Argentina yatinga 16 Bora, Messi akiendeleza rekodi

MIAMI, MAREKANI: Argentina imefuzu hatua ya 16 Bora ya Kombe la Dunia 2026 baada ya kuibuka na ushindi wa mabao 3-2 dhidi ya Cape Verde katika mchezo wa kusisimua uliomalizika baada ya dakika 120 kwenye Uwanja wa Miami, Marekani.

Ushindi huo unawapeleka mabingwa watetezi kukutana na Misri katika hatua ya 16 Bora, huku nahodha Lionel Messi akiendelea kuandika historia kwa rekodi mpya.

Argentina ilianza kuonyesha makali yake dakika ya 29 kupitia Messi, aliyepokea pasi ndefu kutoka kwa beki wa kati kabla ya kumzidi ujanja kipa Vozinha na kufunga bao la kuongoza.

Bao hilo lilikuwa la saba kwa Messi katika fainali za Kombe la Dunia 2026 na pia likamfanya kuwa mchezaji wa kwanza kufunga katika mechi nne mfululizo ndani ya toleo moja la Kombe la Dunia, rekodi mpya katika historia ya mashindano hayo.

Argentina imetawala kwa kiasi kikubwa kipindi cha kwanza na kwenda mapumziko ikiwa mbele kwa bao 1-0.

Kipindi cha pili kilianza kwa Cape Verde kuongeza kasi na kufanikiwa kusawazisha dakika ya 59 kupitia kiungo Deroy Duarte, aliyefunga kwa shuti kali la chini baada ya kupokea pasi safi kutoka kwa Ryan Mendes.

Bao hilo lilikuwa la kwanza kwa Argentina kuruhusu katika fainali za mwaka huu baada ya kucheza mechi tatu mfululizo bila kuruhusu nyavu zake kutikiswa.

Licha ya kufungwa, Argentina imeendelea kushambulia kwa nguvu, lakini kipa wa Cape Verde, Vozinha, ameendelea kuwa nguzo muhimu kwa timu yake, akiokoa kwa ustadi mkubwa mashuti matatu hatari ya Messi katika dakika za 62, 72, 90+4 na 105, jambo ambalo liliizuia Argentina kupata ushindi ndani ya muda wa kawaida.

Baada ya dakika 90 kumalizika kwa sare ya 1-1, mchezo uliingia dakika 30 za nyongeza huku Argentina ikiendelea kutawala mchezo na Cabo Verde ikijikita zaidi katika kujilinda na kufanya mashambulizi ya kushtukiza.

Dakika ya 92, Lautaro Martínez ameirejesha Argentina mbele baada ya kufunga kwa shuti la kali kufuatia mpira wa kona uliopigwa na Messi, ambao uliondolewa nusu na mabeki wa Cape Verde kabla ya kumkuta mshambuliaji huyo.

Hata hivyo, Cape Verde haikukata tamaa na ilisawazisha tena dakika ya 103 kupitia beki Sidny Lopes Cabral, aliyefunga bao la kuvutia kwa shuti la kiufundi baada ya kupokea pasi ya Yannick Semedo.

Argentina ilipata bao la ushindi dakika ya 111 kupitia beki Cristian Romero, aliyefunga kwa kichwa akimalizia mpira wa kona uliopigwa na Messi.

Dakika ya 116, kipa Emiliano Martínez aliokoa ushindi wa Argentina kwa kuokoa shuti hatari la Sidny Lopes Cabral lililokuwa linaelekea wavuni na kugeuza mpira kuwa kona.

Mpaka mwamuzi alipomaliza mchezo baada ya dakika 120, Argentina ilikuwa imeibuka na ushindi wa mabao 3-2 na kuendelea na safari ya kutetea taji la Kombe la Dunia.

Mbali na ushindi huo, Messi ameendelea kuthibitisha ubora kwa kufunga bao na kutoa asisti mbili, mchango uliomwezesha kuchaguliwa kuwa mchezaji bora wa mechi, huku Argentina ikijiandaa kuvaana na Misri katika hatua ya 16 Bora.