Arajiga kusimama kati Dabi ya Kariakoo

Mwamuzi Ahmed Arajiga kutoka Manyara, ametangazwa kuwa refa wa mchezo wa Dabi ya Kariakoo baina ya Simba na Yanga utakaochezwa Jumamosi, Oktoba 10, 2026 kwenye Uwanja wa Uhuru, Dar es Salaam.

Uteuzi wa Arajiga umefanyika ikiwa ni miezi miwili tangu alipochezesha mechi ya Ngao ya Jamii baina ya timu hizo katika Uwanja wa New Amaan Complex, Zanzibar, Agosti 12, 2026.

Katika mchezo huo, Yanga iliibuka na ushindi wa bao 1-0.

Taarifa iliyotolewa na Bodi ya Ligi Kuu Tanzania (TPLB), imeonyesha kwamba Arajiga katika mechi ya kesho Jumamosi, atasaidiwa na Mohamed Mkono kutoka Tanga kama Msaidizi namba moja na Alli Ramadhan kutoka Zanzibar atakayekuwa mwamuzi msaidizi namba mbili.

Mwamuzi wa akiba atakuwa ni Alex Pancras kutoka Dar es Salaam.

TPLB imemteua Cyprian Kwiyava kutoka Iringa kuwa Kamishna wa Mchezo na Mratibu wa Mechi ni Mohamed Kaluma wa Dar es Salaam.

Timu hizo zinakutana huku zikiwa na idadi sawa ya pointi baada ya kila moja kucheza mechi sita za Ligi Kuu msimuu zikishinda zote.

Yanga iko juu ya msimamo kwa utofauti wa mabao ya kufunga na kufungwa huku Simba ikiwa katika nafasi ya pili japo kila moja ina pointi 18.

Yanga imefunga mabao 16 na kufungwa mawili huku Simba ikifunga mabao 11 na kufungwa mawili.