Serikali yaitaka timu ya Jumuia Madola kurudi na medali

Serikali imewataka wanamichezo wa Tanzania wanaokwenda kushiriki Michezo ya Jumuiya ya Madola ya mwaka 2026 mjini Glasgow, Scotland, kuhakikisha wanarejea nyumbani wakiwa na medali huku taifa likitarajia kufanya vizuri katika moja ya mashindano makubwa zaidi ya michezo duniani.

Wito huo umetolewa na Katibu Mkuu wa Baraza la Michezo la Taifa (BMT), Neema Msitha, wakati wa hafla ya kukabidhi bendera ya Taifa kwa timu hiyo iliyofanyika Dar es Salaam.

Msitha amesema Serikali imetekeleza wajibu wake kwa kuhakikisha timu imepata maandalizi yote muhimu, ikiwa ni pamoja na kugharamia kambi za mazoezi, posho na tiketi za safari. Amesema kilichobaki sasa ni jukumu la wanamichezo kupambana na kuiletea Tanzania mafanikio.

Amewakumbusha wanamichezo hao kuwa wanawakilisha matumaini ya Watanzania, ambao wanatarajia kuona uwekezaji uliofanywa na Serikali unazaa matokeo chanya huko Glasgow.

"Serikali imefanya sehemu yake kwa kuhakikisha mmepata kila aina ya msaada unaohitajika, ikiwemo kambi za mazoezi, posho na tiketi za usafiri. Kilichobaki sasa ni jukumu lenu kama wanamichezo kwenda kufanya vizuri kwa ajili ya Taifa," amesema Msitha.

"Lazima mtambue kuwa mna deni kwa Watanzania. Watu watafuatilia kwa karibu namna mtakavyofanya na wanatarajia matokeo mazuri. Nendeni Scotland kwa kujiamini, shindaneni kwa ari kubwa na hakikisheni mnalipigania Taifa kwa kutwaa medali."

Msitha pia amewasisitiza wanamichezo kudumisha nidhamu, umakini na kujituma katika kipindi chote cha mashindano, akieleza kuwa kuwakilisha Tanzania katika Michezo ya Jumuiya ya Madola ni heshima kubwa.

"Tanzania haiendi huko kwa ajili ya kushiriki tu. Tunataka kuona wanamichezo wetu wakishindana kwa kiwango cha juu na kuonyesha dunia uwezo ambao taifa letu linao," ameongeza.

Tanzania itawakilishwa na kikosi cha wanamichezo 12 katika michezo hiyo, huku riadha ikiwa na idadi kubwa zaidi ya washiriki. Kikosi hicho kinaundwa na wanariadha sita, mabondia watatu wa ngumi za ridhaa, wachezaji wawili wa judo na mwogeleaji mmoja.

Katika riadha, upande wa wanawake unaundwa na Cecilia Panga, atakayeshiriki mbio za mita 5,000 na 10,000; Hamida Nassoro, atakayekimbia mita 1,500 na 5,000; pamoja na mwanariadha wa mbio fupi Winfrida Makenji, atakayeshiriki mita 100 na 200.

Kwa upande wa wanaume, Tanzania itawakilishwa na Daniel Sinda katika mbio za maili moja, Benjamin Fernandi Ratsim katika mita 10,000 na Josephat Gisemo, atakayeshiriki mita 5,000 na 10,000.

Wanariadha hao kwa sasa wako kambini jijini Arusha chini ya kocha Marceline Gwandu, wakikamilisha maandalizi yao kabla ya safari ya kuelekea Scotland.

Katika mchezo wa ngumi za ridhaa, Tanzania itawakilishwa na Yusuf Changarawe (kilo 80), Fai Issa Faki (kilo 55) na Zawadi Amos Kutaka, ambaye atashiriki uzani wa wanawake wa kilo 57 (Featherweight).

Mabondia hao wanaendelea na mazoezi yao jijini Dar es Salaam chini ya kocha mkuu Samwel "Batman" Kapungu, akisaidiwa na Kassim Hussein Kassim.

Timu ya judo inaundwa na Andrew Thomas Mlugu, atakayeshiriki uzani wa kilo 81 kwa wanaume, pamoja na Ibrahim Mohamed Hamis, atakayeshiriki uzani wa kilo 60. Wote wako kambini Ukonga, Dar es Salaam, chini ya kocha Omari Mgoye.

Katika mchezo wa kuogelea, Tanzania itawakilishwa na Collins Saliboko, ambaye kwa sasa yuko kambini nchini Afrika Kusini chini ya kocha maarufu Kanisi Mabena. Saliboko, ambaye aliwakilisha Tanzania katika Michezo ya Olimpiki ya Paris 2024, pia ndiye nahodha wa timu ya Taifa.

Saliboko amesema wanamichezo wanafahamu matarajio makubwa ya Watanzania na wako tayari kupambana kwa nguvu zote.

"Tunajua Watanzania wanatarajia matokeo mazuri kutoka kwetu na tunafahamu wajibu tulionao. Tumejiandaa vizuri na tuko tayari kushindana katika kiwango cha juu kabisa," amesema Saliboko.

"Lengo letu ni kulifanya Taifa lijivunie. Tutatoa kila kitu tulicho nacho kwa sababu kuwakilisha Tanzania katika mashindano makubwa kama haya ni heshima kubwa."

Kiongozi wa msafara wa Tanzania, Henry Tandau, amesema timu itaondoka nchini Julai 21 kuelekea Glasgow, hatua itakayowapa wanamichezo muda wa kutosha kuzoea mazingira kabla ya sherehe rasmi za ufunguzi.

Tandau amesema maandalizi yote yamekamilika na akaeleza imani yake kuwa wanamichezo wataiwakilisha Tanzania kwa heshima.

"Tuko tayari kusafiri na kila kitu kimewekwa sawa kuhakikisha timu inashiriki michezo hiyo bila changamoto. Wanamichezo wamejiandaa vizuri na tunaamini wataonyesha kiwango bora," amesema Tandau.

"Lengo letu kubwa ni kuhakikisha wanamichezo wanapata mazingira mazuri ya kushindana. Tunaenda Glasgow kwa ushindani wa kweli na tunatarajia kuona Tanzania ikipata matokeo chanya."

Michezo ya Jumuiya ya Madola ya Glasgow 2026 itafanyika kuanzia Julai 23 hadi Agosti 2, ikiwakutanisha takribani wanamichezo 3,000 kutoka timu 74 za nchi wanachama wa Jumuiya ya Madola. Jumla ya matukio 215 ya medali yatashindaniwa katika michezo 10 tofauti.

Kwa Tanzania, mashindano hayo yanatoa fursa nyingine muhimu ya kupima uwezo wa vipaji vinavyochipukia dhidi ya wanamichezo bora duniani, sambamba na kupata uzoefu muhimu kuelekea mashindano mengine makubwa ya kimataifa yajayo.