Put awatuma kazi mastaa The Cranes

RABAT, MOROCCO: KOCHA wa Uganda, Paul Put, amesema wachezaji wake lazima waachane haraka na masikitiko ya mwisho wa wiki na “kurekebisha hali ya kisaikolojia” kuelekea kwenye pambano muhimu la Kundi C dhidi ya Nigeria kwenye Kombe la Mataifa ya Afrika 2025.

Kocha huyo raia wa Ubelgiji alizungumza baada ya Uganda kutoka sare ya 1-1 dhidi ya Tanzania, matokeo yaliyowaacha The Cranes mkiani mwa kundi wakiwa na pointi moja tu, huku matumaini yao ya kufuzu yakining’inia katika hatari kubwa.

Kwa upande mwingine, Super Eagles wa Nigeria wanaingia kwenye mechi ya mwisho ya kundi siku ya Jumanne wakiwa katika hali nzuri kabisa, tayari wamefuzu hatua ya mtoano na wanahitaji sare tu kuthibitisha nafasi ya kwanza kwenye Kundi C.

Put alikiri kuchanganyikiwa kutokana na fursa waliyokosa dhidi ya Tanzania, lakini alisisitiza kuwa kikosi chake lazima sasa kijikite kikamilifu kwenye kazi iliyo mbele yao, kuikabili Nigeria iliyo kwenye kiwango kizuri, yenye kujiamini na iliyojaa chaguo nyingi za ushambuliaji.

“Nilizungumza na wachezaji na kuwaambia lazima tuendelee kuamini,” amesema Put.

“Unapaswa kucheza hadi mechi ya mwisho. Ndiyo, tumevunjika moyo, lakini tunahitaji kurekebisha hali ya kisaikolojia na kujiandaa kwa mechi dhidi ya Nigeria, ambayo tunajua haitakuwa rahisi.”

Super Eagles wa Nigeria wamekuwa miongoni mwa timu bora zaidi katika hatua ya makundi hadi sasa, wakipata ushindi wa kuvutia dhidi ya Tanzania na Tunisia na kufikisha pointi sita. Nafasi yao ya kucheza hatua ya 16 bora tayari imethibitika, na sare dhidi ya Uganda itawatosha kumaliza kileleni mwa Kundi C.

Mabao yamekuwa yakitoka maeneo mbalimbali ya uwanja. Victor Osimhen alifungua akaunti yake ya mabao kwenye mashindano katika mechi iliyopita, Wilfred Ndidi alifunga bao lake la kwanza kabisa kwa Nigeria, huku Ademola Lookman akifunga katika mechi mbili mfululizo za Afcon 2025.

Kwa kuwa kufuzu tayari kumethibitishwa, kocha mkuu Eric Chelle anaweza kufanya mabadiliko kwenye kikosi. Chidera Ejuke, Moses Simon na Paul Onuachu ni miongoni mwa wachezaji wanaosukuma kupata dakika zaidi, huku Bruno Onyemaehi na Frank Onyeka, waliocheza dhidi ya Tunisia, wakitarajiwa kuendelea kuaminiwa.

Hali ya Uganda ni tete zaidi. Baada ya kupoteza 3-1 dhidi ya Tunisia katika mechi ya kwanza, The Cranes walionekana kuwa timu bora dhidi ya Tanzania, lakini walijikuta wakijilaumu baada ya Allan Okello kukosa penalti katika dakika za majeruhi, tukio ambalo linaweza kuamua hatima ya mashindano yao.

Hata hivyo, Uganda walimaliza mechi hiyo bila majeraha mapya, hali inayompa Put kikosi kamili cha kuchagua. Kocha huyo mwenye umri wa miaka 69 alifanya mabadiliko matano kwenye kikosi cha kwanza katika mechi iliyopita, ikiwamo mabadiliko ya golini, ambapo Denis Onyango alichukua nafasi ya Jamal Salim na huenda akaendelea.

Uche Ikpeazu, ambaye ana asili ya Nigeria, anasukuma kuanza kikosi cha kwanza baada ya kufunga bao la kusawazisha dhidi ya Tanzania, na anaweza kuwa mchezaji muhimu iwapo Cranes watataka kusababisha mshangao.