Mtanzania aitaka Taifa Stars
Muktasari:
- Santos ameongeza anaamini wakipambana na kuonyesha kiwango bora wana nafasi ya kupanda daraja hadi kucheza ligi daraja la tatu msimu uliopita kwani hadi sasa inaongoza kwenye mechi sita ikikusanya pointi 13.
MCHEZAJI wa Kitanzania anayekipiga Ceu Ciutat Meridiana inayoshiriki Ligi Daraja la Nne, Hispania (Catalunya), Fahmar Santos amesema ndoto yake kubwa kwa mwaka huu ni kupata nafasi katika kikosi cha timu ya taifa, licha ya kutambua ushindani wa kufikia hatua hiyo ni mkubwa na unahitaji juhudi zaidi.
Santos amesema anaendelea kupambana katika klabu ili kuimarisha kiwango na kujiongezea nafasi ya kutimiza ndoto hiyo na kucheza timu ya taifa ni moja ya malengo anayoyatamani.
"Asante, acha nipambane mwaka huu. Natamani nije kucheza timu ya taifa, ila ndiyo hivyo, ni ngumu sana lakini naamini kwenye upambanaji nitacheza," amesema Santos.
Akizungumzia mwenendo wake katika kikosi hicho, Santos ameongeza, amekuwa akipata nafasi ya kucheza na hadi sasa akikipiga dakika 360.
Alieleza katika takwimu zake za michezo aliyocheza, kuna mechi alizoanza kikosi cha kwanza, nyingine alikuwa benchi.
"Jambo zuri ni licha ya kuuguza majeraha ndani ya mwaka mzima lakini makocha wananiamini na wanaona uwezo wangu."
Santos ameongeza anaamini wakipambana na kuonyesha kiwango bora wana nafasi ya kupanda daraja hadi kucheza ligi daraja la tatu msimu uliopita kwani hadi sasa inaongoza kwenye mechi sita ikikusanya pointi 13.
