikaji kwa sababu tu tukio halikuadhibiwa uwanjani.

Ladyman anasisitiza kuwa soka linahitaji kulinda ushindani wa haki. Wachezaji wanapaswa kushinda kwa uwezo wao, si kwa kumshawishi mwamuzi kufanya uamuzi usio sahihi. Anataka adhabu kali zitumike kama njia ya kuzuia tabia hiyo na kuweka wazi kuwa udanganyifu haupaswi kuwa sehemu inayokubalika ya mchezo.

Naye mchambuzi wa soka, Jamie Carragher alimshambulia vikali kiungo wa Liverpool, Alexis Mac Allister, akimtuhumu kujaribu kumhadaa mwamuzi ili winga wa Arsenal, Noni Madueke, aonyeshwe kadi nyekundu katika mchezo ambao Liverpool ilipoteza kwa bao 1-0.

Mac Allister, 27, alihusika katika tukio lililozua mzozo mkubwa baada ya kuanza mabishano na nahodha wa Arsenal, Martin Odegaard. Kiungo huyo alionekana kumfokea Odegaard na kumpiga kofi la kichwani wakati nahodha huyo akiwa amelala chini.

Hata hivyo, hali ilibadilika baada ya Madueke kugusana kichwa na Mac Allister, ambaye alianguka chini kana kwamba amepigwa kwa nguvu. Kitendo hicho kilimkasirisha Carragher, aliyesema amefurahishwa na uamuzi wa kutomwondoa Madueke uwanjani licha ya kuwa anatamani Liverpool ishinde.

Akizungumza kupitia Sky Sports, Carragher amesema vitendo vya aina hiyo vinatia aibu na vinapaswa kukemewa waziwazi, hata pale vinapofanywa na wachezaji wa timu ambayo mchambuzi anaishabikia.

Amesisitiza kuwa kama mchezaji atampiga mwenzake kichwa kwa nguvu, anastahili kuonyeshwa kadi nyekundu. Hata hivyo, aliona si sahihi kwa mchezaji kuanguka na kujifanya ameumizwa baada ya kugusana tu vichwa, kwa lengo la kumshawishi mwamuzi amwadhibu mpinzani wake.

Carragher ameongeza kuwa tatizo hilo linahitaji kushughulikiwa kwa pamoja na wadau wa soka la England, akitaja mamlaka ya waamuzi, Ligi Kuu na makocha kama sehemu ya wanaopaswa kutafuta suluhisho.

Aliyekuwa mshambuliaji wa Liverpool, Daniel Sturridge, naye alimkosoa Mac Allister, akisema hakukuwa na nguvu kubwa katika mgusano wa vichwa kati ya wachezaji hao na kwamba wote walikuwa sehemu ya mabishano hayo.

Sturridge alidai Mac Allister alijaribu kumchokoza Madueke ili afanye jambo ambalo lingemwingiza matatani, lakini mpango huo haukufanikiwa. Amesema tabia hiyo si ya mchezaji mmoja pekee, bali imeenea katika soka na inahitaji kutazamwa kwa upana.

Naye aliyekuwa mshambuliaji wa Arsenal, Ian Wright, alitaka kuwe na mabadiliko yatakayozuia wachezaji kutumia mbinu za kujifanya wameumizwa ili kuwafanya wapinzani wao waonyeshwe kadi.

Wright alielekeza pia lawama zake kwa kitendo cha Mac Allister kumpiga Odegaard kichwani akiwa chini, akisema tukio hilo lilikuwa sehemu muhimu ya kuelewa namna mzozo ulivyoanza.