Gueye, Mngqithi wang'ara Ligi Kuu

KIUNGO mshambuliaji wa Simba, Libasse Gueye, ametwaa tuzo ya mchezaji bora wa Agosti 2026 katika Ligi Kuu ya NBC msimu wa 2026-2027, huku Kocha wa Yanga, Manqoba Mngqithi, akibeba tuzo ya kocha bora wa mwezi huo.

Tuzo hizo zimetangazwa leo Ijumaa na Bodi ya Ligi Kuu Tanzania (TPLB), baada ya kamati ya tuzo kupitia viwango, takwimu na mchango wa wachezaji pamoja na makocha waliofanya vizuri katika michezo ya ligi iliyochezwa mwezi Agosti.

Katika tuzo hizo, Gueye amewazidi Max Nzengeli wa Yanga na Oscar Mwajanga wa Mbeya City, waliokuwa pamoja naye katika hatua ya mwisho ya kinyang'anyiro hicho. Katika michezo mitano ambayo Simba ilicheza Agosti 2026, Gueye alifunga bao moja na kutoa asisti tano huku timu hiyo ikivuna pointi 15.

Kwa upande wa Mngqithi, kocha huyo wa Yanga ametwaa tuzo hiyo baada ya kukiongoza kikosi hicho kushinda michezo yote mitano iliyocheza katika mwezi huo, rekodi iliyompa asilimia 100 ya ushindi na kumweka mbele ya wapinzani wake.

Mngqithi alikuwa akichuana na Steve Barker wa Simba pamoja na Florent Ibenge wa Azam FC, lakini matokeo ya Yanga katika kipindi hicho yakawa turufu kubwa iliyomfanya kamati ya tuzo kumpa ushindi.

Wakati huo huo, TPLB imemtangaza Deogratius Dayan kuwa meneja bora wa Uwanja kwa mwezi Agosti 2026 kutokana na kufanya vizuri katika usimamizi wa shughuli za mechi, utekelezaji wa majukumu ya kiwanja pamoja na masuala yanayohusu miundombinu.

Mbali na hilo, kamati ya tuzo imetangaza mabao matatu yanayowania bao bora la mwezi Agosti 2026 huku mashabiki wakipewa nafasi ya kuamua mshindi kupitia kura zao.

Mabao hayo ni la Shekhan Khamis wa Singida Black Stars katika mchezo dhidi ya Polisi Tanzania, Robert Mathias wa Geita Gold dhidi ya Kagera Sugar na Hija Shamte wa Mbeya City katika mchezo dhidi ya Mashujaa.

Kwa utaratibu huo, mshindi wa bao bora la mwezi Agosti 2026, ataamuliwa kwa kura za mashabiki huku TPLB ikiendelea kutumia tuzo hizo kutambua viwango bora vinavyoonyeshwa na wachezaji, makocha na wadau mbalimbali wa Ligi Kuu.