Pep Guardiola apewa muda Man City

MANCHESTER, ENGLAND: MABOSI wa Manchester City wamempa muda wa kufikiria kocha Pep Guardiola kabla ya kujua kama ana mpango wa kumaliza mkataba au kuondoka mwishoni mwa msimu huu.

Kocha huyo kutoka Catalonia, Hispania, ambaye sasa yupo katika msimu wake wa 10 akiwa na Man City, anadaiwa huenda akaondoka mwisho wa msimu huu. Hivi karibuni, Guardiola aliiongoza Man City kutwaa taji la Carabao baada ya kuifunga Arsenal katika mechi iliyochezwa kwenye Uwanja wa Wembley.

Baada ya ushindi huo, taarifa zinaeleza kuwa viongozi wa juu wa klabu hiyo walijaribu kuwasiliana na Guardiola ili kujua kama kocha huyo ana mpango wa kubaki au ataondoka. Man City walitarajia Guardiola kutoa jibu lake, angalau kwa siri, wakati wa mapumziko ya kimataifa ili waweze kujiandaa, lakini hadi sasa kocha huyo bado hajatoa jibu lolote.

Inasemekana kuwa Guardiola ana uhuru wa kuamua mustakabali wake, na klabu tayari ina mpango mbadala iwapo ataondoka mwisho wa msimu.

Vilevile, baadhi ya wachezaji wanaowindwa na Man City, kama Elliot Anderson wa Nottingham Forest, wanataka kujua kama Guardiola ataendelea kuwa kocha kabla ya kufanya maamuzi ya kusaini nao.

Mmoja kati ya makocha wanaotajwa kama mbadala wa Pep ni Enzo Maresca, ambaye awali alifanya kazi kama msaidizi wake kabla ya kuajiriwa na Leicester City, na baadaye Chelsea aliyoipa taji la Kombe la Dunia la Klabu.

Guardiola tayari ameshinda mataji 19 akiwa Man City, yakiwemo sita ya Ligi Kuu England na taji moja la Ligi ya Mabingwa Ulaya 2023.