Waarabu wafanya kufuru kwa Lewandowski

BARCELONA, HISPANIA: MSHAMBULIAJI mkongwe wa Barcelona, Robert Lewandowski, anakaribia kuachana na klabu hiyo katika dirisha lijalo na kujiunga na Al-Hilal kutoka Ligi Kuu ya Saudi Arabia.

Straika huyo anaripotiwa kuwa karibu kukubali ofa kubwa ya klabu hiyo ya Saudia inayotamani sana kuipata saini yake.

Kwa mujibu wa WP Sportowe Fakty, klabu hiyo yenye makao yake makuu Jijini Riyadh limedhamiria kuipata saini yake ili kuongeza nguvu katika safu yao ya ushambuliaji kuelekea msimu ujao.

Ingawa katika wiki za karibuni Lewandowski amehusishwa na klabu mbalimbali ikiwemo Juventus, AC Milan pamoja na klabu ya Marekani ya Chicago Fire FC, Al-Hilal ndiyo inaonekana kuwa mbele zaidi katika mbio hizo.

Lewandowski anaripotiwa kupewa ofa ya mshahara wa Euro 90 milioni ( zaidi ya shilingi 274 bilioni) kwa msimu ili akubali kuhamia Saudi Arabia kujiunga na matajiri hao.

Licha ya ripoti za awali kutoka gazeti la Hispania la AS kudai kuwa sababu za kisiasa na kiusalama huenda zingemzuia nyota huyo kwenda Mashariki ya Kati, ukubwa wa ofa hiyo unaonekana kubadili kabisa mwelekeo wa mambo.

Aidha, kutokana na changamoto za kifedha zinazoikabili Barcelona, kuondoka kwa mchezaji wao anayelipwa mshahara mkubwa zaidi kunaweza kupunguza mzigo mkubwa wa matumizi ya timu.

Iwapo Lewandowski atajiunga na Al-Hilal, atakuwa sehemu ya kikosi chenye nyota wengi kinachonolewa na kocha wa zamani wa Inter Milan, Simone Inzaghi kwani hadi sasa timu hiyo ina nyota kadhaa akiwemo mshambuliaji wa zamani wa Real Madrid na mshindi wa Ballon d'Or, Karim Benzema, pamoja na Sergej Milinkovic-Savic, Theo Hernandez, Darwin Nunez, Ruben Neves na Kalidou Koulibaly ambao kabla walitamba kwenye soka la Ulaya.