Twiga Stars yaanza mambo Wafcon 2024

LEO saa 4:00 usiku, timu ya taifa ya Wanawake ya Tanzania, Twiga Stars itashuka kwenye Uwanja wa Stade Municipal de Berkane, Morocco, kuivaa Mali katika mchezo wa kwanza wa Kundi C ya michuano ya Kombe la Mataifa ya Afrika kwa Wanawake (WAFCON) 2024.

Michuano hiyo ilianza rasmi Jumamosi kwa michezo ya kundi A, ambapo mwenyeji Morocco ilitoka sare ya mabao 2-2 na Zambia.

Twiga Stars ni kati mwa timu 12 zinazoshiriki fainali hizo za WAFCON na leo inaanza safari kwa kuminyana na Mali katika kundi gumu lililojumuisha pia watetezi Afrika Kusini na Ghana.

Licha ya kukosa huduma ya mshambuliaji nyota anayekipiga Brighton ya England, Aisha Masaka, aliyepata majeraha ya paja bado safu ya ushambuliaji ya Stars ina mastaa kama Clara Luvanga (Al Nassr), Opah Clement, Stumai Abdallah na kinda Jamila Rajabu (JKT Queens) wenye uwezo wa kubadili matokeo ya mchezo.

Kwa mara ya mwisho timu hizo zilipokutana katika WAFCON mwaka 2010, zikiwa pamoja na Afrika Kusini na Nigeria. Katika mchezo dhidi ya Mali, Stars ililala kwa mabao 3-2, mabao ya Mali yalifungwa na Aicha Konate, Diarra na N’Diaye ambao kwa sasa hawapo katika kikosi huku mabao ya Tanzania yakifungwa na Sophia Mwasikili, kwa sasa Meneja wa Simba Queens na Fatuma Swalehe.

Miaka imepita na sasa vikosi vyote viwili vimejaa na damu changa, huku Twiga Stars ikijivunia kikosi kipya chenye wachezaji wenye vipaji kuanzia safu ya ulinzi hadi ushambuliaji.

Matumaini ya Watanzania wengi yapo kwa Clara Luvanga, mshambuliaji mwenye nguvu, akili na uwezo mkubwa wa kuliona lango la wapinzani  akitarajiwa kuwa mhimili muhimu kwenye mchezo huo.

Kocha wa Twiga Stars, Bakari Shime alisema; “Tupo kwenye kundi lenye timu ngumu, hususan Mali ambao wamewahi kushiriki mara kadhaa michuano ya WAFCON, na bila kusahau Afrika Kusini ambao ni watetezi. Mchezo hautakuwa rahisi hata kidogo.”

“Kiakili tuko vizuri kuelekea kwenye mashindano haya. Tumefanya maandalizi ya kutosha na kila kitu kiko sawa. Tunaamini tutapata matokeo mazuri, na tunawaahidi Watanzania kuwa tutapambana kwa ajili yao,” aliongeza Shime ‘Mchawi Mweusi’.