Gemu ya Senegal, Morocco ilivyobamba kwa dakika 120

RABAT, MOROCCO: SENEGAL na Morocco ziliwakilisha Bara la Afrika na dunia nzima kushuhudia drama halisi ya soka katika fainali ya AFCON 2025, kuanzia penalti yenye utata, maandamano hadi bao la Pape Gueye lililoamua hatima ya mchezo na litakumbukwa kwa miaka mingi ijayo.

Simba wa Teranga, waliokuwa wakicheza fainali yao ya tatu katika Afcon nne za mwisho, walivumilia presha kubwa na hatimaye wakawa mabingwa wa Afrika kwa mara nyingine.

Morocco, kwa upande wao, waliendeleza subira ya miaka 50 ya kusubiri taji lingine la bara, huku Brahim Díaz akilaumiwa kwa kukosa penalti ya dakika za majeruhi ambayo ingewawezesha wenyeji kunyakua ubingwa.

KIPINDI CHA KWANZA CHENYE PRESHA KILIISHA BILA MABAO

Senegal ni mabingwa wa Kombe la Mataifa ya Afrika 2025 baada ya kuifunga Morocco 1-0 baada ya muda wa ziada katika Uwanja wa Prince Moulay Abdellah mjini Rabat Jumapili. Mchezo ulianza kwa kasi kubwa inayostahili fainali ya bara na katika dakika ya sita bao karibu lipatikane. Gueye wa Senegal aliruka juu zaidi kupokea kona iliyopigwa vizuri, lakini kichwa chake kilizuiwa na kipa wa Morocco, Yassine Bounou.

Morocco ilipata nafasi ya kufungua mlango wa mabao katika dakika ya 14, lakini Ismael Saibari alipiga shuti lililopita pembeni kidogo ya lango akiwa nje kidogo ya eneo la hatari. Katika dakika ya 38, Morocco ilinusurika shambulizi la kushtukiza la Simba wa Teranga, Iliman Ndiaye alipokea mpira uliovushwa kutoka upande wa kulia na kujikuta uso kwa uso na Bounou. Kipa huyo mwenye uzoefu alijitanua vyema na kuzuia shuti la Ndiaye kwa mguu ulionyoshwa na kuhakikisha timu zote zinaenda mapumzikoni zikiwa sare ya bila kufungana.

NAFASI ZILIZOPOTEA NA BAO LILILOKATALIWA

Kipindi cha pili kilianza kwa tahadhari kutoka pande zote, hadi Diaz alipotoa pasi safi ndani ya boksi kwa Ayoub El Kaabi. Licha ya kuwa na mwonekano mzuri wa lango, El Kaabi alipiga shuti lililopita pembeni. Fursa nyingine kubwa kwa Simba wa Atlas ilikuja dakika tatu baada ya saa ya mchezo; Abde Ezzalzouli alipokea krosi ndani ya boksi na kupiga shuti lililopaa juu ya lango. Ilikuwa nafasi nzuri kwa Morocco na mshambuliaji huyo wa Real Betis alipaswa kufanya vizuri zaidi. Katika dakika ya 74, beki wa Senegal, El Hadji Malick Diouf na Neil El Aynaoui wa Morocco waligongana walipokuwa wakipigania mpira wa juu na wote walihitaji matibabu. Mchezo ulisimama kwa zaidi ya dakika tatu, lakini baada ya matibabu wote waliendelea kucheza.

Morocco ilipata nafasi nyingine katika dakika ya 81, lakini kwa mara nyingine Ezzalzouli alishindwa kuitumia. Kutoka katika nafasi nzuri na bila ulinzi, mshambuliaji huyo mwenye umri wa miaka 24 alipiga shuti moja kwa moja kwa kipa wa Senegal, Edouard Mendy, ambaye aliokoa kwa ustadi.

Katika dakika ya tatu ya muda wa nyongeza, Senegal ilifunga kupitia Abdoulaye Seck, lakini bao hilo lilikataliwa kutokana na kosa lililotokea kabla ya mpira kufika langoni. Wachezaji wa Senegal walipinga vikali, lakini refa Jean-Jacques Ndala alisimamia uamuzi wake.

DRAMA YA PENALTI

Muda mfupi baada ya bao la Senegal kukataliwa, refa aliipa Morocco penalti. Awali Ndala hakuonyesha ishara ya penalti baada ya Díaz kuanguka ndani ya boksi kufuatia mguso kutoka kwa beki wa Senegal, El Hadji Malick Diouf, lakini VAR ilimtaka akaangalie tukio hilo kwenye skrini ya pembeni mwa uwanja.

Baada ya kulitazama kwenye kioo cha video, Ndala aliamua kutoa penalti, jambo lililosababisha vurugu na taharuki kubwa.

Kocha wa Senegal, Pape Thiaw aliwaagiza wachezaji wake warejee vyumbani kwa maandamano, ingawa Sadio Mané alijaribu kuwashawishi wabaki uwanjani na kuendelea na mchezo. Wakati wachezaji walipokuwa nje ya uwanja, mapigano yalizuka katika eneo la mashabiki wa Senegal ndani ya uwanja uliokuwa umejaa watu. Inaripotiwa steward mmoja alijeruhiwa na kubebwa kutoka uwanjani katika hali ya vurugu.

Maandamano hayo yalisababisha mchezo kusimama kwa zaidi ya dakika 15 kabla ya Senegal kurejea uwanjani na Morocco kupewa nafasi ya kupiga penalti.

Baada ya muda mrefu wa kusubiri uliolifanya bara lote kushika pumzi, pambano lilikuwa kati ya watu wawili: Díaz dhidi ya Mendy. Ni kipa wa zamani wa Chelsea, Mendy, aliyeibuka mshindi. Díaz alijaribu penalti ya Panenka bila maelezo, lakini mpira ulielea moja kwa moja mikononi mwa Mendy.

Mchezo uliingia muda wa ziada, na haikuchukua muda mrefu Senegal kumwadhibu Díaz. Gueye alipiga shuti kali lisilozuilika kwenye kona ya juu ya kulia ya lango baada ya kusukuma mpira hadi karibu na eneo la hatari na kufungua mabao.

Díaz alitolewa muda mfupi baadaye na alionekana mwenye huzuni kubwa alipokaa kwenye benchi la Morocco. Senegal ilivumilia hadi mwisho na hatimaye waliinua taji lao la pili la AFCON.

MCHEZAJI BORA WA MCHEZO (MVP)

Gueye aliibuka shujaa kwa bao lake la ushindi katika mchezo mgumu uliofanyika Rabat mbele ya mashabiki wengi waliokuwa upande wa Morocco. Bao lake la kuvutia litaishi kwenye kumbukumbu za vizazi vijavyo, hasa kutokana na mazingira ya mchezo huo.

Mendy naye atakumbukwa kama shujaa wa taifa, huku Mane akistahili pongezi za kipekee kwa mchango wake kabla ya penalti ya Díaz, alipowatia akili wachezaji wenzake wakati hali ilipoonekana kuwa mchezo ungeweza kusitishwa kabisa.

ALIYEPOTEZA ZAIDI

Díaz alikuwa na nafasi ya kuipatia Morocco ubingwa, lakini penalti yake ilikuwa mbaya sana na bila shaka itamsumbua kisaikolojia kwa muda mrefu.

Huo ndio ulikuwa wakati ambao miamba ya Afrika Kaskazini ilikaribia sana kuwa mabingwa, lakini presha ilimzidi mshambuliaji huyo wa Real Madrid, ambaye hadi wakati huo alikuwa akitajwa kama mmoja wa wachezaji bora wa mashindano.