Mzuka mbio za magari sasa wahamia Iringa
Muktasari:
- Kwa mujibu wa kalenda ya chombo kinachosimamia mchezo wa mbio za magari nchini(AAT), mkoa wa Iringa utakuwa mwenyeji wa raundi ya pili katika mashindano ya siku mbili yatakayofanyika Septemba 14 na 15 mwaka huu.
MSISIMKO na mzuka wa mbio za magari umeanza tena baada ya klabu ya Mbio za Magari Iringa, IMSC, kuthibitisha uenyeji wa raundi ya pili ya mbio za ubingwa wa taifa katikati ya mwezi ujao.
Kwa mujibu wa kalenda ya chombo kinachosimamia mchezo wa mbio za magari nchini(AAT), mkoa wa Iringa utakuwa mwenyeji wa raundi ya pili katika mashindano ya siku mbili yatakayofanyika Septemba 14 na 15 mwaka huu.
Hapo awali Mkoa wa Iringa ulipangwa kufungua msimu wa mbio za magari mwezi March mwaka huu, lakini mashindano hayo yaliahirishwa baada ya mmoja wa waasisi na wadhamini wakuu wa mchezo mkoani humo kufariki dunia.
Baada ya kuahirishwa, msimu wa mbio za magari ulifunguliwa mjini Tanga ambako mashindano ya kilometa 155 yalifanyika mwezi Julai mwaka huu.
“Iringa ndiyo waandaji na madereva tuko tayari kwa mchezo huu,” anasema Randeep Birdi ambaye anaongoza mbio za kusaka taji la ubingwa wa taifa baada ya kushinda raundi ya ufunguzi mjini Tanga.
Wakati macho na masikio ya wapenzi wa mbio za magari wakimuangalia Birdi na Gupal Sandhu aliyeshika nafasi ya pili katika mbio za ufunguzi wa msimu mkoani Tanga, anayetia homa madereva wengine ni mwenyeji Ahmed Huwel ambaye hajawahi kushindwa katika mbio za magari mkoani Iringa kwa takriban miongo miwili sasa.
Kuwepo kwa Huwel ambaye hushiriki na gari ya kisasa aina ya Ford Fiesta, kutatoa changamoto kwa madereva wa Mitsubishi Evo na Subaru Impreza ambao walitamba katika mbio za ufunguzi wa msimu mkoani Tanga mwezi mmoja uliopita .
Madereva kutoka klabu za mikoa ya Arusha,Dar es Salaam, Iringa, Kilimanjaro Morogoro na Tanga wanategemewa kushiriki katika mashindano haya ya raundi ya pili kwa msimu huu.
Dereva na msoma ramani atakayefanya vizuri katika raundi nyingi za mbio za magari ndiye atatwaa ubingwa wa taifa wa mwaka wa mbio za magarik kwa mujibu wa kanuni .
Katika mashindano mengi yanayofanyika mkoani Iringa, madereva kutoka Kenya, Uganda na Zambia pia wamekuwa wakishiriki na wengi wamekuwa wakisifu ubora wa barabara na usalama wa madereva ambavyo pamoja na kuwepo vivutio vingi vya utalii njiani, kumezifanya mbio za magari za Iringa kuwa na mvuto mkubwa.
