BAADA ya kukaushia dili kadhaa zilizotua mezani kwa ajili ya kutaka kumnunua Clement Mzize, hatimaye mabosi wa klabu hiyo wameamua kulegeza na kuweka bayana sasa wapo tayari kumuuza.
Ipo hivi. Kwa sasa ndani ya Yanga, hakuna mchezaji anawapasua vichwa mabosi wa klabu hiyo kama mshambuliaji huyo anayeendelea kuzipishanisha klabu mbalimbali zikiwania saini yake na inaelezwa kama sio sasa basi dirisha kubwa lijalo anapigwa bei.
Wakati klabu nne za Uarabuni zikisubiri majibu ya mabosi wa Yanga juu ya utayari wao wakiwa tayari wameshaweka fedha ndefu mezani taarifa mpya ni kwamba kuna klabu nyingine ya Ulaya nayo imepiga hodi ikimtaka mshambuliaji huyo.
Presha inaendelea kuwa kubwa kwa mabosi wa Yanga hasa kila Mzize akifunga bao basi kuna barua pepe watapokea juu ya ofa ya mshambuliaji huyo.
Yanga sasa inapiga hesabu za kufanya biashara ya mshambuliaji huyo, wakitafuta ofa kubwa zaidi ambayo pia itakwenda kumboresha kinda huyo.
Ingawa mabosi wa Yanga hawataki kuzitaja kikamilifu kwa majina timu hizo, lakini tayari akili za kuanza kupiga hesabu za kumuuza zimeanza huku msako wa maana wakitafuta mshambuliaji mwenye makali ukianza ili akiondoa Mzize basi atue ili mambo yaendelee kama kawaida.
Bosi mmoja wa juu wa Yanga ameliambia Mwanaspoti kuwa, ukiacha ofa za klabu za Afrika Kaskazini zilizofikia Sh2 Bilioni ambayo klabu yao ilipanga kumuuza sasa klabu hiyo ya Ubelgiji inataka kutoa zaidi ya fedha hizo kufikia 2.5 bilioni.
Dau hilo limewachanganya mabosi wa Yanga na sasa wanafikiria kufanya biashara haraka kumpa fursa mshambuliaji huyo ambaye tayari msimu huu ameshafunga mabao sita kwenye Ligi Kuu pekee.
“Hii wikiendi ni vile tu hajacheza na hajafunga lakini akifunga tu utaona kuna barua pepe itaingia klabu zinauliza vipi jamani bado hamjafikiria,” alisema bosi huyo.
“Tunafikiria kufanya biashara fedha zinazosemwa ni nyingi unajua pia tunataka kufikiria juu ya maisha ya baadaye ya mchezaji ili akajiendeleze tutaangalia ofa ipi itakuwa sahihi zaidi kwa klabu na kwake.”
Mzize ameendelea kuwa bora na msimu huu licha ya kufunga mabao sita katika ligi, ameweka wavuni pia mabao matano kwenye Ligi ya Mabingwa Afrika na Yanga imeishia makundi.
