Mwamuzi wa Morocco kuamua Nigeria v DR Congo

Mwamuzi wa Morocco, Jalal Jayed, ndiye atakayepuliza kipyenga katika mechi ya fainali ya mchujo wa kufuzu Kombe la Dunia 2026 kati ya Nigeria dhidi ya DR Congo itakayopigwa leo Jumapili, Novemba 16, 2025.

Ripoti zinaonyesha Jayed alichezesha mechi ya Nigeria dhidi ya Rwanda katika mechi ya tano ya Kundi A, mwezi Machi mwaka huu. Nigeria ilishinda mechi hiyo iliyochezwa kwenye Uwanja wa Amahoro, mjini Kigali nchini Rwanda kwa mabao 2-0 yaliyofungwa na Victor Osimhen.

Wasaidizi wa mwamuzi huyo wa Morocco ni Mustapha Akarkad na Zakaria Bernissi, ambao pia ni Wamorocco.

Aidha, Mahrez El Malki wa Tunisia atakuwa mwamuzi wa nne, wakati majukumu ya VAR yataendeshwa na Lahlou Benbraham wa Algeria na Haitham Guirat wa Tunisia.

Mechi ya Nigeria dhidi ya DR Congo itachezwa kwenye Uwanja wa Prince Héritier Moulay El Hassan Sports Complex, mjini Rabat, Morocco, kuanzia saa 4:00 usiku kwa muda wa Tanzania.

Timu ya Nigeria maarufu Super Eagles na DR Congo ambayo pia inatanbulika kama Leopards, zinakutana katika fainali ya mchujo wa kufuzu Kombe la Dunia 2026 (CAF Playoffs) baada ya kufuzu hatua hiyo kupitia mechi za awali za kufuzu Kombe la Dunia.

Nigeria iliingia fainali ya mchujo baada ya kuifunga Gabon 4-1 katika mchezo wa nusu fainali ya mchujo. Ushindi huu ulitokana na uthabiti wa kikosi chao na uwezo wa timu kushinda mechi muhimu, ikiwemo mabao ya Victor Osimhen na wachezaji wengine muhimu.

DR Congo ilifikia fainali ya mchujo baada ya kuishinda Cameroon 1-0 katika nusu fainali. Ushindi huu uliitambulisha kama timu yenye nguvu ya kimsingi, ikiweka rekodi ya kushinda mechi tatu mfululizo kwa bao moja tu, ikionyesha nguvu yao ya ulinzi na uwezo wa kufunga goli la ushindi wakati wa mechi ngumu.

Hivyo, mechi yao ya fainali ya mchujo inachukuliwa kuwa ya kitaaluma na yenye ushindani mkali, kwani zote zinataka nafasi ya kufuzu kwenye hatua ya Intercontinental Playoffs ya Kombe la Dunia 2026.