Niyonzima ampa kicheko Tambwe
Muktasari:
Niyonzima aliichezea Yanga kwa miaka sita kuanzia 2011 hadi 2017 na kutwaa mataji mbalimbali ikiwemo ubingwa wa Ligi Kuu Tanzania Bara, alivyotua Simba hakuwa na mwanzo mzuri kutokana na kusumbuliwa na majeraha.
YANGA imemrejesha Jangwani, kiungo wake fundi, Haruna Niyonzima na taarifa hizi zimempa furaha na faraja kubwa straika wa zamani wa klabu hiyo, Amissi Tambwe aliyedai anaamini Mnyarwanda huyo ana uwezo mkubwa wa kuisaidia timu hiyo katika vita ya ubingwa.
Tambwe aliyeachana na Yanga msimu huu na kutimkia zake Uarabuni alikokuwa akiichezea Fanja SC ya Oman kabla ya kuvunja mkataba kutokana na matatizo ya kifamilia, alisema Niyonzima ni kati ya wachezaji anaojivunia kucheza nao klabu moja, alijua namna ya kumtengenezea mabao.
“Niyo (Niyonzima) niliishi naye vizuri. Nadhani Yanga wamefanya maamuzi sahihi ya kumrudisha, unajua maisha ya mpira ndivyo yalivyo, kuna muda unaweza kuondokana sehemu na ukarejea tena,” alisema Tambwe na kuongeza;
“Alinijulia kunichezesha, nakumbuka vile ambavyo tulikuwa tukifanya mawasiliano ya akili, kuna muda nilikuwa nikipenya nakutana na pasi zake. Bado ana uwezo wa kuendelea kucheza, kikubwa ni mashabiki wa Yanga kumpokea vizuri,” alisema Tambwe.
Niyonzima aliichezea Yanga kwa miaka sita kuanzia 2011 hadi 2017 na kutwaa mataji mbalimbali ikiwemo ubingwa wa Ligi Kuu Tanzania Bara, alivyotua Simba hakuwa na mwanzo mzuri kutokana na kusumbuliwa na majeraha.
Lakini alivyokaa sawa alikuwa moto wa kuotea mbali, mkataba wake ulipomalizika, viongozi wa Simba waliamua kuachana naye ndipo alipoamua kurejea kwao Rwanda ambako alikuwa akiichezea AS Kigali.
Akizungumzia uwezekano wa kurudi Tanzania kucheza soka, Tambwe aliyewahi kuwa Mfungaji Bora misimu miwili tofauti akiwa na Simba na Yanga, alisema ni kitu ambacho kinawezekana kwa sababu hii ni kazi yake.
“Mambo mengine anayepanga ni Mungu, alijua nitacheza siku soka Tanzania na ndio maana kwa miaka mingi nilikuwa huko kama imepangwa kuwa nitarudi kwa mara nyingine tena siwezi kupinga,” alisema mshambuliaji huyo.
Tambwe aliibuka kuwa mfungaji bora wa Ligi Kuu Tanzania Bara kwa mara ya kwanza, akiwa na Simba msimu wa 2013/14 baada ya kufunga mabao 19. Akiwa na Yanga ilikuwa msimu wa 2015/16 baada ya kufunga mabao 21.
