Senzo halafu Manara sasa kazi iendelee
INAWEZEKANA maisha yanakwenda kasi sana. Au pengine kuna maandiko yanakwenda kutimia. Hakuna shabiki yeyote aliyedhani kwamba kuna siku Haji Manara atatua Yanga.
Wiki hii ametambulishwa Jangwani ni Msemaji rasmi wa klabu hiyo na maisha yanaendelea. Kuna ambao mpaka sasa hawaamini, lakini imeshatokea na ndio ukweli. Huyo hapo muone kwenye uzi wa Yanga akinata kwa mbwembwe zote kama alivyokuwa Simba na maisha yanaendelea.
Mashabiki nao wamestaajabu, lakini wamelazimika kuamini kwamba ndio ukweli na kumpokea kwa madai kwamba amewacharura sana akiwa upande wa pili sasa wanataka na upande wa pili na wenyewe uonje machungu.
Hili jambo limetokea kwa makusudi, ili kutufunza jambo na kuweka pia kumbukumbu kwa siku zijazo. Jambo kama hili miaka 10 iliyopita lisingeweza kutokea,ilikuwa ni haramu kabisa. Enzi za wale kina mzee naniliu. Ilikuwa ni haramu kabisa kiongozi au shabiki kutoka upande mmoja kwenda upande mwingine. Haswa Simba kwenda Yanga.
Lakini ghafla alianza Msauzi Senzo Mazingisa akaingia Yanga kama Mshauri wa uongozi akitokea Simba na sasa Manara ameingia naye Yanga kama Msemaji.
Zama zimebadilika. Teknolojia imebadili fikra za Watanzania na sasa wameanza kujifunza kwamba soka ni zaidi ya Kariakoo. Ni zaidi ya Jangwani na Msimbazi au Chamazi.
Muingiliano wa viongozi au watendaji kutoka upande mmoja kwenda mwingine wa shilingi kunamaanisha kwamba soka sasa ni zaidi ya ushabiki wa kuvaa jezi za nyekundu na njano, sasa ni biashara. Matajiri wameamua kuwekeza fedha zao, ili kufanya kitu cha tofauti hivyo tafsiri yake nyepesi ni kwamba lazima wawe na watu sahihi wa kuwasaidia kufanya kile walichokipanga au dhamira waliyojiwekea iwe ya muda mfupi au muda mrefu.
Ndio maana wadhamini wa Yanga wameamua kumchukua Senzo na Manara pamoja na wengine ambao watadhani kwamba ni sahihi. Mpira ni kazi inayohitaji wataalamu kwenye idara mbalimbali kama kweli mwekezaji anataka kufanikiwa au kuonyesha kitu cha tofauti. Mpira ni zaidi ya kuvaa jezi uwanjani, kuwa mwanachama au mshabiki. Mpira ni masoko, matangazo, mipango madhubuti na uwekezaji kwenye miundombinu ya ndani na nje ya uwanja. Hii ipo duniani kote, bahati mbaya sisi tulichelewa kulijua hili pengine ni kutokana na kuweka ushabiki mbele na ujanjaujanja usio na maana.
Maisha yamebadilika. Ndio maana sasa kuna staili ya kutambusha wachezaji, kuna staili tofauti za kuuza jezi, tiketi tofauti na zamani ambapo ilikuwa ni jambo la kawaida tu na hakukuwa na vitengo maalum vya kufanya hizo kazi. Mabadiliko ya teknohama huko duniani yametulazimisha kubadili akili zetu na kuelekea huko. Hata jinsi ya kuupromoti mchezo husika ili kuongeza hamasa kwa sasa ni tofauti na zamani ndio maana wanahitajika watu wengi wenye vipaji kama Manara na wengine. Ndiko dunia ilikofika, ushabiki utabaki palepale, lakini lazima tuendane na kasi iliyoko duniani kama kweli tunataka kufanya mambo tofauti.
Ni kwa kufanya hivyo pekee na kukubali na mabadiliko ya kimuundo kutasaidia kukuza soka letu na kututoa hapa tulipo na kupiga hatua zaidi. Hakuna namna, lazima tuachie profesheni ichukue nafasi yake na ushabiki ufuate baadae. Tuangalie ni nani anaweza kufanya au kuiingizia nini klabu husika si nani anapenda timu gani na historia yake kimpira ikoje. Senzo, Haji ni mfano tu. Acha kazi iendelee.
IMEANDIKWA NA DOTTO JONGWE ([email protected])
